Bill Gatesek blogak goraipatu ditu

Sekula ez da berandu Microsoft enpresa erraldoiarentzat. Orain arte apenas egin dio kasu blogintzari. Orain, ostera, arrisku eta aukera moduan ikusten duenean, estrategia berrien jopuntuan jarri du bloga.

Iragan ostegunean gertatu zen, Microsoften egoitza nagusian, Redmond hirian. Urtero bezala, Bill Gatesek gonbidatu zituen zenbait multinazionaletako lehendakariak, jardunaldi batzuetara. Eta hantxe esan zien blogintzak erraztu egiten duela komunikazioa enpresan. Azaldu egin zien gero nola egiten duten lan blogek, eta iradoki zien blogak erabil daitezkeela bezeroekin komunikatzeko.

Reuters albiste agentziaren iritziz, orain arte Microsofteko inork ez du hain luze eta zabal hitz egin blogen gainean. Gatesen hitzetan, “blogek gainditu egiten dituzte e-postaren eta webguneen eragozpen asko eta asko”.

Mehatxua Windowsentzat

Hori horrela da, neurri handi batean, RSS (Real Simple Syndication) teknologiari esker. Berau erabilita, irakurleak jarraipena egin diezaioke albiste argitaratu berriari, bila ibili beharrik gabe webgune batetik bestera nabigatzen. Horren ordez, gero eta jende gehiago ari da harpidetza egiten Bloglines bezalako zerbitzuetan, hauek aukera ematen diote-eta, pantailaz aldatu barik, errepasoa emateko norberak aukeratutako hedabide elektronikoei, beti ere webgune horiek RSS, RDF edo XML baldin badute, noski, Gari Araolazak Sustatun azaldu zuen moduan.

Joe Wilcox analistaren iritziz, Microsoft konturatu da blogen atzean sekulako mehatxua egon daitekeela Windows sistema eragilearentzat. Izan ere, blog gehienek, eta hauek erabiltzeko erremintek, lan egin dezakete Windows barik, eta hori dela eta, jende asko urruntzen has daiteke Microsoften eraginpetik.

“Microsoft banaiz, eta nire helbururik behinena baldin bada Windowsen kopia gehiago saltzea —dio Wilcoxek—, orduan argi dago buru-belarri sartu behar naizela fenomeno horretan”. Are eta gehiago, ikusirik Googlek aspalditxotik sartu zuela muturra blogintzan, 2003an Blogger erosi zuenetik.

Hiztegi txiki bat, blogak hobeto ulertzeko

Weblogak edo blogak ugaltzen ari dira, perretxikoak bezala. Euskaraz ere baditugu hainbat, Sustatu hau bezala, Goiena.net, eskualde albistaria, Sarean.com Jabi Zabalarena edo Ingelesen hilerria Luistxo Fernandezen blog pertsonala.

Blogekin batera, terminologia berria hedatzen ari da, batez ere ingelesez. Hona hemen zenbait adibide:

• Blog. Webloga edo bloga gauza bera dira. Bitakora kaieren antzekoak. Batzuetan, Sustatun bezala, albisteak eskaintzen ditu. Beste batzuetan, aldiz, egunerokoak idazteko balio dute. Artikulu gehienek loturak eskaintzen dituzte Interneteko beste webgune batzuekin, eta honek beste modu bat sortzen du albistea irakurtzeko. Jeneralean, gainera, albiste edo artikulu berrienak goiko aldean eskegitzen dira, eta aukera ematen dute erantzuteko, edo iruzkinak egiteko. Kazetaritza modu berria sortu da blogen inguruan, orain artekoa baino askoz ere dinamikoagoa eta irekiagoa.
• Blogger. Blogegilea. Jeneralean kazetariak edo erreportariak izaten dira, eta horiek askotan freelancer moduan ibiltzen dira. Baina izan daitezke herritar arruntak, idazteko grina bai, baina lotsarik ez dutenak. Jabi Zabala edo Salam Pax, esate baterako, blogegileak dira.
• Bloggerville. Blogegileen hiria, norbera mundu honetan sartzen denean aurkitzen duen jendea, giroa eta produktuak.
• Blogging. Blogak egitea, blogintza. Edozeinek egin lezake, etxetik, frontetik edo hotel batetik. Horretarako software berezi bat beharko du, ostatu bat bloga ezartzeko eta lotura seguru bat Internetekin.
• Blogosphere. Bloggerville hitzaren zentzu berdina du, nahiz eta blogosferak zabalagoa ematen duen.
• Photoblogging. Argazkiak ateratzea, blogean argitaratzeko.
• Warblog. Gerrako bloga. Blog bereziak dira, gai bakarra-ia gerra dutelako. Izan daitezke pertsonalak edo taldetan eginak.