Soziolinguistika Klusterreko proiektuetako Erreferentzien Bilgunea

Soziolinguistika Klusterraren 2004ko Hausnarketa Estrategikoan aipatu zen soziolinguistikaren arloan lantzen den ezagutzaren inguruko erreferentziak biltzeko beharra dagoela. Ideia hau oinarrian, bilketari ekiteko Soziolinguistika Klusterrean lantzen diren proiektuetan erabili eta sortu diren materialekin hasi gara. Material hauek bildu, sailkatu eta bilatzeko sortu dugun proiektua da Bilgune hau, beraz.

Iaztik hona erreferentzia hauek sailkatzeko aplikazioa osatzen joan gara, KAM Telekomunikazio Aholkularitzarekin batera. Aplikazioa sortu ondoren, erreferentziak sartzen.

Bilgunearen sarrera orrian, Bilgunearen helburuak azaltzen dituen testuarekin batera, Bilguneko hiru atalak daude: "Bilatu", "Erantsi" eta "Sailkapenak ikusi". Sarrera orria

Proiektu honen helburu nagusiak, beraz, honakoak dira: Soziolinguistika Klusterrak aurrera daramatzan proiektuetan bildu, erabili eta sortu ditugun erreferentziak eskuragarri jartzea eta horiek bilatzeko moduan sailkatzea. Horretarako, link bidezko loturak sartu dira eta dokumentuak berak zintzilikatu, ahal izan denean. Bilguneko sarrera orrian jartzen duen bezala, "ezagutza soziolinguistikoaren zabalpenerako tresna" izatea du helburu.

• Nola bilatzen den: "Bilatu" atala
  "Bilatu" atalean dago bilatzailea. Bertan, bildutako erreferentziak bilatzeko bi modu daude: Arrunta eta aurreratua: Bilatzailea
  1. Bilaketa
  Lehenengo aukeran, bilatu nahi dugun erreferentziaren izenburua edo egilearen izena sartuko dugu. Izenburu edo izen osoa idazten ez bada ere, idazten den hitzarekin lotutako lanak zerrendatuko dizkigu bilatzaileak.
  2. Bilaketa aurreratua
  Bilaketa aurreratuan, erreferentziak sartzeko erabilitako atalen arabera bilatu ahalko da: egilea, izenburua, urtea, proiektua, kokapen geografikoa, gaia, iturria, eduki mota eta hizkuntza.
• Erreferentziak eransteko aukera: "Erantsi" atala
  Erreferentzia berriak eransteko aukera ematen duen atala da. Erantsi atala. Erreferentziak sartzeko argibideak bertan daude. Erantsitako erreferentziak Erreferentzien Bilguneko arduradunak aztertuko ditu eta onespena jaso ondoren gehituko dira Bilgunera. Eguneraketak urtean bitan egingo dira.
• Dauden erreferentziak sailkatuta ikusteko aukera: "Sailkapenak ikusi" atala
  Hemen, Bilgunean txertatuta dauden erreferentziak atal hauetan sailkatuak ageri dira, bakoitzean zenbat bildu diren esanez: Eduki mota, gaia eta kokapen geografikoa. Hauetan sakatuta, erreferentzia horiek zein diren ikusten ahal da. Sailkapenak atala

Aurten, proiektu hauetako erreferentziak sartu dira: Arrue, Bortzirietako bilakaera soziolinguistikoaren azterketa, Eralan, Euskal Herriko kale erabileraren neurketa, Gazteen hizkuntza erabilera eta Lezoko eta Pasaiako haur eta gazteen hizkuntza gaitasuna eta erabilera.

Hemendik aurrera, Erreferentzien Bilgunea osatzen joatea da helburua. Horretarako bi iturri ditugu; batetik, Soziolinguistika Klusterreko proiektuak eta, bestetik, erabiltzailea bera. Ohar eta ekarpenak ere ongi etorriak izanen dira.

Baliagarria eta erabilia izateko egin da. Hala izango al da!