UEMAk "lurgune euskaldunenaren" mapa eta ofizialtze bat eskatzen du

Dokumentuak berak azpimarratzen duenez, "UEMAk bere sorreratik erabili izan du 'lurgune euskalduna' terminoa, gehienetan udalerri euskaldunen eremuari buruz aritzeko. Dokumentu honetan, ordea, adiera zabalagoa eta oraingoz zehaztu gabekoagoa emango diogu terminoari. Lurgune euskaldunak arnasgune guztiak bilduko lituzke, eta baita udalerri euskaldun guztiak ere. Baliteke, ordea, horiez gain, beste udalerri batzuk ere barnebiltzea lurgune euskaldunak. Lurgune hori zehaztea, zein eskualde eta udalerrik osatzen duten, alegia, orain hasten dugun prozesuan landu eta adostu beharreko alderdi garrantzitsuetako bat".

Estrategia bost irizpidetan zentratu du UEMAk. Hona lehen biak:

• Euskararen lurralde eremu guztietan eragin behar da, ahalegina indartuz eta toki guztietan estrategia egokiak garatuz.
• Eremu bakoitzaren errealitate soziolinguistikoari egokitutako politikak abiarazi behar dira.

Eta ondoren datoz lurgune euskaldunenari erreferentziak:

• Lurgune euskaldunenari motor eta lidergo rola aitortu behar zaio, euskara irradiatzen baitu gainerakoetara.
• Arreta berezia eskaini behar zaio lurgune euskaldunenari, bereziki arnasguneei, eta legez babestu behar dira, zabaltzeko eta sendotzeko.
• Lurgune euskaldunena gainerako eremuen euskalduntzerako eta euskararen indarberritzerako baliabide estrategikoa bihurtu behar da.

Hortaz, lurgune euskaldunena "babes eta sustapen bereziko eremu bat" izatea eskatzen du UEMAk.  "Eremu horrek lurgune euskalduna zehaztu beharko luke lehenik, bilatuz epe ertain-luzera euskara nagusi izango den lurralde geografikoki jarraitu, demografikoki ohargarri eta soziolinguistikoki sendoa eraikitzea. "

Estrategia dokumentuak eta haren atalekin sortu duten azpiwebgunean mapa aipatzen da, baina atala testuala da oraingoz. Eremu hori legez zehaztea komeni dela uste du UEMAk, eta dio aukera bat litzatekeela "lurralde osoa bere baitan hartuko lukeen legezko eremu-sailkapen linguistiko bat lantzea".

Eta tira, lurgune euskaldunenean eragiteko hiru norabide ere proposatu ditu UEMAk Lurralde Estrategia hobnetan:

• Politika integraletara jauzia: demografia, ekonomia, harrera, lurralde antolaketa eta komunitatearen jasangarritasuna hizkuntza ikuspegitik lantzea.
• Hizkuntza politika aurreratuak hezkuntzan, kulturan, hedabideetan, aisian eta helduen euskalduntzean, errealitate soziolinguistikoari egokituta.
• Hiztunen ahalduntzea eta kontzientzia linguistikoa indartzea, arnasguneetan eta udalerri euskaldunetan komunitate sendoak eta konprometituak bermatzeko.

Dokumentu eta hausnarketa interesgarri hau hemen duzue.