Jarraitu ehundaka blog RSS bitartez
Sarri aipatzen dugu blogak irakurri beharra dagoela eta erantzun gisa jasotzen dugu aizu, hemen lana egiten dugu eta ez daukagu horretarako denborarik. Gure erantzuna argia da: zure lana egiteko modua aldatzen ari da.
Irakurle askorentzat RSS, jario edo Feed-ak hitz ezagunak dira, baina beste askok oraindik ez dituzte ezagutuko. Hona hemen azalpen azkar bat, CodeSyntax-en CS-Tailerrean duela zenbait argitaratu dena.
Interneteko erabiltzaile aurreratuek ehun blog baino gehiago irakurtzen dituzte (eta egunero jarraitzeko moduko blog interesgarri berriak aurkitzen dituzte). Blog guzti hauek irakurri ahal izateko RSS teknologia darabilte.
Zer da RSS teknologia?
Ba blog batean artikulu berri bat argitaratzen den bakoitzean RSS-ak artikulu horixe bidaltzen dizu. Alerta zerbitzu modukoa da edota epostaz buletin batetara harpidetzearen modukoa.
Nola erabili RSS-a?
Eman izena RSS irakurgailu batean, guk Bloglines eta Google Reader erabiltzen ditugu gehienbat. Ondoren, joan jarraitu nahi dituzun blog edota webguneetara, RSS-aren ikonoa aurkitu (Firefox nabigatzailea erabiltzen baduzu errazagoa da nabigazio barran agertzen delako RSS ikonoa) eta egin klik bertan. Harpidetza pausuak jarraitu ondoren, RSS irakurgailuan jasoko dituzu jarraitzen dituzun webgune guztien azken artikuluak.
Zein abantaila dauzka RSS-ak?
Abantaila nagusia, aurrezten den denbora. RSS-a darabilgunok ez ditugu bisitatzen ehundik gora blog ea zerbait berria argitaratu ote duten ikusteko. Alderantzizkoa gertatzen da, blog horietako batean zerbait berria argitaratzean gure RSS irakurgailura iristen da.
Interneten dauden egunkari ia guztiek RSS teknologia darabilte, ondorioz, blogak jarraitzeaz gain egunkarietako azken artikuluak irakurri ahal izateko ere tresna aparta da (begira Berriaren RSS-ari).
RSS-aren inguruko azalpen gehiago bideo honetan:
Animatu, eta Sustatuk orain dituen hiru RSS kanaletara harpidetzeko aukera aprobetxatu.
Erantzun
Sartu