Teknologia albisteak

4.600 lanpostu EAEko hizkuntzen industrietan, bi heren emakumezkoenak

Erabiltzailearen aurpegia
Sustatu
2020-02-13 : 14:43

Langune enpresa elkarteak txosten bat egin du publiko, Siadecorekin batera egina eta Gipuzkoako Foru Aldundiaren babesa izan duena, bi puntu nagusi aztertu dituena: Hizkuntzen Industria EAEn, eta Euskararen eragin ekonomikoa Gipuzkoan. Ondorio nagusietako bat, Bizkaia, Araba eta Gipuzkoako barne produktu gordinaren %4.59 euskararekin lortua dago.

EAEn euskara-sektoreek eragindako enplegua langile guztien % 5,99 da. Lau segmentu aztertu dituzte ikerketan:

  1. hizkuntzen irakaskuntza
  2. itzulpengintza eta interpretazioa
  3. eduki linguistikoak
  4. hizkuntza-teknologiak.

Lau segmentuetako enpresek 211,3 milioi euro inguru fakturatzen dituzte urtero, eta 4.600 enplegu hornitzen dituzte, hizkuntzen industriarekin lotutako jarduerak soilik kontuan hartuta.

  • Enpresa horien errealitatea anitza da, baina txostenak honako ezaugarri nagusiak nabarmentzen ditu
  • Enpresa gehienak txikiak dira, autonomo ugari dago.
  • Kokapenari dagokionez, Gipuzkoan dago kontzentrazio handiena.
  • Langileen bi heren pasatxo emakumezkoa da.
  • Euskalgintzako eragileekiko lotura eta harremana handia da.
  • Eskainitako zerbitzuaren xede-hizkuntzari dagokionez, euskara da nagusi.
  • Globalizazio sozial eta ekonomikoarekin lotuta, aukera berriak antzematen dira.
  • Administrazio publikoarekiko mendekotasuna handia da, dirulaguntzak direla eta, baina kontratazioei dagokienez ere bai.
  • Langileen prestakuntza eta kualifikazio-maila da lehiakortasun faktore nagusia.
  • Teknologia berriekiko ikuspuntu bikoitza dago. Onurak onartzen dituzte, baina mehatxu gisa ikusten dituzte batzuek.
  • Iruzurraren eta ezkutuko ekonomiaren arriskuaz ohartarazi dute.
  • Enpresa handiekin eta frankiziekin lehiatzeko zailtasuna azpimarratu
    dute.
  • Nazioartekotzea ez dago zabaldua sektorean, hizkuntza-teknologien segmentua salbuespena da.
  • Bilakaera eta aurreikuspen positiboenak dituzten enpresak dibertsifikatuenak dira, kolaborazio-maila handiena dutenak eta berrikuntza teknologikoei modu baikorrenean aurre egin dietenak.
  • Kolaborazioaren desabantailen artean, elkarlanari eskaini beharreko dedikazioa, denbora eta horrek dakarren kostua azpimarratu dituzte.
  • Komunikazioa, marketing-a eta teknologia berriak lantzea aurreikusten dute bilakaera positiboena dutenek.
  • Ingelesarenaz gainera, txineraren eta arabieraren hazkundea aurreikusten dute.
  • Langunek harreman handia du hizkuntza-teknologien segmentuarekin, baina txikia irakaskuntzarekin eta itzulpengintzarekin.

Hemen txostena bere osotasunean, eta Langunek kaleratutako prentsa-oharra.

Erantzun

Twitter ikonoa  Facebook ikonoa  Sartu