Euskal Hizkuntzalaritza eta Filologiako Master ofiziala

Master honetan alderdi teorikotik nahiz praktikotik hainbat gai jorratuko dira: hizkuntza plangintza, hizkuntzaren irakaskuntza, psikolinguistika eta euskararen prozesamendua, itzulpengintza eta semantika, diskurtsoaren analisia, soziolinguistika, euskararen historia eta jatorria, Veleiako berri, euskararen berreraiketaren teknikak, euskal onomastika, historiografia linguistikoa eta euskal gramatika zaharrak, euskal testu zaharrak, euskal literatura zaharra eta garaikidea, euskalkiak eta dialektologiaren azterbideak, fonologia, morfosintaxia, semantika eta gramatikako atalen arteko interfazeak, besteak beste.

Masterrak bost adar edo lan arlo eskaintzen ditu etorkizunean ikerketan trebatzeko:

• Euskal hizkuntzalaritza diakronikoa eta filologia
• Euskal gramatika edo hizkuntzalaritza sinkronikoa
• Euskal dialektologia
• Euskal hizkuntzalaritza aplikatua
• Euskal literatura

Lan arlo bakoitzeko, bi ikastaro funtsezko (4’5 kreditukoa bakoitza), ikastaro aitzinatu bat (3 kreditu) eta mintegi bat ala bi (bakoitza 3 kreditukoa) eskaintzen dira. Ikasleak bost hauetarik hiru adar edo lan arlo hautatuko ditu eta eskuratuko duen “Euskal Hizkuntzalaritza eta Filologia”-ko master tituluan, hiru adar hauetarik biren izena agertuko da ikaslearen berezitasun gisa.

Helburuak

Egitarauaren xedea Euskal Hizkuntzalaritza eta Filologiako ikertzaile profesionalak trebatzea da. Masterra egiten duten ikasleak, doktoretza-tesi bat egin ahal izateko edo euskal gaietan kalitatezko beste zernahi ikerlan egiteko beharrezko diren gaitasunaz, trebakuntzaz eta ereduez jabetu daitezela bilatzen da masterrean. Ikaslearen prestakuntza zientifiko eta teknikoan sakontzea da helburua, ikerlan esperimentalak ontzeko gaitasuna eta metodoak garatzea, horretarako guztirako baliagarri diren alderdietan prestakuntza hobetzea. Jakintzagai sail honetan egun dagoen literatura zientifiko hoberena eskuratuko dio masterrak ikasleari; berebat, ikerlan linguistiko-filologiko enpiriko bati ekiteko behar diren bitartekoak eskainiko dizkio. Euskararen ikerketari edo euskalaritzaren adarrei litezkeen ikuspegi guztietarik ekin nahi dieten ikertzaileen trebakuntza da masterraren helburua, bertako ikasleek gorentasuneko maila zientifikoa lortzea.

Metodologia

Master honetan baliatuko den metodologiak oinarrizko hatsarreen aurkezpen teorikoa eta eskola bertako ariketa praktikoak egitea aldizkatuko ditu:
• Adigai eta hatsarre teorikoak berezilari hoberenek aurkeztuko dituzte eskoletan
• Kasu praktikoen berri aurkeztuko da eskoletan
• Aurkeztuko diren teknikak baliatuz ikasleek gai eta azpigaiak ariketa praktikoen bidez eskoletan landuko dituzte
• Irakurritako bibliografia teknikoaz eskoletan eztabaidak sortuko dira

Izena emateko

Aurreinskripzioa egiteko EHUren Arabako errektoreordetzara deitu behar da uztailaren 11 baino lehen 945/014435 zenbakira eta masterraz informazioa nahi izanez gero EHUko irakasle Iñaki Caminori (945/013644; inyaki.camino@ehu.es). Behin betiko izen ematea irailean izanen da.