Sortzaileak eta ikusleak elkartuko ditu Euskal Herriko 1. Ikus-entzunezkoen Rallyak

Euskaren erabilera sustatzea du helburu Topagunea Euskara Elkarteen Federazioak. Horregatik, gazte euskaldunei zuzendutako Gazte Sortzaile Sarien bigarren edizio honetan, Euskal Herriko 1. Ikus-entzunezkoen Rallya antolatu du Topaguneak. Bide beretik sortu zen Graffiti Lehiaketak izan duen bide oparoa ikusita, Ikus-entzunezkoek gazte euskaldunak erakartzen dituztela ere egiaztatuta geratu da, askok Rallyan parte-hartzeko nahia azaldu baitu. Gazte euskaldunen izaera artistikoa eta sormena sustatu nahiz gizarteratuko ditu abenduaren 17ko Rallyak.

Gazteek “talde homogeneorik” osatzen ez dutela azaldu du Topaguneko Gazte Saileko arduradun Sonia Perez Anguerak. Horregatik, Graffiti Lehiaketak giro urbanoari erreparatu zion bezala, Ikus-entzunezko Rallyak zaletasun hori duten “gazteen sormena gizarteratzeko” balioko duelakoan dago Perez Anguera.

Parte-hartzaile kopuru altu-altua

Rallyak oso erantzun ona izan du. Guztira, hamasei taldek euren lanak grabatu, editatu eta proiektatuko dituzte, abenduaren 17an (larunbata).

• Parte-hartzaileak Araba, Bizkaia, Gipuzkoa eta Nafarroatik etorriko dira.
• Adin-tarte guztietako lagunak dira. Gazteenak 18 urte ditu eta nagusienak, 35.
• Neska eta mutilen parte-hartzea oso orekatua da.
• Izen-ematea epea itxi eta gero, parte hartzeko asmoa erakutsi zutenekin itxaron zerrenda bat zabaldu da. Beste zortzi talde prest daude, aurrekoetariko batek kale eginez gero, Rallyan parte hartzeko. Guztira, 40-60 bat lagun itxaron zerrendan daude.

Hortaz, “euskaraz egiten diren ekoizpen gutxirekin alderatuta, 2005ean euskarazko beste hamasei lan aurkeztu ahal izatea” arrakastatzat jo du Topaguneko Gazte Saileko arduradunak.

Parte-hartzaileek hiru minutuko ikus-entzunezko lana grabatu eta editatuko dute, euskaraz. Edozein formatu onartuta dago: film laburra, spot-a, bideoklipa, animazioa etab. Lanak Eibarren grabatuko dira, lehiaketa egunean, eta bertako ezaugarriak islatuko dituzte. Ikus-entzunezkoen Rallyaren gaia abenduaren 17an bertan jakitera emango da.

Eguneko programazioa

Gazteak ikus-entzunezko lanak grabatzen eta editatzen dauden bitartean, Eibarrek zinemazaleak hartuko ditu. Gauean Rallyan grabatutako lanak proiektatuko badira ere, arratsaldean hainbat zinema zuzendariren film laburren maratoia antolatu dute. Horrela, parte-hartzaileak ez ezik, “gainerakoak ere euskarazko ikus-entzunezkoen mundura gerturatzea dugu helburu”, ...Eta Kitto! Eibarko Euskara Elkarteko koordinatzaile Koldo Mitxelenak azaldu bezala. Hona hemen, 17:00etatik aurrera, Portalea Kultur Etxean izango diren hamabi film laburrak: Txotx (1997, Asier Altuna eta Telmo Esnal), Haragia (1999, Begoña Vicario), Sarabe (1999, Beatriz de la Vega), 40 ezetz (1999, Asier Altuna eta Telmo Esnal), Basurdea (2002, Ane Muñoz Mitxelena), Terminal (2002, Aitzol Aramaio), Belarra (2002, Koldo Almandoz), Dortoka uhartea (2002, Maru Solores), Topeka (2002, Asier Altuna), Lepokoa (2003, Safy Nebbou), Osaba Jaxinto (2003, Iñaki Beraetxe) eta Amuak (2004, Koldo Almandoz).

Maratoia eta gero, 19:30etik aurrera, filmen zuzendariekin solasaldia egongo da. Ondoko zuzendariek parte hartuko dute:

• Asier Altuna: Aupa Etxebeste! (2005) film luzearen zuzendaria eta Topeka (2002), 40 ezetz (1999) eta Txotx (1997) film laburren zuzendaria.
• Telmo Esnal: Aupa Etxebeste! (2005) film luzearen zuzendaria eta 40 ezetz (1999) film laburraren zuzendaria.
• Ane Muñoz Mitxelena: Basurdea (2002) eta El salto de Beamon (2004) film laburren zuzendaria eta hainbat komunikabidetako kolaboratzailea.
• Begoña Vicario: Animazioko irakaslea Bilboko Arte Ederretako Fakultatean. Animazioko lau film labur egin ditu: Hara-Hona (1994), Geroztik ere (1995), Zureganako grina (1996) eta Pregunta por mí (1996).

Zuzendariok Ikus-entzunezkoen Rallyko epaimahaia osatuko dute. Lehiaketan sortutako lan guztiak 20:30etik aurrera emango dituzte eta ondoren, 22:00etan, sari banaketa egongo da. Guztira, 900 euroko hiru sari emango dira: lanaren osotasunari saria, ikus-entzunezkorik originalena eta gaia ondoen islatu duen lana.

Rallyan sortutako lanen bigarren emanaldia abenduaren 18an, igandean, izango da, arratsaldeko 19:00etan, Eibarko Portalea Kultur Etxean. Sarrera doan izango da.