Teknologia albisteak
5

GPS antena jarriko dute gure herrian

Erabiltzailearen aurpegia
Iban Arantzabal - Elgeta
2004-11-19 : 09:11

Zertarako behar luke gurea moduko herri txiki batek GPS bat? Azkenean, herriko zein inguruko datuak zehatzago jasotzeko balio du. Zehatz bota ahal izango da bonba bat Intxortan, edo zu bizi zaren etxean, hala gura izanez gero :-) Donostian badago bat, eta beste bi jarri gura dituzte: bata, Lazkaon; bestea, Elgetan.

GPS sistema amerikarrek asmatu zuten, bonbak botatzeko puntuak hobeto definitzeko. Berez, sistema militarra da eta zehaztapen txikiagoarekin erabilpen zibila ere izan du, eta izan gura du.

Zehaztasuna, baina nahita egindako erroreekin

Kontua da amerikarren kontrakoak ere erabili zezaketela, beraien misilak jaurtitzeko, eta horregatik sateliteek ez dute posizio zehatza ematen. Beti errore bat gehitzen zaio informazioari, nahita, baina errore aldakorra, batzutan gehiago eta bestetan gutxiago. Horrela, zehaztasuna guztiz galtzen da. (Noski, amerikarrek errore gabe erabili dute Bagdaden)

GPS-aren erabilera

Gauza oso zehatzetarako erabiltzen da, besteak beste, eraikinak neurtzeko edo espaloi baten puntu zehatza finkatzeko, lurren mugak non dauden ikusteko, iturriak koordenadetan sartuta eukitzeko... Beste hamaika aplikazio ere baditu. Gehienetan, hala ere, lan topografikoetan erabiltzen da.

Gipuzkoan izango diren hiru antenekin, GPS-aren prezisioa zentimetro baten ingurukoa izan daitekeela ziurtatu berri digu Aldundiko Mikel Elortzak. Ez da misila Intxorta mendian botatzea bakarrik, kafea edaten duzun tabernan ere bota dezakete, kafea edaten duzun kikaran ia-ia.

Errore horrekin zaila da prezisio hori izatea, beraz:

Irtenbidea asmatu du Foru Aldundiak: Hiru toki jakinetan: Lazkao, Donostia eta Elgeta antenak jarri. Antena satelitearekin lotzerakoan, GPS fijo horrek momentu bakoitzean dagoen errorearen berri ematen du irrati bidez. Orduan, Bergaran obra bat neurtzen ari direnek lehenengo satelitearen datuak jaso, eta gero Elgetako GPS-aren informazioa jasoko dute, jakiteko zein den errorea momentu eta toki horretan. Azkenean trigonometria bidez lortzen da zehaztazuna.

Eta erabilera?

Pentsa, adibidez mendira zoazela. Mapa eraman dezakezu eta Ibilbideak sortu, eskuko GPS-rako koordenatuak jasoz. Honen berri Gari Araolazak eman zigun Sustatun eta aipatu zuen Gipuzkoako Aldundiak duen erreminta, b5m.gipuzkoa.net : distantziak kalkulatzeko, lurren azalerak, eraikinen kokapenak, puntu kilometriko zehatzak…

Lehen Aldundiaren jauregian zuten GPS-a era aldatuko dute. 1997koa zen Donostiakoa eta orain Elgetako eta Lazkaokoarekin osatua egongo da Gipuzkoako antenen beharra. zehatzago egin ahal izango dira neurketak. Konkurtsora atera dute lana, abendu edo urtarrilerako sistemen martxan egon dadin. Horra zertarako jarri behar duten GPSa gure herrian.

Erantzunak

mikel irizar
2004-11-19 : 19:15

GPSa etzakiat, baina antena bera ezin duk aprobetxatu erabilera zibiletarako, hala nola, GOITBko seinalea hobeto jasotzeko?

Iban Arantzabal
2004-11-19 : 20:59

> GPSa etzakiat, baina antena bera ezin duk aprobetxatu erabilera zibiletarako, hala nola, GOITBko seinalea hobeto jasotzeko?



--- Ez jakixat, ez juat horrenbeste entenditzen, baina edarra litzateke. GOITB-k ikusle asko jakazak Elgetan eta seinalia ez dok TVE1-ek daukanan modukua... Eta kuriosua dok, baina Bilbo telebista ikusten juau GOITB baino hobeto, sarrittan. Hau dok hau! Ez deixela iñok txisterik etara hortik, baiña e? :-)

Jabier Santamaria, Bergaran beharrean dabilen etorkin Bizkaitar bat
2004-11-20 : 02:09

> --- Eta kuriosua dok, baina Bilbo telebista ikusten juau GOITB baino hobeto, sarrittan. Hau dok hau! Ez deixela iñok txisterik etara hortik, baiña e? :-)
>


Norbaitek atera beharko luke txistea eta bizkaitar bat (ez bilbotar) izan beharko.


Aldiz, nire herrian, Urtuella, ez dugu Bilbo telebista ondo ikusten. Egia esateko hobe horrela, ikusteko dagoena ez du komentariorik merezi.


Agian Elgeta, webgune poliglota eta tourisM bulegoa duen herri modernoa ;-D, eta bere GPS antenari esker Bizkaiko Meatzaldean GOITB ikusiko dugu. Duda barik aukera hau interesgarriago izango litzateke.


Beste kolonizazio prozesua ote?


Gora Meatzaldeko harrizulatzaileak


http://www.harrizulatzaileak.net


Iban Arantzabal
2004-11-24 : 10:53

> Agian Elgeta, webgune poliglota eta tourisM bulegoa duen herri modernoa ;-D, eta bere GPS antenari esker Bizkaiko Meatzaldean GOITB ikusiko dugu. Duda barik aukera hau interesgarriago izango litzateke.





-------- Ez legoke gaizki... Guregatik... Eta Euskaltelek gauza bera esango balu, ba ikusiko litzateke Meatzaldean ere. Uhinez zein kablez hedatzen dugu seinalea... Baina zertarako GOITB Meatzaldean? guk harrijasotzaileen saioak emititzen ditugu, ez harrizulatzaileenak ;-)

Patxi Lurra
2004-11-24 : 17:31

Harrizulatzaileen web gune polita bisitau dot. Foroan irakurri dot euskarazteko asmoa zeukatela (aurtongo otsailean). Nozko?



Erakunde publikoei exijitzen deutseguna nork bere buruari be eskatu behar deutsa, ezta?



Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago