GOIENKARIAK 18.185 aleko difusioa dauka OJDren arabera
GOIENKARIA, Debagoieneko astekaria, OJD erakundeak ikuskatzen du. OJD erakundeak idatzizko eta Interneteko hedabideen tirada eta difusioa zenbatu eta kontrolatzen ditu.
Gaur egun, 835 idatzizko hedabideren tirada (inprimatzen diren aleak) eta difusioa (benetan saldu edo banatzen direnak) kontrolatzen ditu erakunde honek.
Horretaz gain, 134 hedabide elektronikoren trafikoa (ikusitako orriak eta bisitak) ere kontrolatzen du.
Espainiar Estatuko eta Euskal Herriko egunkari eta aldizkari nagusiak daude OJD erakundearen kontrolpean.
Ordainduzko zein doaneko idatzizko hedabideak kontrolatzen ditu: interes orokorrekoak, tematikoak, profesionalei edo publiko konkretuari zuzenduak
Batik bat iragarle, publizitate agentzia edota editoreen artean hedabideen tirada, difusioa eta banaketaren gaineko informazioa zabaltzea da OJD erakundearen egin beharra.
Goienkariaren ezaugarriak
- Debagoieneko 9 herritan banatzen da (Aramaio barne), ostiraletan, euskara hutsez.
- Edizio komun bat eta beste hiru edizio ditu (Arrasate Press, Berrigara eta Aretxagazeta). 7 herri aldizkari batzen dira bertan.
- Ibarreko euskara elkarteek sortutako Goiena multimedia enpresak kudeatzen du Goienkaria.
- Astelehenetan ere, iazko abendutik, badago 32 orriko agerkaria, Asteleheneko Goienkaria. Batik bat, asteburuan gertatutako ekitaldien errepaso sakona egiten duena. Harpidetza bidez jaso daiteke.
OJD erakundeak egindako azterketaren arabera, GOIENKARIA astekariak batez beste 18.228 aleko tirada eta 18.185 aleko difusioa dauka.
GOIENKARIA da OJD erakundeak ikuskatzen duen lehenengo euskarazko tokiko aldizkaria.
Erantzunak
- Difusión gratuita: Cifra total de ejemplares que son enviados de forma gratuita por el editor a destinatario identificable.
- Distribución gratuita: Cifra total de ejemplares que situados en lugares establecidos se ponen a disposición de un público indeterminado de forma gratuita.
Euskaraz ez dakit nola eman behar diren
Tirada: Idatzizko hedabideetan, inprimatzen diren aleak.
Difusioa: Hartzaile konkretu batengana (erosle, harpidedun�) heltzen diren aleak.
Audientzia: Irakurle kopurua. Jeneralean esan ohi da harpidedun edo erosle kopurua bider hiru eginda kalkulatzen dela.
Hau dena ulertzeko adibidea: Demagun egunkari bat daukagula eta 20.000 ale inprimatzen ditugula errotatiban. Hori izango litzateke Tirada. Gero egongo litzateke Distribuzioa, hau da, errotatiban bota ditugun 20.000 ale horietatik salmenta tokietara bidali ditugu 20.000 guztiak edo 19.000. Eta, gero, egongo litzateke Difusioa, hau da, salmenta tokietara bidali ditugun aleetatik saldu direnak, esate baterako 17.000. Eta gero egongo litzateke Audientzia edo irakurle kopurua: 17.000 bider 3, hau da, 51.000.
Distribucion gratuita: Metro eta horrelako doaneko egunkariek egiten dutena. Uzten dituzte aleak metroan, baina horrek ez du ziurtatzen han utzitako guztiak norbaitek hartu dituenik.
Difusion gratuita: Hartzailearen eskura heltzen diren aleak izango lirateke, GOIENKARIAk egiten duena: harpidedunen izen eta abizenekin, etxez etxe doan banatu.
GOIENKARIAren kasuan, Tirada eta Difusioa kopuru antzekoak dira, ze errotatiban botatzen dira 18.228 (Tirada) eta, doan, harpidetza bidez etxez etxe banatzen denez, errotatiban botatzen diren ia guztiak banatzen dira: 18.185 (Difusioa). Eta, irakurle kopurua izango litzateke: 18.185 x 3 = 54.555.
Edozelan ere, azken datu hau ez da oso zientifikoa.
Hedabideen irakurle kopurua edo audientziak neurtzen dituzten erakundeak badira: CIES, EGM... Horiek egiten dituzte irakurleen edo ikus-entzuleen gaineko neurketa fidagarriagoak.
> GOIENKARIA astekariak batez beste 18.228 aleko tirada eta 18.185 aleko difusioa dauka.
>
Barkatu, ez dut ulertzen(!?)
Ez al dira ale bakoitzeko hiru irakurle zenbatzen difusioa kalkulatzeko?