Teknologia albisteak
Robotek bai euskarari?
Mikel Elorza
2006-02-06 : 15:02
Internet izeneko "asunto" handi horretan erabiltzaileei eraso egiten ibiltzen diren robotek euskara ikasi ote duten zalantza dut, gertatu zaizkidan pasadizo batzuk direla medio, eta gure blogosfera/sareko komandanteek zalantzak argituko dizkidatelakoan doakizue hauxe.
Bada aste batzuk blog batean idazten dudala --zeina azken aldian abandonaturik daukadan, egia osoa esan dezadan--, eta bi "post" oso arrakastatsu izan ditut. Dozenatik gora erantzun jaso dituzte. Ez dira, baina, irakurle arrunten erantzunak, erantzunak zabor-mezuak dira.
Lehenengoarekin susmoa hasi zitzaidan eta horren inguruan ere idatzi nuen nik erantzunen batean. Kontua zen jaso nituen erantzun guztiak botika eskaintzak zirela, eta iruditu zitzaidan gehienak botika lasaigarriak zirela: valium, diazepam, soma... Hogeitaka mezu jaso ditut, eite berekoak (hydrocone, adipex, alprazolam....), asko errepikatuak, eta beti ere botikak eskaintzen (ez naiz botiken ezaugarrien ikertzen hasi). Kontua da "Ezin lasaitu, bada" zela mezuaren titulua, eta zalantza sortu zitzaidan "lasaitu" hitza irakurri ote zuen makina edo roboten batek, eta ezagutu, eta hortik etorri ote zen erasoa. Makinek, xede penaggari horretaz bada ere, euskara ezagutzea pozgarri egin zitzaidan lehen kolpe batean, baina, bloga bezala, ideia abandonatu nuen, gehitxo izan baitzitekeen (beste mezurik idatzi dut hitz hori tituluan daukala, eta ez du makinen erasorik jaso).
Handik ez askora, ordea, "Diruarena bai" mezua idatzi nuen, eta horrek ere jaso du bonbardaketa. Dozenatik gora mezu. Baina ez botikak, ezta zakila luzateko gonbitak ere.... jokoaren inguruko propaganda baizik! Casino, gambling, poker, betting... titulu horiekin iritsi zaizkit erantzunak mezu horretan, eta berriro duda: "dirua" hitza ezagutu dute makinek?
Egongo da beste ezplikaziorik eta pentsatzekoa da, beraz, gure internet-kapitainetako batek azalpen prosaikoagorik eman ahalko duela. Baina bitartean, pentsa dezagun robotek euskara ezagutzen dutela eta hortik aurrera norberak atera ditzala nahi dituen ondorioak: ona dela, pozgarria, penagarria euskara horretarako soilik ezagutzea...
Nik amua jarri dut, ea inork jo nahi dion.
(Azken oharra: beste upel bateko sagardoa da, eta beraz hori nire kontu, neure blogera zabor mezuak sar ez daitezen egin beharrekoak egitea.)
Nik dakidala, robotek ez dituzte webguneen edukiak kontutan hartzen spam zorrotzagoa zabaltzeko. Baina, ez dakit, agian egongo da kasuren bat...
Spam arruntena botiken, diruaren eta sexuaren ingurukoa izaten da, eta horrelako gaiak nori edo nori spameatu berdin izaten zaio igortzaileari, gai nahiko orokorrak bait dira eta spam mezu bakoitzaren kostua oso-oso txikia izaten bait da. Beraz, igortzaileek edonori, edonoiz eta edozelan (e-postaz, blogen bidez, popup lehioekin...) ahalik eta spam gehien bidaltzen diete eta listo. Baina badiotzut, agian egunero bidaltzen duten miloika eta miloika spam mezuak nolabait iragazten hasi dira, baina ez dut inoiz horrelako kasurik ezagutu.
Hizkuntza erabiliagoetan egiten dutenik ez dut inoiz entzun edo irakurri, eta euskara bezalako hizkuntza murriztuetan ez dut uste egingo dutenik. Honen inguruan beti pentsatu dut zergatik arraio gastelaniazko blogetan spam robotek ingelesezko mezuak jartzen dituzten. Benetan spam zorrotzagoa egin nahiko balute, hasteko gaztelaniazko mezuak zabaldu beharko lituzkete ezta?
Kasu erreal bat kontatuko dizut orain. Duela hilabete batzuk WordPress-Eu webgunea hasi genuen eta haseran ez zuen inolako spamik jasotzen. Egun batetan, weblog ezagun batek gure bidalketa bat aipatu zuen gureganako esteka bat jarriz eta ordundik ona astero dozenaka spam mezu jasotzen ditugu. Gehien bat on-line kasinoenak, baina nik dakidala WordPress-Eu weblogean inoiz ez dugu dirurik aipatu... Esaten nizun bezala, nire ustez, jasotako spam mota gehienbat roboten ausazko joan etorrien emaitza da.
Eskerrak gure softwareak (Wordpress) spam-a ri muzin egiteko funtzioak dauzkala eta konfigurazioa prestatu genuenetik dena automatikoki egiten duela. b2evolution-ek ere antzeko gaitasunak edukiko dituela suposatzen dut...
Lagundu izana espero dut :-)