Generación XXI, lehiaketa ETB2n enpresa-ekintzaileen artean

Programa hau hamahiru astez emango da ETB2-n eta 27 lehiakidek parte hartuko dute. Lehiakide hauek hasiera fasean edo garapen bidean dagoen ideia berritzaile bat aurkeztu beharko dute. Parte-hartzaileak euren artean lehiatuko dira eta epaimahai baten aurrean defendatuko dute beren ideia edo proiektua. Enpresa eta erakundeen munduko profesionalek osatuko dute epaimahai hau.

Parte-hartzaileek enpresa munduko hainbat proba gainditu beharko dituzte eta euren proiektua defendatu eta aurrera atera beharko dute. Lehiaketan, enpresa ideia baloratu eta saritzeaz gain, ideia berritzailea enpresa (enplegua eta aberastasuna sortuko duena) bihurtzeko behar diren oinarrizko teknika eta mekanismoak erakutsiko dira, antolatzaileen iritziz. Urrian abiatuko da programa. SPRIk honela azaltzen du programaren funtsa:

Ekimen hau ekintzaile berriei laguntza publikoak eskaintzeko eta espiritu berritzailea sustatzeko erakundeen arteko hitzarmen baten emaitza da, eta euskal erakundeetan indarrean den edo laster aurkeztuko den laguntza multzo baten barruan dago; hartara bada, laguntza horiei esker, enpresa bihur daitezke berritzaileak izanik oraindik abian jarri ez diren ideiak. SPRIren kasuan, ekimen hau Eusko Jaurlaritzako Industria, Merkataritza eta Turismo Sailak sustatzen duen "Euskadi Gizarte Ekintzailea" Planaren barruan kokatzen da.

Proiektu honetan parte hartzen duten erakundeek telebista aukeratu dute, ahalik eta ekintzaile potentzial gehienengana iritsi nahi dutelako, berdin diolarik zein den berauen adina, sexua, egoera ekonomikoa edota maila kulturala. Izan ere, helarazi nahi den mezua da ideia bideragarriak dituzten pertsonei edo pertsona taldeei laguntzak (hain zuzen ere, ideia hori abian jartzeko laguntzak, laguntza finantzarioak, tutoretzakoak, komertzialak, kudeaketakoak, eta abar) eskainiko zaizkiela.

Lehiaketaren mekanika

1. Proiektua saltzea: lehiakide bakoitzak minutu bat izango du bere proiektua defendatzeko eta proiektuaren abantailak, berritasuna, merkatu aukerak eta abar azaltzeko, hau da, proiektuaren alderdirik garrantzitsuenak aurkezteko.
2. Erakustazoka: lehiakideak stand batean saldu beharko die produktua bezeroei. Produktua kalean saltzeko behar dituen materialak eraman ditzake stand horretara.
3. Enpresa krisia: lehiakideak gustura ez dagoen bezero edo langile baten bisita izango du; azken honek krisi egoera bat azalduko dio eta lehiakideak konponbidea bilatu beharko dio.
4. Ekintzailearen testa: A, B edo C motatako erantzunak dituzten galderak, enpresa egoerei eta ekintzaileen gaitasunei buruzkoak.
5. "Enpresaburua banintz": enpresaburu batek bizi izandako gatazka egoera bat planteatuko zaio lehiakideari. Animazio bidez eszenaratuko da eta lehiakideak egoera hori nola gaindituko lukeen azaldu beharko du. Gero, benetako konponbidea aurkeztuko da.
6. Ring: bi lehiakidek hitzez jazartzen diote elkarri. Zati bi daude, lehenengo zatian lehiakide batek besteak aurkezturiko proiektuaren alderdi ahulak bilatuko ditu, eta azken honek bere burua defendatzeko aukera izango du. Bigarren zatian, kontrara izango da, hau da, paperak trukatuko dituzte.
7. Proiektuaren testa: aditu batek bere Enpresa Planari eta planaren bideragarritasunari buruzko galderak egingo dizkio lehiakideari.

SPRIren albistean ez dugu aurkitu nola eman behar den izena.