Aurki eta Berria euskal webgunerik aipatuenak
Apirila eta ekainaren bitartean EAEko familietan Informazioaren gizarteari buruzko inkestan lortutako datu batzuk kaleratu ditu EUSTAT-ek. EAEko biztanlegoaren arabera, orokorrean webgune aipatuenak Google eta Correo dira. Webgune euskaldunen artean Aurki eta Berria dira lehenak.
Bilatzaile eta atariak: Google lehena zalantzarik gabe. Aurki 14. postuan.
Eustat-en datuen arabera hamar internautetatik bederatzik GOOGLE erabiltzen dute bilatzaile gisa. Hurrutira, Yahoo eta Terra datoz.
Aipamenetan, lehen euskal bilatzaile eta atari elebakar moduan Aurki.com ageri da, 14. postuan, duela urtebeteko postuan baina goranzko joera txiki bat erakutsiz.
Webak: El Correo eta Hotmail nagusi dira EAEn. Berria 31. postuan.
Bilatzaile eta atariak aparte, 15 urte eta gehiagoko Interneteko biztanleria erabiltzailearen aipamenen arabera web erabilienak El correo eta Hotmail dira .
Hurrengo postuetan Diario Vasco, Euskadi.Net, EHU, Marca, BBK eta Kutxa ageri dira.
Aipamenetan, lehen web euskal elebakarra bezala Berria.info ageri da, 31. postuan. Lehen aldiz ageri da zerrenda honetan.
Aipamen bitxiak
Dena dela, oso kuriosoa da zerrenda horretan EAE-an gehien aipatzen diren 50 weben artean Cadiz.com bezalako webgune familiarra edo desagertutako beste batzuk (Navegalia.com, esate baterako) aurkitzea.
Informazioaren gizarteari buruzko inkestaren datu eta aipamen gehiago Eustat-en webgunean
Gaztetxoen artean erabilera ludiko asko eta posta elektroniko gutxi.
Eustat-en prentsa oharrak dioenez, 6 urtetik 14ra bitarteko adingabeen hamarretik bederatzik jada ordenagailua erabiltzen du eta %38,2 internautak dira.
Adingabeek gehienbat jolasetarako (%95) erabili dute ordenagailua, baina testu prozesagailua ere askok (%56) erabili dute. %11,4k CD-ROMak edo DVDak kopiatzeko erabili du PCa eta erabilera hau 15 urte edo gehiagokoen artean ehunekoa %42,5era iritsi da.
Azken hiru hiletan, 8 adingabetik 7k (%86,9) ordenagailua ikastetxean erabili du eta zerbait gutxiagok, %77,1ek, etxean.
Internauta adingabeen lautik hiruk liburutegiak eta bestelako dokumentazio-zentroak bisitatu ditu, %59k hedabideak (%68,7k, 15 urte edo gehiagokoen artean) eta %55,8k aisialdirako WEBak.
TXATen erabilera ere nabaria da, ia erdiak erabili du, eta 15 urte eta gehiagoko biztanleriak %34,8.
Alderantziz gertatu da posta elektronikoarekin: %36,7k erabili du eta aztertutako gainerako biztanleriak %80.
Erantzunak
Eustat-ek egindako inkestatik (2004ko II. hiruhilekoan) argitaratu diren datuen arabera (gorago aipatu diren atari eta bilatzaileak eta webak ), ez dirudi Sustaturen aipamenik dagoenik inkestatuen artean.
Euskarazko web elebakar guztien artean, soilik Aurki eta Berria izan dira aipatuak.
Beste batzuk aipatuak izan badira, rankingean eta tauletan ageri direnak baino beherago lirateke eta, normala denez, Eustatek ez ditu ezagutzera eman.
Eustateko Informazioaren Gizarteari buruzko - ESI inkesta
Eustat-ek inkestak egiten ditu, ez da bisiten kontaketa zehatza.
Sustatun Informazioaren Gizarteari buruzko Inkesta-IGI-Familiak inkestako datuak aipatu dira eta loturak eman dira. Inkestari dagokion metodologia jakin bat dago.
Laburbilduz:
IGI laginketa bidezko inkesta bat da, EAEko 15 urte eta gehiagoko biztanleriari buruzkoa.
Oinarritzat, hiruhileko berean Biztanleria Jardueraren Arabera sailkatzeko Inkesta-BJArako hautatutako 3.750 familia-etxebizitzako panela hartzen da. Etxebizitza bakoitzeko, lehen pertsona bat hautatzen da eta, bereziki, ikasle eta landunen kuota jakin batzuk, eta 5.000 pertsona inguruko lagin bat osatzen da.
Hautatze-irizpidea Kish-en taula batean oinarritzen da. Koordenada nagusi gisa, pertsona-zenbakia eta aste-zenbakia erabiltzen dira.
Hautatutako pertsonen multzoak (bat etxebizitza bakoitzeko gehi ikasle eta landunen kuotak) osatzen du IGIren lagina. Elkarrizketa galdesorta berariazko baten bidez egiten da.
Galdesortak ez dakartza pertsona inkestatuen ezaugarri soziodemografikoak; izan ere, informazio hori aurretik BJAren datu-basean dago (aldi berari buruzkoa), eta datuen ustiapena egin aurretik sartzen da.
Cybereuskadi eta Alexan oinarritutako datuak
Aurrerago aipatu genuen Cybereuskadî eta Alexaren araberako datuak: Sustatu da webgune euskaldunik bisitatuena, Alexaren esanetan artikuluan.
Oraindik ez da berritu, bere balioa eta mugak dituen Cybereuskadiko ranking-a . Apirileko datuen arabera, webgune euskaldun elebakarren artean, bisitatuena Sustatu zen.
eta sustatu.com, zein postutan dago?