Ikerketa Google-ren mapekin: jakin daiteke zein egunean aterata dauden argazkiak?
Internetek azken urteotan makina bat aplikazio eta webgune interesgarri eskaini dizkigu. Batzuk besteak baino erabilgarriagoak dira. Eta egia aitortu aldera, niri gehien gustatzen zaizkidanetakoak Google Maps eta Google Earth dira. Harrigarria iruditzen zait munduko edozein txoko klik bakar batean muturren aurrean edukitzea. Eta ia eskuekin ukitu arterainoko zoom-a egin ahal izatea.
Bizitzako aurrerapen asko bezala, Google Maps eta Google Earth aplikazioak ere garapen militarrari ertsiki lotuak daude (GPS -a bezala, esaterako), irudiak lortzeko hasiera batean helburu militarrak zituzten sateliteez baliatzen baita Google. Akats bat du ordea, gaur mintzagai dugun aplikazioak: ez dela denbora errealean ikusten. Ez esan ez litzatekeela dotorea izango ordenagailura jo, Australian edo Argentinan bizi den lagunari email bat idatzi bere etxeko atarira irtetzeko esanez, Google Maps (edo Earth) abiatu eta bere etxe gainean zoom eginez, zure laguna bertan ikustea zuri agur-agur egiten eskuarekin.
Bada, momentuz behintzat, Google-k ez du aukera hori eskaintzen. Izan ere mapak argazkiak besterik ez dira, irudi estatikoak alegia. Eta nor ez da inoiz saiatu bere etxe ingurura zoom egin eta bere burua, edo bere autoa aurkitzen? Ni bai. Baina ez da bat ere xamurra hori egitea, ez baitakigu zein urtetan, egunetan edo ordutan aterata dagoen mapan ikusten dugun argazkia, beraz ezin jakin non geunden une horretan, eta ondorioz ezin jakin nondik hasi bilatzen.
Eta hari honetatik tira eginez, joko bat planteatu diot asteburuan neure buruari: saia zaitez Google Mapsen gune jakin baten argazkia noiz aterata dagoen deskubritzen, eta jakin ahal izango duzu non zeunden une edo egun horretan. Ba, tira, deskubritu dut, Donostiako mapa irudikatzen duen argazkia behintzat, nire kalkuluien arabera 2.008ko irailaren 27an aterata dagoela. Nola jakin dut hori?
Hasteko Kursaal jauregira enfokatu dut, eta ara zer aurkitu dudan.
Kanpoaldean jende mordoska bat eta alfonbra larrosa ikusi dut, beraz, Donostiako Zinemaldiaren egunen bat izan zitekeela pentsatu dut. Susmoa baieztatzeko Kursaalaren etxaurrean edo fatxadan eskegita dagoen kartelari erreparatu diot, eta urdin-larrosa kolorekoa dela ikusi dut. Interneten nabigatuz ez zait zaila egin zein urteko edizioa den jakitea, horretarako aurreko urteetako Zinemaldiko kartel ofizialak bilatu ditut, eta uste dut honakoa dela Kursaal kanpoaldean eskegita dagoena (antza behintzat badute, ezta?).
Kartel hau 2.008ko ediziokoa da. Argazkia beraz, 2.008ko irailean dago aterata. Baina posible al da jakitea zein egunetan? Saia gaitezen.
Urte hartako Zinemaldia, kartelean argi azaltzen denez, irailaren 18tik 27ra izan zen. Horrek 10 bat eguneko marjina ematen dit. Beste pista bat beharrezkoa da data zehatza jakiteko. Eta halako batean, Anoeta aldera egin dut kurtsorearekin, ea bertan zer aurkitzen nuen. Eta, ara! Zer da hau? Autobus ilara ederra dago Anoetako futbol zelaiaren kanpoaldean.
Besteak beste, hiru aukera daude hori azaltzeko:
- - Realak norgehiagoka dauka
- - Donostian manifestazio nazionala dago
- - Kilometroak Donostian ospatzen dira
Hirugarren puntua deskartatu egin dut alde batetik datak ez datozelako bat (argazkia irailean aterata dago, eta kilometroak urrian izan ohi dira), eta bestetik 2.008ko Kilometroak Iruran ospatu zirelako.
Hemeroteketan bestalde, ez dut informaziorik aurkitu Donostian 2.008ko iraileko egun horietan izandako manifestazio baten inguruan.
