Donostia Google Earth-en: 3D eraikinak eta informazio kapa ugari

Prentsa ohar batean Udalak dioenez, "tresna horren bidez, kanpora eta 2016rako hautagaitzara begira sustatu ahal izango da hiria."

Orain arte eduki hauek jarri dituzte Google Earth-erako tresna honetan:

• Hainbat urtetako ortoargazkiak (aireko irudiak, lurrarekiko ortogonalak).
• Lurraren erliebea; Udalaren informazio kartografikoari esker, Google-k aurretik zuen informazioarena baino kalitate handiagokoa.
• 3Dko eraikinak; udalerriko eraikin guztien jasotzea. Eraikin enblematikoak errealismo fotografikoarekin, eta beste batzuk bolumen gisa.

Hona eraikinen itxura tridimentsionala Donostiako erdigunean:

Argazkiak.org | Donostia 3d © cc-by-sa: sustatu

Hiriari buruzko informazio ofizial eta urbanistikoa duten hainbat kapa ere bai. Hala nola:

• Lurraren erabilera legalak
• Lurrazpiko zenbait zerbitzuren sareak (dela uren hodiak, edo telefono lerroenak)
• Distrituen mugak eta beste era batekoak
• Katalogoa: arkeologia-eremuak, eraikinen babes-maila, monumentu multzoa eta abar

Adibidez, irudi honek erakusten du nola dauden lurrazpiko telefono-lerroak Donostian zehar. Itsatsitako honetan, berriz, lurraren erabilpen baimenduak Ondarreta aldean:

Argazkiak.org | Donostia: terrenoen erabilpen legala © cc-by-sa: sustatu

Etorkizunean, are informazio kapa gehiago egongo dira:

• aisia eta kultura (museoak, liburutegiak, kultura-zentroak eta abar),
• kultura-ondarea (monumentu interesgarriak, etnografiari eta herri-kulturari lotutako lekuak eta abar), arkitektura-ondarea
• kirola (kirol-zentroak, ibilbideak, ekitaldiak eta abar),
• ingurumena (biodibertsitateari buruzko informazioak, uraren kalitatea, bidexkak eta berdeguneak, gune babestuak, begiratokiak edo parkeak eta abar),
• mugikortasuna (autobus-lineei, topoari, bidegorriei, taxiei eta obrei buruzko informazio geoerreferentziatua),
• jatetxe, ostatu, dendak eta abar

Instalatzeko

Informazio hau ikuskatzeko Google Earth programa instalatu behar da (beharrezkoa da 4.3 bertsioa edo berriago bat). Deskargatu Google Earth hemendik.

Ondoren. Donostiako 3D gidako fitxategia deskargatu behar duzu: cas_donostia_sansebastian.kmz Azalpenak euskaraz daude webgunean, baina Google Earth-eko datuak, soilik gaztelaniaz dokumentaturik aurkitu ditugu.