Bi katalogoren OPAC berriak: Bilgunea eta AUBI

Katalogo bateratua eta Bilgunearen arteko ezberdintasuna

Itxura batera, nahiko berdintsuak dirudite bi katalogo horiek; udal liburutegien katalogo bateratuak eta Euskadiko katalogo kolektiboak, baina ezberdinak dira. Roberto Kerexeta, Liburutegi Zerbitzuko teknikariak Joana Albret posta zerrendan aipatu ditu ezberdintasunak:

• Katalogo bateratua: Katalogo bateratua deiturikoa Kultura Sailak kudeatzen duen lege-gordailua eta Absys programa informatikoa erabiltzen duten ELSNren (Euskadiko Liburutegien Sistema Nazionala) barne dauden hainbat udal liburutegik osatzen duten katalogoa da. 2004ko udaberrian ELSNko 6 udal liburutegi eta lege-gordailua AbsysNET programarekin sarean lan egiten hasi ziren, horrek hainbat abantaila eskaintzen ditu: katalogazio bakarra eta elebiduna, irakurle datu-base bakarra... Proiektuaren xedea da EAEko liburutegi publikoetako funtsetara herritarren sarbidea erraztea eta Internet bidez ere funtsak on line kontsultatzea. Horrez gain, liburutegietako bazkideek (irakurle-zenbakia eta pasahitzaren bidez) aukera izango dute ohiko liburutegitik dokumentuak mailegatzeko, erreserbatzeko edota liburutegiarekin harremanetan jartzeko besteak beste.
• Bilgunea: Bilgunea Euskadiko katalogo kolektiboa litzateke. Bertan hainbat erakunde publiko eta pribatuk -egun 30- parte hartzen dute eta jatorrian katalogoak kudeatzeko programa informatiko desberdinak -Amicus, Dobis-Libis, Loris, Absys- erabili arren, guztiak AbsysNET-eko OPAC -ean bildu eta kontsulta daitezke. Guztira 1.000.000 dokumentu baino gehiago daude kontsultagai eta Bilgunearen xedea hazten joatea da Euskadiko katalogo kolektiboan bihurtu arte.

Katalogoen OPAC -ak oso antzekoak diren arren -biak AbsysNET programarekin eginak daude-, bi katalogoen artean hiru desberdintasun nabarmenduko nituzke:

1.- Katalogo bateratuko katalogoak etengabe eguneratzen diren bitartean - gaur katalogatzen den dokumentua bihar Interneten ikus daiteke-; Bilguneko katalogoak, ostera, urtean zehazteke dauden karga kopuru baten bidez eguneratuko dira, ziurrenik urtean 4 karga izango dira.

2.- Katalogo bateratuan batez ere udal liburutegien katalogoak daude, egun 45 udalerritako liburutegiek parte hartzen dute eta 2005. urtearen amaierarako EAEko liburutegi gehienak bertan egotea aurreikusia dago. Bestetik, Bilgunean goiko erakundeetako katalogoez gain -orain soilik 6 udal liburutegiren katalogoak daude-, beste erakunde publiko eta pribatu batzuetako liburutegien katalogoak ere kontsulta daitezke, besteak beste, EHU, Deustuko Unibertsitatea, Mondragon Unibertsitatea, Sancho el Sabio Fundazioa, Eusko Jaurlaritzako hainbat sailen liburutegiak, Labayru Ikastegia...

3.- Hizkuntza: Katalogo bateratuko liburutegien (2004tik aurrera) katalogazio hizkuntza dokumentuaren hizkuntzaren araberakoa da, hots, dokumentua euskaraz badago euskaraz katalogatuko da baina autoritateak eta gaien sarrerak bi hizkuntzetan, euskaraz eta gaztelaniaz, jasoko dira erabiltzaileek nahi duten hizkuntzan kontsultatu ahal izateko helburuarekin. Aitzitik, Bilguneko katalogoak jatorrian gehienak elebakarrak, gaztelaniaz, dira eta euskaraz kontsultatu ahal izateko, autoritateak eta gai-sarrerak "elebidun bihurtzeko" prozesu informatiko bat igaro behar dute -horrek dituen mugekin-. Bestalde, deskribapen bibliografikoa kasu gehienetan soilik gaztelaniaz dago.

AUBI: autoritate eta gai-sarreren katalogoa

Eusko Jaurlaritzako Kultura Sailak bultzatutako autoritate eta gai-sarreren katalogo elebiduna da, euskaraz eta gaztelaniaz. AUBIren xedea da euskal eremuko autoritateak sortzeari dagokionean EAEko liburutegintzako erreferentzia izatea; eta, aldi berean, baita gainerako kultur eragileentzako baliagarri ere. Katalogo honekin lortu nahi da euskal autore guztiak identifikatzaile bakarrarekin agertzea edozein liburutegitako katalogotan.

Joana Albret posta zerrendan izan genuen joan den astean aurkezpen horien berri.