Bota diezaiogun begiradatxo bat beraz, 2.008/2.009 denboraldiko futbol ligako bigarren mailako egutegiari. Guri interesatzen zaizkigun daten artean Realak etxean partida bakarra jokatu zuen. Tira, egutegian hilak 28ko jardunaldia dela dio, baina jardunaldi hartan Realak larunbatean, hau da, irailaren 27an jokatu zuen Anoetan. Noren aurka? Alaves. Amaierako emaitza? 1-1, eta 24. segundotik galtzen hasita gainera, Mikel Erentxunek kronika labur honetan dioskunez.
Hortxe duzue azalpena. Google Mapsek erakusten digun Donostiako irudia 2.008ko irailaren 27tik ez dute eguneratu (Google Earthekin ez dut probarik egin oraindik ezta Google Earthek ere). Hori bai, ez daukat ezta ideiarik ere egun horretan non nengoen
Pd.- Ez dakit emaitza erreala den, niri behintzat data hori eman dit, baina akatsik egonez gero, abixatu.
Erantzunak
Ba nik ere gustura igarotzen ditut orduak Google Maps-i begira.
Argazkien datei dagokienez, jakingo duzue Google-k jatorri askotako argazkiak itsasten dituela adabakiak bata bestearen gainean jarriz. Adibidez hemen.
Argazkiak.org | Udaberria eta udazkena Google Mapsen © cc-by-sa: assar
Argazkiaren goiko partean udazkena da eta behekoan udaberria.
Barnetxek dioen ildotik, begiratu beste hau
Argazkiak.org | Olarizuko etxaldea irailean © cc-by-sa: assar
Hori Gasteiz hegoaldeko Olarizu da. Ba etxearen iparraldean dagoen karpa egun bakarrerako jartzen da soilik, Olarizuko jairako. Beraz, erraz antzeman daiteke argazkia noizkoa den, 2008ko irailaren 14koa, jaiaren aurreko egunekoa. Izan ere, Google-k toki horretan darabilen ortoargazkia 2008koa da eta urte horretan Olarizuko jaia irailaren 15ean izan zen.
Hemen jaiaren argazki bat, karpa eta guzti.
Gasteizko beste bitxikeria batzuk, hemen
Eskola batekoek eskola aurreko etxeetako "lapurrei" beren baratzean ezer ez lapurtzeko eskatzen.
Argazkiak.org | Errespetatu baratzea © cc-by-sa: assar
Eta hemen
Argazkiak.org | Betoñuko urmaeleko makalak © cc-by-sa: assar
Salburuko parkeko Betoñuko urmaela leheneratu ondoren, bertan dagoen oihaneztatze artifizialeko makalak hiltzen eta erortzen, sustraiak urarekin ito egiten zaizkielako.
Epa, argazkiak hegazkinekin egiten dira, ez sateliteekin. Eta argazkiak zuzentzeko lana ez da hain neketsua ezta luzea. Horretarako softwarea dago, http://es.wikipedia.org/wiki/Ortofotograf%C3%ADa
Polita iruditu zitzaidan planteatu zenuen jokoa, eta hasi nintzen begiratzen Eibarko mapa, ea data berekoa izan zitekeen. Hasiera batean baietz ematen zuen:
- Kotxean bi aldeetan Bidebarrieta kalean. Hori larunbat eta igandetan bakarrik izaten da posible.
- Butaneroa lanean (kamioi bat ikusi dut), eta igandetan ezin, beraz derrigor larunbatez.
- Elgoibarko mapa ere begiratu dut, eta Euskal Jaian erabiltzen den eszenatoki bat dago, eta baita Euskal Jaian antolatzen den merkatu bat. Irailaren 27an izan zen 2008an.
- Barrenengua kalea itxita. 2008ko irailaren 18an jausi zen.
Baina...
- Barrenengua kaleko obrak oso aurreratuak dirudite 8 eguneko lana izateko.
- Irailaren 27an iragarri zuten Otaola etorbidea norabide bikoitzekoa izatea, eta mapan dagoeneko bi norabideak ikusten dira.
Edo obrak oso azkar egin zituzten, edo Eibarko zenbait irudi ez datoz bat datarekin. :-)
Oso joko polita, nik ere praktikatu izan dut. Nere autoa toki jakin batean identifikatzea lortu nuen bere garaian, ez Google, baina bai Gipuzkoako b5m zerbitzuko irudiekin (kalitatea handiagoa dute). Beste egun batean, nere guraso eta seme-alabak ezagutu nituen Debako hondartzan, kasu honetan Google StreetView-ren irudiekin.
Zalantza bat jartzekotan, esan behar da agian bi argazkiak (Kursaal eta Anoetakoa) ez direla egun berdinekoak. Izan ere, aireko argazki hauek baliteke egun desberdinetan atera eta gero prozesu luze eta neketsu baten ondoren elkar itsatsi, koloreak berdindu eta prozesatzea.
Baina oso jolas polita da! :-)