Aste honetan herri kontsulta Hernanin Udalak lehenetsi beharreko ekipamenduez erabakitzeko

Hernaniko Udala osatzen duten talde politiko guztiek adostuta jarri zuten martxan lehentasunik handieneko udal ekipamendua aukeratzeko parte-hartze prozesua. Parte-hartzearen lehen fasean hiru ekipamendu lehenetsi zituzten herritarrek: 1. Kultur gunea; 2. Igerilekua; 3. Gudarien eta Tilosen plaza eraberrituak1. Orain hiru aukera horien artean bozkatu ahalko dute. Beitialarrangoitiak adierazi du, udal gobernua osatzen duen tadeak ez duela hiru aukera horietako inoren aldeko aldarririk egingo, baina galdeketaren emaitza bere egingo duela, parte-hartzea gutxienez % 20koa bada: “Gurea egiteak esan nahi du ekipamendu hori ahalik eta azkarren egingarri egiteko urrats guztiak ematen hasiko garela. Zeintzuk dira hasierako urrats horiek? 2010eko aurrekontuetan partida bat jasotzea egitasmo horren proiektua idazteko eta ondoren finantziazio iturriak lantzen hastea”.

Gaur hasi eta igandera bitartean Hernanin erroldatuta dauden 16 urtetik gorako herritar guztiek eman ahalko dute euren bozka Hernaniko Biteri Kultur Etxean: “Ahalik eta herritar gehienek herri kontsulta honetan parte hartzea nahi dugu. Izan ere, emaitzak Hernaniren proiektu estrategiko bat markatuko du; eta horrexegatik, Udaleko talde politiko guztien artean bozka emateko astebeteko epea uztea erabaki da”, azaldu du Beitialarrangoitiak.

Biteri Kultur etxean eman behar da botoa: astelehenetik-ostiralera, 09:00-13:00 eta 16:00-20:30 artean; larunbatean 10:00-13:00 eta 16:00-20:00 artean; eta igandean 09:00-14:00 artean.

“Hernanirentzat hiru proposamen hauetatik zein da zuretzat beharrezkoena?” Galdera horrixe erantzun beharko diote botoa ematen dutenek. Boto-paperak Biteri Kultur Etxean egongo dira. Aukera bakoitzak bere boto-papera izango du eta hiru ekipamenduen artetik bakarra aukeratu behar da. Azaroaren 30ean, 11:30ean, boto kontaketa irekia egingo da udaletxean.

Parte-hartze prozesua urratsez-urrats:

Hernaniko ekipamendu beharrak aztertzeko parte hartze prozesua Gipuzkoako Foru Aldundiaren “Kudeatuz” egitasmoaren baitako proiektua da, eta aurreko maiatzean jarri zuen martxan Hernaniko Udalak. Lehen fasean herritar guztiei zuzendutako hiru bilera egin zuen, Siadecok -ikerketa aplikatua egiten duen enpresak- gidatuta. Bilera horietan, herritarren iritzi eta ekarpenak kontuan izanik, lehentasunezko hiru ekipamendu zehaztu ziren: 1. Kultur gunea; 2. Igerilekua; 3. Gudarien eta Tilosen plaza eraberrituak. Aste honetan egingo den herri kontsultan hernaniarrek hiru aukera horien artean beharrezkoena iruditzen zaiena aukeratu ahalko dute. Baina parte-hartzea ez da aste honetara mugatu; prozesua luzea eta oparoa izan da:

• 2008ko azaroaren 10a: Hernaniko Udalak Kudeatuz programan sartzeko eta parte-hartze prozesu bat martxan jartzeko akordioa sinatzen du Gipuzkoako Foru Aldundiarekin. Kudeatuz programak Hernanin lehenetsi beharreko ekipamenduaren inguruko parte-hartze prozesua martxan jartzea ahalbidetzen dio Udalari.
• 2009ko maiatzaren 25a: Parte-hartze prozesua aurkezteko prentsaurrekoa ematen dute Hernaniko alkate Marian Beitialarrangoitiak eta Parte-hartze zinegotzi Juan Ignacio Arrietak Gipuzkoako Foru Aldundiarekin batera. Egun horretan bertan, www.hernanipolis.net webgunea jartzen da martxan, prozesuaren informazio guztia eguneratu eta herritarren eskura jartzeko.
• 2009ko maiatzaren 28a: Hernaniar guztiei irekitako parte-hartze prozesuko lehen bilera egiten da Biteri Kultur Etxean. Bertan, gaur egungo azpiegiturek asetzen ez dituzten behar sozialak aztertzen dira.
• 2009ko ekainaren 11: Parte-hartze prozesuko bigarren bilera egiten da. Bigarren bilera horretan herri galdeketara eramango diren aukera ezberdinak aztertzen eta eztabaidatzen dira.
• 2009ko ekainaren 24a: Hernanipolis. Badator jokoa izeneko moskeo kanpaina jartzen da martxan. Herriko festak ospatzera gerturatzen diren herritarrek lema idatzirik daramaten kartelekin, zintzilikarioekin, globoekin edota aktoreekin egiten dute topo.
• 2009ko uztailaren 9a: Parte-hartze prozesuko azken bilera egiten da eta herri kontsultara eramango diren hiru aukerak zehazten dira: 1. Kultur gunea; 2. Igerilekua; 3. Gudarien eta Tilosen plaza eraberrituak.
• 2009ko irailaren 24a: Galdeketaren nondik-norakoak onartzen dira Udal plenoan.
• 2009ko irailaren 29a: Udaleko ordezkariek herri kontsultaren datak eta galdeketara eramango diren hiru aukerak jakinarazten dituzte prentsaurreko baten bidez. Egun berean Hernanipolis. Mugitu zure fitxa kanpaina hasten da.
• 2009ko urriaren 14a: Herriko gune ezberdinetatik igaroko den Hernanipolis erakusketa inauguratzen da.
• 2009ko urriaren 30a: Herri kontsultaren inguruko foileto informatiboa banatzen da Hernaniko etxe guztietara.
• 2009ko azaroaren 21a: Galdeketan herritar guztien parte-hartzea bultzatzeko jaialdia egiten da Hernaniko zenbait talderen parte-hartzearekin.
• 2009ko azaroaren 23a: Herri galdeketari hasiera ematen zaio.

Hernanin, 2009ko azaroaren 23an