Danobatek bere web orrian jarri ditu makina erremintako hiztegi eta eskuliburu teknikoa
Elgoibarko Danobat Koop. E.ak makina erremintako Hiztegi Teknikoa eta Tailerreko Eskuliburu Teknikoa jarri ditu bere web orrian nahi duenarentzako eskuragarri (www.danobat.com euskarazko bertsioa)
Enpresan 1998 bukaeratik hona martxan dugun euskara planaren haritik 2003an langile batzuen ekimenez hiztegi tekniko bat prestatu genuen langile eta hurbilenekoen artean banatzeko, gure arteko harremanak euskaraz izateko ahalegin batean.
Euskaraz lan egiteko zailtasunik handiena hiztegia dela entzun izan dugu beti, ez dakigula nola esan broca, ranura en T eta horrexetarako sortu genuen hiztegi hau, eguneroko hitz teknikoak nola diren jakiteko.
Ez da Danobatek argitaratu duen lehenengo hiztegia, Sarreran aipatzen den bezala 1976an oraindik jende askok eskuartean erabiltzen duen Danobateko Tekniko Industrial Hiztegia argitaratu baitzuen.
Hitz asko faltako dira, baina lehenengo pausoa eman da, hemendik aurrera erabili eta falta diren hitzen bilketa egitea izango da hurrengo pausoa. Hortaz, denon esku dago hau osatu eta eguneratzea, erabiltzea eta ikastea.
Eskuliburu teknikoa
Bestalde, hori ez zenez nahikoa eta 50. urteurrena aprobetxatuz lan sakon eta mardulago bati ekin genion 2004an.
Mekanika arloan oso ezaguna eta erabilia den liburu txiki bat erabiltzen zen orain urte batzuk tailerretan. Liburu hori gaztelania hutsean zegoen, eta gaur egun ordenagailuak hasi direnetik zaharkituta geratu zela dirudi. Baina guretzat inspirazio iturri izan zela esan dezakegu ideia hartan oinarrituta eguneratutako eta geurera moldatutako bertsio bat prestatu baitugu EUSKARAZ.
Lehenengo materiala bildu, sailkatu, zer sartu erabaki ondoren material hori orraztu eta informatizatu (denak batetik eta bestetik ateratako kopiak baitziren), ondoren euskaratu, maketatu, zuzendu urte eta erdiko lana, baina merezitako lana oso txukun geratu baita.
Zer jasotzen du eskuliburu honek?
Muntatzaile, diseinatzaile eta mekanizatzaileentzako erabilgarria den materiala: trigonometria, neurrien konbertsioak, arauak, marrazketako arauak, materialei buruzko informazioa, oinarrizko kalkuluak nola egin eta berezitasun nagusia EUSKARA HUTSEAN dagoela. Modu aparta terminologia landu eta ikasteko!
Banaketa edo zabalkundeari dagokionean hasiera batean liburu formatuan zabaldu genien bertako langileak, bezeroak, hornitzaileak, eskoletara, liburutegietara... eta eskatzen zuen guztiari. Eta orain aurrerapauso bat eman dugu Danobaten web orrian jarri baititugu biak nahi duenak eskuragarri izan ditzan. Hona hemen helbidea:
www.danobat.com (euskarako bertsioa)
Euskararen erabileraren alde aurrerapausotxo batzuk emateko bide luze honetan gure ekarpena egin dugulakoan eta erabilgarri izango zaiolakoan jendeari lanean jarraitzeko asmoz aurrera begira egiten ditugun lanen berri ere izango duzuelakoan gure leloarekin emango diogu bukaera idatzi honi: Euskara Bat, Danok Bat
Erantzunak
Gure etxean oso gogoan dugu gure aita Felix Etxeberria zein kitzikatua ibili zen 70 hamarkadan bere lantegirako hiztegi txiki bat egiteko. Ez zen hizkuntzalaria, baina DANOBATeko sortzailea izaki, lotsatu ere egiten zen tresneria ezin euskaraz izendatzeaz eta hala ekin zioten berak eta, oker ez banago, Ixidor Sodupek, hiztegitxo bat egiteari. ELHUYAR jaio berria zen orduan eta haiengana jo zuten egindako lana gainbegira zezaten. Orduan ez zegoen, ez DANOBAten eta ez beste inon, Euskara Teknikaririk eta borondatea, lanerako gogoa eta erabakia behar ziren halako kontuetarako. Herriko moldiztegi batean argitaratu zuten, Imprenta Jaureguin, txiki eta apal, azal marroi batekin... Liburu txikitxo bat baizik ez zen izan, hainbeste lan eman zuen hura.... Hementxe daukat eskuetan eta agenda txiki bat baino txikiagoa da izatez, huskeria dirudi...
Gizabidez, edukazioz eta apur bat poz daitezen ere bai, lan hura hartu zuten gizon haiei abixatu ote die inork DANOBATetik, eurek hasitako lanak jarraipena duela gaur sareen sarean?
Arrazoia duzu, artikulu asko argitaratzen ditugu loturatik gabe. Baina bai, lana litzateke Sustatuk testu guztiak hartu eta banan-banan ukituko bagenitu, idazten dituztenek jartzen ez dituzten loturak markatzeko edo itxura txukuntzeko.
Norberak bere erara kargatzen ditu albisteak, eta nahi genuke, bai, jendea konturatu zedin irakurleak hainbat errazago egingo diela kasu baldin eta lana errazten badiete... Argitaratzaileen izenean, testuak zehatz zuzentzeko lana hartzeko moduan ez dago Sustatu: gure prentsa-bulego lanak plataforma hau nahi duenari doan eskaintzeraino iristen dira; hortik aurrera, hemen ez dago erredakziorik inorentzako
lana egiteko kontrataturik. Nahi genuke argitaratzaileak konturatzea, Sustatuko irakurleak bereganatzeko, propagandako testu baten kopipega egitea baino eraginkorragoa izango dela testuak gehiago zaintzea.
Zure kexuak balioko ahal du hemen argitaratzen den edukia hobetzeko. Eskerrik asko irakurle zorrotza izateagatik.
Egia da, Hasier. Felixek ale bat eman zidan, hari elkarrizketa egiten joan nintzaionean. Eta oharraren goiburua irakurri bezain laster akordatu nintzen liburuxkarekin. Pentsatzen dut haren egokitzapena edo eguneraketa izango dela hau... Edozein modutan, aitortza eta aintzatespena zor zaio.
Ohar bat: ez da web orria. Webgune (edo web gune) baten barruan hainbat web orrialde daude baina web orri (atzo Berrian ere irakurri nuen) edo weborri ez da ezer. Euskadi Gazteakoei, batez ere, bost axola, baina...
Bale, Deñe, hiztegia eta guzti hori oso ondo dago; baina webgunea oso zaharkitua gelditu zaizue.
Danobat tamaina eta kategoriako enpresa batek ez luke eman beharko hain irudi kaxkarra interneten.