Elhuyarrek irudia berritu du, eta lelo berria aukeratu: Ezagutuz aldatzea

Elhuyar.eus webgune nagusia berritu da. Sare sozialetan, bateratze lan bat ere egin dute kontu desberdinen artean. Twitterren @Elhuyar izango da Fundazioaren txioen kanal zentrala, @ElhuyarHizk hizkuntza zerbitzu desberdinen isla, eta @ElhuyarZientzia izango da zientzia dibulgazioko adar desberdinen bateratzailea :

• Zientzia.eus webguneko edukiak,
• Norteko Ferrokarrila irratsaioa,
• Teknopolis telebista saioa,
• Elhuyar aldizkaria
• eta STEAM hezkuntzako baliabideak.

Prentsa ohar batean, honela arrazoitu du Elhuyarrek marka eta lelo berriaren lanketa: "Marka berritu honekin, garai berrietara egokituko da Elhuyar, beste behin ere, 1972an jaio zenetik egin duen bezala. Donostiako Goi Mailako Ingenieritza Eskolako euskaltzale batzuek sortu zuten, eta geroztik etengabe dihardu lanean, zientzia ez ezik, hizkuntza, teknologia eta gizarte-aholkularitzako zerbitzuak eskainiz, eta euskara garatuz."

"Ibilbide horretan jarraituko du, beraz. Euskara modernitatera eramanez. Euskalgintza zientziarekin eta teknologiarekin lotuz, sistema berritzaileak erabiliz, industriara eramanez; Euskal Herrian ez ezik, Espainiako estatuko eta Europako sareekin lotuz."

"Hizkuntzalaritzaren arloan ere bide-urratzaile izaten jarraituko du Elhuyarrek, erreferentziazkoa den hiztegigintzan, kalitate handiko itzulpengintzan, eta, berriki, hizkuntzen teknologia arloarekin batera, adimen artifizialeko baliabide eta zerbitzuak eskaintzen. Gizarte-gaiei loturiko aholkularitza-zerbitzuetan ere bere bidea egiten jarraituko du, enpresa eta erakundeei ikuspegi kritiko bat eskainiz, errealitatea ikusteko modu bat eskainiz, ezagutzatik, hizkuntzaren arloan ez ezik, berdintasunarekin eta parte-hartzearekin lotutako gaietan ere eraldaketa landuz. Ezagutuz aldatzea, finean. Hori izango baita, aurrerantzean ere, Elhuyarren leloa."