Enpresan euskaraz: euskaraz idazteko software lagungarria

Zorionak, egin duzuen lanagatik! Izan ere, premia handia zegoen enpresa munduan egindako lana sistematizatu eta erabiltzaileen esku jartzeko.

> Elhuyar Aholkularitzak intraneterako softwarea aurkeztu du. Software honen egitekoa euskaraz idatzi nahi duenari gune bakar batean hainbat laguntza eskura jartzea da. CD formatuan aurkeztu eta saltzen dute, nahiz eta intraneterako softwarea den.

> Jende asko aurkitu dugu enpresetan eta lan-munduan oro har, euskaraz bikain jakin arren, idazten ausartzen ez dena, zalantza asko sortzen zaielako eta segurtasuna falta dutelako.

>

> Euskaraz testuak sortzeko eta erabiltzeko lagungarri izango dugun softwarea osatu dugu Elhuyar Aholkularitzan. Software hori CD formatuan dago salgai eta enpresako intranetean instalatzeko da. Enpresak ez ezik Lanbide Eskolak ere gogoan izan ditugu eta horietan guztietan gehien erabiltzeko modua intraneteko zerbitzarian instalatuta egotea dela iruditu zaigu.

>

> **Enpresan Euskaraz-en edukia**

>

> Bost ataletan dago banatua ENPRESAN EUSKARAZen edukia: Hizkuntza-kontuak, Dokumentuak, Intranet, Hiztegia eta Bibliografia.

>

> - **Hizkuntza-kontuetan** ohiko hizkuntza-zalantzak eta oker erabiliak konpontzeko aukera eskaintzen dugu. Adibide eta argibide guztiak enpresaren testuinguruan kokatuak dira. Nahasmen handia sortzen diguten hainbat kontu nola erabili argibideak ematen dizkigu: orduak, data, zenbakiak, gutunetako esaldi eginak, estilo-kontuak, dokumentu elebidunak (euskarari lehentasuna ematea erabakiz gero, nola egin daitekeen hori)... Eta horietako bakoitzaren barruan ariketa erakargarriak ditu.

>

> - **Dokumentuak** sailean, hizkuntza-kontuetan egin dugun moduan, dokumentu eredu sorta bat eskaintzen dugu. Horien atalei buruzko argibide lagungarriak ere ematen ditugu. Gainera, dokumentu-eredu batzuk zeure ordenadorera jaitsi eta erabil ditzakezu: zeure izen eta irudi korporatibora egokitu eta zeureak izango dira.

>

> - **Internet atalean**, euskaraz lan egiteko sarean aurki ditzakegun helbide interesgarri batzuetarako estekak dituzu: hiztegiak, EHAA, Euskaltzaindia....

>

> - **Hiztegia**n, mota guztietako enpresetan erabilienak diren hitzak, horien gaztelaniazko ordainak eta bilaketa-sistema dituzu. Bilaketa bi norabideetan egin daiteke: euskarazko hitzaren gaztelaniazko ordaina bilatu nahiz gaztelaniazko hitzaren euskarazko ordaina.

>

> - **Bibliografia** atalean software hau osatzeko kontsultatu eta erabili ditugun iturriak aipatzen ditugu.

>

> Hori guztia itxura erakargarria emanda eta oso erraz erabiltzeko moduan aurkezten dizugu ENPRESAN EUSKARAZ CDan.