Irakeko erresistentzia sarean: egia ala gezurra?
Irakeko erresistentziak gauzak Interneten argitaratzen dituela esaten digute hedabideek... Baina egia ote? Foro batzuetara baten batzuek komunikatuak bidaltzen dituztela ematen du, behintzat.
Azken aldi honetan behin eta berriro entzuten dugu hedabideetan. Irakeko honako bahiketaren bideoa, edo Saudi Arabiako Al-Qaedako zelula baten erreibindikazioa Internet bidez zabaldu dutela.
Baina nola da posible? Al-Qaeda edo Al-Zarkawi edo dena delakoak ez daukate webgune ofizialik. Ezin dute izan. Non agertzen dira gauza horiek? Ala hedabideen topiko erdi-asmatua besterik ez da kontu hau?
Gaur, azkenean, berriz ere aurkitu dut aipamen hau, baina behingoagatik, URL bat aipatzen da! Fernando Iturribarria kazetariak Paristik Vocentorako egindako kronika batean topatu dut. Dioenez, Iraken bahitutako kazetari frantsesak askatzeko plazaratutako baldintza berriak webgune honetara bidali dituzte: http://www.islamic-minbar.com/
Sartu naiz eta, hara!, intro orri bat (haiek ere!!!). Ondoren, bulletin board erako foro bat, arabiera hutsez, PHP-rekin egina (software librea). Erreibindikazioa non ote dagoen zehazki, ez dakit, ez baitakit arabieraz. Bideoak-eta (buruz mozketak eta horiek) toki honetan bertan argitaratzeko ohitura ote daukaten ere ez. Hori bai, ez da dena gatazka armatua. Hari honetan, komandante txetxeniar wahabita itxura duen batek Windows XP birusengandik askatzeko aholkuak ematen ditu, urratsez urrats eta pantaila-irudi didaktikoekin lagunduta.
Erantzunak
Telecincoko teleberri batean ikusi dut gaur. Atzo Indonesian izandako eraso suizida Jemaa al Islamiya edo horrelako talderen batek erreibindikatu duela, bere webgunean. Eta erakutsi dituzte islamic-minbar webgune horretako bertako irudiak, sasiko hiltzaile talde baten Interneteko gune irekia balitz bezala, jendeak birusen arriskuak komentatzeko darabilen hori...
TVE1ko telediarioan ere ikusi dut web bereko irudi sorta, baina han esan dutena da erreibindikazioa azaldu dela hor.
/cache/Udako-Ola-2024_1_small_content.jpeg)
Askotan gauza bera pentsatu dut nik, "ez dakit zer taldek ez dakit zer aldarrikatu du Internet-en, bere webgunean", baina gero URLrik ez eta bilatuz gero ere ezer ez. Bistan da hainbat alditan aipatzen diren talde horiek webgunerik ez dutela.
Lehengoan aipatu nuen Internet gauza ilunak gertatzen diren leku moduan ohiko komunikabideetatik islatzen zaigun irudiari lotuta dago kontu hau. Erreferentzia nahasi eta zehazgabeekin dena konponduta dago: "Interneten gertatu da hori, Interneten esan dute bestea". Eta telebistan Interneten argitaratutako kontu bat edo webgune berri bat aipatzean zenbat kostatzen zaien URL bat ematea!
Hori bai, buru mozketak eta horrelako snuff material piloa dago eMulen, amerikarrek zentsuragatik telebistan ikusi ezin izan dituzten irudi zenbaitekin batera.