Teknologia albisteak
4

Euskal kooperatibak eta software librea

Erabiltzailearen aurpegia
Joxe Aranzabal - Jakin
2008-07-15 : 19:07

Euskal kooperatibek eta software libreak ezaugarri bat baino gehiago dituzte komunak. Bietan elementu oinarrizkoak dira prestakuntza, partehartzea eta jakintza partekatzea. Hala ere, han eta hemen aurki daitezkeen salbuespen txiki batzuk kenduta, software librea oso gutxi erabiltzen da gure kooperatibetan. Ia dena dago Microsoften esku: sistema eragileak (Windows), nabigatzaileak (Internet Explorer), posta elektronikoa (OutlookXpress), datu baseak (Acces), kalkulu orriak (Excel), idazteko programak (Word)…

Harritzekoa da. Nazioartean erakunde garrantzitsu asko ari dira Microsoftekiko morrontza alde batera uzten, poliki-poliki software librera pasatzeko, hala nola Massachussetsko gobernua AEBetan, Berlingo Udala, IBM bera, Extremadurako gobernua…, baina hemen ezta mugimendurik txikiena ere bide horretan.

Gure kooperatibek eskuak lotuta dauzkate, Microsoftek lotzen baititu, kooperatibek eurek horrela erabakita. Arrazoiak hor daude: Microsoftek eskaintza onak egiten ditu eta segurtasuna eskaintzen die; zenbait kontutan Microsoft estandar bihurtu da, de facto; kooperatibek apenas duten software librearen berri; kooperatibek ia ez dute aditurik software librean; kooperatibek beldur diote software librerako trantsizioari.

Beldur horiek, berriz, aurreiritzietan oinarritzen dira, gaur egun software libreak eskaintza oparoa baitu: sistema eragiletan GNU-Linux bihurtu da software librearen ikurra sistema eragileen artean; zerbitzarien artean, Apache da nagusi, software librean oinarritua; eta ofimatikan, hortxe daude KDE, GNOME eta OpenOffice. Interneti dagokionez, bestalde, munduan gero eta gehiago erabiltzen dira Firefox, Thunderbird, Zope, Plone, PHP, Perl eta MySQL, besteak beste.

Horregatik, kooperatibek ahalegin handiagoa egin beharko lukete software librera hurbiltzeko: unibertsitatean leku bat eskaini ikasketa programan software libreari; prestatu teknikariak software librean; informatikariak kontratatzerakoan, kontuan izan adituak ote diren software librean; hasi kooperatiba guztietan programarik erabilienak eta errazenak erabiltzen: Firefox, Thunderbird, OpenOffice…; egitasmo bat prestatu software jabeduna utzi eta trantsizioa prestatzeko software librerantz; aztertu software librearen inguruan sortzen ari diren modu berriak elkarlana bultzatzeko, eta erabaki zelan aplikatu kooperatibetan; erabili software librea kooperatibagintza bultzatzeko herrialde pobreetan; lan hitzarmenak egin software librea darabilten enpresekin.

Jakintzak askeago egiten gaitu. Horixe pentsatzen dute bai Euskal Herriko kooperatibek, bai software librean ari direnak ere. Logikoa elkarren berri izatea eta batak besteagandik ikastea.

Erantzunak

Ander
2008-07-15 : 16:16

plas plas plas txalo zaparrada nire aldetik Joxe.



Niri bereziki kooperatiba batzuen jarrerak barrenak erabat nahasten dizkit, IKASTOLAK.



inork gogoan al du ikastolak euskarazko eskola-libururik ez zegoelako eskolan Gaztelerazko liburuak erabiltzen? Nik ez. Kriston lana eginda euskarazko materiala prestatzen zen eta fotokopiekin euskarazko eskolak genituen.



Gaur egun software euskalduna izanik zer egiten dute ikastola gehienetako ordenagailuek gazteleraz?



Diruaren aitzakiak ez du balio, kalitatezko software librea euskaraz dago. Dohain.



Ezjakintasuna ez da aitzaki, ordenagailuak ezarri zirenean ere, ez zituzten ezagutzen eta.



Ganoragabekeria? erosotasuna euskalgintzaren gainetik? auskalo, errealitatea bederen oso mingarria da.



ander goñi
2008-07-17 : 09:37

Kooperatibetan izan da Software Librea bultzatzeko ekimenen bat. MCCk antolatuta, Software Librearen Erabilera sustatzeko lantalde bat jarri zen martxan. Bertan, hainbat kooperatibetako ordezkarik hartu genuen parte. Bakoitzak bere esperientziak azaldu zituen nolabaiteko katalogo bat sortzeko asmoarekin. Beste kooperatibetako arduradunei jasotako esperientzien berri eman zitzaien, baina ez zuen interes handirik jaso. Erantzun eskasa ikusita, bertan behera utzi genuen lantaldea.

Kooperatibek nekez hartuko dute software eredu baten aldeko edo kontrako erabakirik, enpresa hauetan ardura duten informatika zuzendari eta teknikariak bai ordea. Pertsona hauek dira arrazoi ezberdinak medio sistema bat edo bestea erabiltzeko erabakia hartzen dutenak.

Beraz, Software Librearen erabileran aurrera egiteko, oso garrantzitsua da etorkizuneko teknikari eta informatika zuzendariak ikasketa garaian Software Librean oinarritutako tresnak erabili eta ezagutzea. Eta hemen, bete-betean nator bat zurekin, Unibertsitate eta ikastetxeetan barra-barra erabili beharko lirateke tresna libre eta irekiak; ezagutzaz ari garelako, lankidetzaz, Software Libreak oinarrian dituen baloreetaz.

MiKeL
2008-07-17 : 12:24

MCCren osotasun osoan eztakit nola dagoen egun, baina hoietako enpresa (kooperatibarena txiste moduan ikusten dut) batean nabil ni externo moduan eta software librea zer den maiz azaldu egin behar zaie. Bertako teknikoek ez dakite zer demontre den GPL edo BSD bat eta gutxiago software librearen 4 askatsunak. Tresna moduan ikusten dituzte sistemak edo aplikazioak eta dagoeneko batzuetara OSO oituta daudenean, zertarako aldatu!? Hemengo funtzionarioei lana suposatzen die horrek eta ez dut ikusten jendea horren alde egiteko gogoz.

borja
2008-09-02 : 09:38

Aupa Joxe! Oso ona artikulua, guztiz ados denarekin.

Ni ez naiz kooperatibista, nire neska bai; eta batzutan hitz egiten dugu gai honetaz. Garrantzi handiko gaia dela uste dut, eta hausnarketa sakon bat merezi du; nahiz eta oraindik oso ahots gutxi entzuten diren.

Joxe, zure artikuluan gauza bat bota dut faltan: zergatik daukate ezaugarri komunak euskal kooperatibak eta software librea? Lerro baten azaltzen duzu, azkar azkar, eta beharbada hori da abiapuntua: idei potente batzuk, jendeari azaltzeko eta gure alde jartzeko.

Animo eta ondo segi!

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago