Teknologia albisteak
ENE sariketa: atzerrian euskara bultzatzen dutenentzat
EuskoSare - Eusko Ikaskuntza
2008-11-20 : 09:11
Azaroak 27an bukatzen da Eusko Ikaskuntzak antolatutako ENE sarian izena emateko epea. Saria Euskal Herritik kanpo Euskara bultzatzen duten erakundeei zuzenduta dago.
1948. urtean Eusko Ikaskuntzak Euskararen Nazioarteko Eguna ospatu eta antolatu zuen lehen aldiz, eta ordudanik urtero abenduaren 3an ospatzen da . Euskara zabaldu eta sustapen lanetan aritzeko helburua izanik, Euskal Herritik kanpo Euskararen zabalkunde eta sustapenean ahalegin gehien egin duen elkartea sarituko du berriro ere EIk.
ENE SARIAren edizio berri honen irabazleak esker on publikoa eta Nestor Basterretxeak Euskararen Nazioarteko Egunerako diseinaturiko burdin eta altzairu herdoilgaitzez egindako anagramaren erreprodukzioa jasoko du.
Hauek dira parte hartzeko jarraitu beharko diren oinarri eta baldintzak:
Hautagaiak
Euskal Herritik kanpo Euskara sustatzeko lanetan diharduen edozein erakundek parte har dezake. Euskal hizkuntza eta horren adierazpideak zabaltzeko lana hartzen da Euskara sustatzeko lantzat: irakaskuntza, literatura idatzia, ahozkoa, zinea eta sortze lan oro.
Saria
Aitorpen publikoa eta Nestor Basterretxeak ENErako bereziki (Euskararen Nazioarteko Eguna) diseinatu duen anagramaren burdina eta altzairu herdoilgaitzezko erreprodukzioa.
Epaimahaia
Eusko Ikaskuntzak izendatuko duen Epaimahai batek hartuko du erabakia.
Baloratzeko orduan, Epaimahaiak alderdi kuantitatiboak eta kualitatiboak hartuko ditu kontuan, sustapen ideietan ageri den berritasunarekin batera.
Epaimahaiak saria eman gabe utz dezake.
Hautagaiak Aurkeztea
Parte hartu nahi duten erakundeek beren jardueraren laburpen bat bidali beharko dute EuskoSarera (info@euskosare.org).
Laburpen horrek gehienez DINA4 neurriko bost orri izango ditu, eta bertan Epaimahaiak kontuan hartzeko interesgarri irudituko zaizkien xehetasun guztiak azalduko dituzte: erakundearen sorrera data; euskararen inguruan urtean burutzen dituzten ekintzak; ikasle kopurua, hala badagokio; argitalpenak eta antzekoak; lorturiko goraipamenak eta sariak; eta abar.
Epeak
2008ko azaroaren 27an, gaueko 24:00etan, amaituko da hautagaiak aurkezteko epea.
Euskararen Nazioarteko Egunean, 2008ko abenduaren 3an, jakinaraziko da Epaimahaiaren erabakia.
Gorabeherak
Sariari buruzko edozein arazo Eusko Ikaskuntzaren baitan erabakiko da.
Bordeleko Euskal Etxea izan da ENE Sariaren hirugarren edizioko irabazlea. Erabakia hartu duen epaimahaigoak urtean zehar euskararen alde egin den lana goraipatu nahi izan du eta baita aurkeztu diren ideien originaltasuna eta teknologien erabilera. Honetaz gain, proiektuen meritu handiari erreferentzia ere egin diote. Edizio honetan gehien parte hartu duten erakundeak Argentina eta Espainiatik datorkigu.
Bordeleko Euskal Etxea - Euskaldunen Biltzarra 1947ko Abenduan sortu zen eta Burdeoseko hiri erdian du kokapena, Palais de lÓmbrière kaleko 7. zenbakian hain zuzen ere. Bere sorreraren helburua hirian bizi ziren euskaldunen arteko solidaritate sentimendua bultzatzea izan zen eta baita eskualde osokoa ere. Honetaz gain, tradizioak eta gure aberriarekiko maitasuna indartzeaz ere arduratu nahi zuen. Egun, 600 kide inguru ditu.
Epaimahaigoak erakundeak euskararen alde aurrera eramaten dituen ekintza desberdinak goraipatu nahi izan ditu, esatebaterako astelehenetik asteazkenera eguneko hiru orduz eskaintzen diren euskara kurtsoak. Ikasleak lehen, bigarren eta hirugarren belaunaldiko euskaldunak daude eta baita Euskal Herriarekin amankomunean ezer ez duten lagunak. Azken hauek Euskararekiko maitasuna edota interesak bultzatuta ikasten dute hizkuntza.
Euskal Etxean ere txikientzako kurtsoak ere antolatzen dira eta euskal kultura jendearengana hurbiltzeko ekitaldi desberdinak. Azken honen adibide dugu Ekainean Lesakara antolatu zuten bidaia edo ospatzen dituzten kontzertuak, konferentziak, etabar. Zentru honetan ere urtero bost aleetan banatuta dagoen argitalpena kaleratzen dute, zeinen 500 kopia plazaratzen dituzten. Bestalde, hilabetero bitan irratsaio bat egiten dute. Honetaz gain, haien web orriak 13.000 bisita jasotzen dute urtero.
Edizio honen epaimahaia Estebe Ormazabal, Euskara arduraduna Sap Paoloko Euskal Etxea, Kinku Zinzunegi, HABEko Diasporarako Programa Bereziaren arduraduna, eta Josémari Veléz de Mendizabal, Eusko Ikaskuntzako gerenteak, osatu zuten.
Eusko Ikaskuntzak proposatu zuen Euskararen Eguna ospatzea 1948 urtean eta honen lehen edizioa 1949 urtean izan zuen. Hau ENE Sariaren hirugarren edizioa da, zeinentzakok Nestor Basterretxea artista euskaldunak diseinatu zuen golardoa.