Teknologia albisteak
6

E-posta konfirmazioa ezinbestekoa izango da aurrerantzean Sustatun

Erabiltzailearen aurpegia
Sustatu - Sustatu
2004-10-15 : 11:10

Gaurtik aurrera, bidalketetan e-posta konfirmatu egin beharko da, Sustatun mezurik argitaratzeko. Kontrol neurri serioa dirudi, baina serioagoa da motibazioa: irainak, epaitegiko zitazioak, Sustaturen jarduna zapuzteko arriskua...

Hasieratik izan du Sustatuk, mezuak kargatzeko orduan, honako oharra e-posta sartzeko eremuan: (E-posta helbidea ez da publikatuko. Konfirmazioetarako bakarrik). Gaurtik aurrera, e-posta helbidea ez da publikatuko baina konfirmazio hori efektiboa izango da. Sustatura bidalitako erantzun edo artikulu bakoitza benetako e-posta helbide batekin identifikatuta geratuko da, prozedura automatiko batekin. Honela, alegia:

  • Bidaltzaileak e-posta helbide bat emango du alor horretan. E-postarik eman ezean, ezingo da mezurik kargatu.
  • Emandako e-posta helbidera mezu bat bidaliko du sistemak automatikoki. Jasotzaileak, mezu horretako instrukzioei jarraituz, bi aukera izango ditu, konfirmatu ala ezeztatu. Normalean, e-posta benetakoa izan bada, bidaltzaileak bere mezu propioa baieztatu ahal izango du. Norbaitek beste pertsona baten e-posta eman badu, tranpa egiteko, jasotzaileak berak idatzi ez duen mezu bat topatuko du, eta hura berea ez dela esateko aukera izango du.
  • Konfirmazioaren ondoren, mezu orijinala bada, artikulu orijinalekin orain gertatzen den bezala, edizio-taldeak onartzeko zain geratuko da. Erantzuna baldin bada mezua, automatikoki argitaratuko da.

Zergatik neurri hau?

Sustatun parte hartzen duen gehiengoaren jokaera jatorra eta aportatzailea izan bada ere, zenbaitek, anonimotasunataz baliatuz, mezuak bidaltzeko pertsonalitate faltsuak erabili edo mezu iraingarriak argitaratu dituzte. Azken boladan, Sustaturen bisita kopurua gehitzearekin batera, joera horiek areagotu egin dira.

Erantsitako idatzian ikus dezakezuen bezala Sustatun agertutako mezu jakin baten ondorioz, eta partikular batek jarritako salaketari jarraituz, Durangoko Epaitegiak ikerketa judizial bati ekin dio, eta eskabide bat zuzendu dio Sustaturi, gaztelania hutsez.

Ikusi ditugun mezu iraingarri guztiak ezabatzen saiatu gara, baina Sustatun errespetua eta jardun irekia bermatzeko e-postazko konfirmazioa ezartzea ezinbesteko neurria dela iruditzen zaigu. Kontrol neurri hau bezala, aurrerantzean ere Sustatuk beharrezko irizten dituen beste batzuk ere hartuko ditu, bere jarduna ziurtatzeko.

Kontrol neurri hauek zorrotzak dira. Desegokiak irudituko zaizkie batzuei. Kudeaketa-irizpide hoberik baldin badauka inork, Interneten bertan froga ditzake: foro, weblog, eztabaidagune, posta-zerrenda eta abarren sorkuntza erraza da gaur egunean. Sustaturenak baino irizpide hobeekin sortzen diren foroak ongi etorriak izango dira: Interneteko euskal esparruak toki gehiago behar ditu, ez gutxiago.

Erantzunak

Anonimoa
2004-10-15 : 14:33

Uste dut ez duela ezertarako balio. Horrekin benetako eposta bat dela jakin daiteke bakarrik baina norena den jakitea lehen bezain zaila (edo erraza) da. Azkenean IP konexio iturri eta abar aztertu beharko lirateke arazoak izan eta berriz ere epaitekietatik antzeko eskariren bat jasoz gero. Izan ere zein erraz den helbde elektroniko berriak doain eta anonimotasunean sortzea.



> - Konfirmazioaren ondoren, mezu orijinala bada, artikulu orijinalekin orain gertatzen den bezala, edizio-taldeak onartzeko zain geratuko da. Erantzuna baldin bada mezua, automatikoki argitaratuko da.



Nik anonimoa izaten jarraituko dut. Nire izenarekin artikulu nagusi bat idazten saiatu nintzen baina bat ere ados ez negoen irispide batzuen ondorioz artikulu hori ez zen argitaratu. Ez zen sustatun agertzen diren beste asko baino kritikoagoa, irainik inondik ere ez, eta jorratzen zen gaia baina polemiko/politiko/arriskutsuagoak jorratzen dira sustatun. Ikuspegia ere ez zen sustaturen lerro editoriala (horrelakorik izango balu ere) mozten duena.

Bestalde interesgarria litzateke epaitegietara eramana izan den mezua zein den jakitera, sustatun parte hartzen dugunok justiziak gure adierazpen askatasunaren muga non jartzen duen jakiteko.

Sustatu
2004-10-15 : 19:39

Gure ustetan, zeozertarako balio dute.


Zure izena emateko, anonimoa izaten jarraitzeko edo seudonimo batekin idazteko eskubide osoa
duzu, zure erabakia da, zuk ikusi eztabaida aberastu edo oztopatu egiten duen.


Ez dugu esan zure benetako izen eta abizenarekin
publikatu behar duzunik. Bakarrik e-postazko konfirmazioa behar dela
argitaratzeko.


Duela gutxi aipatu ziren
arrazoiengatik

bidalitako albiste guztiak ez dira publikatzen, aukeraketa bat egiten da. Irizpide eta arau batzuk daude.


Bestalde, epaitegietara eramana izan den mezua ezin dugu publikoa egin.
Baina jakin ezazu justizia norbaitek jarritako salaketaren ondoren ipini
dela martxan, ez beraz "justiziak adierazpen askatasunaren muga" nonbaiten
jarri duelako.


Ez du "Justiziak", epaitegietako makinariak, salatu Sustatu, baizik eta
Sustatu irakurri duen partikular batek.


Mila esker jarraipena eta parte hartzeagatik.


Txopi
2004-10-18 : 01:31

> Bestalde, epaitegietara eramana izan den mezua

> ezin dugu publikoa egin.



Ezin duzuela? Ez dut uste... publikoa ez egitea erabaki duzuela esan eta listo.



Imaginatuko duzuenez, ez nago ados jada publikoa den informazio hori zein den ez esateagatik. Hori jakinda agian erabiltzailearen identitatea salatzeagatik kritikak jasoko zenituzkete, baina noski datu hori ezkutatuz hori ezinezkoa da.



Bestalde, argi dago baieztapen mezuaren kontua etorkizunean poliziari informazio hori eman ahal izateko dela. Interneteko zein forotan egiten da hori?



Badakit egiten duzuen lan guztia borondate onarekin egiten duzuela, eta eskertzen da Sustatu bezalako webgune bat egotea ezer ez egotea baino. Baina daramazuen bidea ikusita beste Sustatu bat gero eta beharrezkoagoa ikusten dut... Zuek diozuen bezala beste euskal foro bat sortu beharko da (edo dagoen bat bultzatu), daramazuen bidetik aldenduko ez zaretela guztiz erabakita duzuela ikusten da eta.



Zuek jarraitu horrela, nahi duzuen moduan jokatzeko eskubide osoa duzue eta. Baina jakintzazue Sustatuko irakurleok ez garela inozoak.

Luistxo
2004-10-18 : 11:42

> Bestalde, argi dago baieztapen mezuaren kontua etorkizunean poliziari informazio hori eman ahal izateko dela. Interneteko zein forotan egiten da hori?
>


Vilaweb-eko foroetan, Loquo-ko mezu pertsonalen komunitatean... Kataluniako Interneteko ekimen sendo batzuen adibide pare bat aipatzeagatik.


> Badakit egiten duzuen lan guztia borondate onarekin egiten duzuela, eta eskertzen da Sustatu bezalako webgune bat egotea ezer ez egotea baino. Baina daramazuen bidea ikusita beste Sustatu bat gero eta beharrezkoagoa ikusten dut... Zuek diozuen bezala beste euskal foro bat sortu beharko da


Beraz, ados, Txopi eta Sustatu: foro gehiago behar dira. Bereziki, Sustaturenak baino irizpide hobeak dituen foroak behar dira, Sustaturenak okerrak badira. Beraz, animo.


Gari Araolaza
2004-10-18 : 12:02

Bestalde, argi dago baieztapen mezuaren kontua etorkizunean poliziari informazio hori eman ahal izateko dela. Interneteko zein forotan egiten da hori?


Zuk horrela ulertzen baduzu sentitzen dut. Guk nahi duguna da, norbera izatea norberak esandako gauzen erantzule. Sustatuk ezin du inolaz ere besteek esandako astakerien erantzule izan.


Luistxok azaldu dizu zein forotan egiten diren horrelako gauzak. Gainera, guk aproba egin dugu dena librean jarrita, eta emaitza gure aurka etorri da. Hasieratik moderatua izango balitz orain ez luke inork ezer esango. Bost puxtarri Sustaturentzat.


Ina
2004-10-19 : 15:13

<vilaweb.com> edo <Loquo.com> webetan bezala Interneteko beste foro askotan eskatzen da e-postazko konfirmazioa.



Ez hori bakarrik, foro batzuetan zenbait gauzei buruz mezuak argitaratzeko izena, abizena eta NAN zenbakia eskatzen dute.



"se utilizará el foro Off-Topic o aquel que guarde una mayor relación con dicho tema y obligatoriamente el autor deberá publicar su nombre, apellidos y DNI" (Software Libreko PHP-Nuke foroen arauetatik, adibidez)



Abusuengatik foroak itxi egiten direla ikusita (Errealekoa, adibidez), ez zait iruditzen hain arraroa PHP-Nukek, vilawebek, loquok edo Sustatuk hartu duten erabakia.



Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago