BEC, euskal identitatearen erakusleihoa?
Atzo zabaldu zuten Bilbaoko erakustazoka berria, Bilbao Exhibition Centre (BEC). Eusko Jaurlaritzako lehendakari Juan Jose Ibarretxe izan zen irekiera ekitaldian. "Gure euskal identitatea, gure euskara, gure produktuak, munduko plazan ipintzeko", horretarako izango da BEC, lehendakariak esan zuenez. Hala ere, gure euskararen eta euskal identitatearen aztarnak ez dira hain ebidenteki ikusten BEC-en.
Beharbada, euskaraz jarri izan baliote izena...
Baina izena guztiz erdalduna du, ingelesezkoa zehazki: Bilbao Exhibition Center.
Halabeharrez, laburdura asmatu behar izan diote, ze ingelesez izan arren, luzeegia da hala ere. Laburdura, beraz, BEC, baina ere berean, domeinua ez da BEC, baizik eta izen luzearena: bilbaoexhibitioncenter.com idazteko orduan luzeegia duda barik, akatsetarako errazegi.
Bilatzaileen bidez ere, BEC bilatuta aurkituko ote da hori? Horra zalantza: bi izenak dira ingelesak, baina bata luzeegia eta konplikatuegia, eta bestea laburregia eta jenerikoegia (BEC piloa dago munduan, eta Googlen ere bai, noski).
Buletinetan euskara falta
Erakustazokaren webgunea ere bisitatu dugu, www.bilbaoexhibitioncenter.com. Hiru hizkuntzatan dago; euskaraz, gazteleraz eta ingelesez. Euskarazko atalak horrela egiten digu harrera: "Ongi etorria BEC-ean". Gainontzean, nahiko txukun dago euskarazko edukia.
Buletin bat ere badu erakustazoka berriak, InfoBEC. Gazteleraz eta ingelesez bakarrik eskuratu daiteke, oraingoz. Erakustazokaren azpiegitura lan guztiak amaitutakoan jarriko dute euskaraz, agian.
Gainerakoan, atzoko ekitaldia nola joan zen jakin nahi baduzue edota BECen ezaugarrien berri izateko, begiratu gaurko egunkarietan.
Hementxe batzuk:
Eta Euskadiko Portu, Ubide eta Bideetako Ingeniarien Kolejioaren webgunean lanei buruzko informazioa, argazkiak, PDFak, diptikoak.
Erantzunak
Egia da www.bilbaoexhibitioncenter.com domeinua BEC-i dagokiola,
baina baita www.bilbaoexhibitioncentre.com ere.
Horren izen korapilatsua izanik,
gaizki idatziko dutenengan pentsatu ote dute?
BEC horretan ez dago euskaraz hartuko zaitunik. Demagun kongresu bat antolatu nahi duzula bertan, eta bertara deitzen duzula telefonoz informazioa jasotzeko, bada inork ez dizu hitzik esango euskaraz, inork ez dakielako. Hedabideren batek euskarazko adierazpenak lortu nahi baditu BECeko arduradunen aldetik hor ere jai. Hori bai ingelesez, frantsesez, alemanez ais moldatzen dira. To, euskal kulturaren zabalkunderako egitasmoa. Diru publikoz egina, ez ahaztu.
naska naska eginda naukate politiko pinpirintxu hauek.
valleyhousek tontotzat hartzen gaitu, benetan uste du ez garela gezurretaz konturatzen.
Lehen gujenjeimm handia eta orain beste hau. Kritikak lortzen duenean hauts pixka bat arrotzea, berehala euskal kulturaren alde izango delakoan.
Amundarainek gaur ederki ulertzera ematen duen bezala, amerikanoen azpi daudelako nahi gaituzte denok azpi horretan,globalizazioaren mestizoek.
Pena da, ez dela nahiko hautsa harrotuko eta dena geldituko dela mestizotxu hauek gero eta jaioago kontrolatzen duten "kritika demokratikoen" mailan.
Badakizue zein den gure arazoa? Edo gutariko zenbaitzuena gutxienik? Akonplejatu hutsak garela, horixe.
Eta ez diot hau BEC-engatik soilik. Joan den astean eman zuen Eroskik Consum dendei emango dioten izenen berri: EROSKI CENTER eta EROSKI CITY! Jesusen ama, hamaika ikusteko jaio ginen!
Zein sasi-jakintsuren konklabean asmatu dituzte izenok? Zenbat kobratu ote dute sasi-jakintsuok irumena horrenbeste astintzearren?
Akonplejatu batzuk, bai, horixe baino ez gara.
Bilbao Exhibition Centre izen bitxiak Berria-ko eguneroko zutabegileak, hiruak aldi berean, kitzikatu zituen atzo:
Horietako bik, Harkaitz Canok eta Anjel Lertxundik, eta irudi berbera erabili zuten gainera: exhibizionistaren gabardina. Maialen Lujanbiok, berriz, ingelesezko izenaren inguruan jardun zuen, besteak beste.
Gaur, berriro, kointzidentzia aipatzen du Lertxundik
Eta gaurko Berria-n Juanjo Olasagarrek hizpide du, berriz ere, BEC-a edo dena delako hori. "Probintzianismoaz" ari da, kasu honetan, idazle nafarra.
BEC-en euskaraz atenditzeko arazorik ez dute. Noski, guztiek ez dute euskara menperatzen (BEC-en antolatuko diren azoketan euskararen presentzia oso urria izango delako), baina euskaraz atenditzeko beharra baduzu, ez duzu arazorik izango.
BEC-en lan egiteko baldintzen artean, euskara jakitea kontutan hartuko zela zegoen. Orain dela bizpahiru urteetan egin zen langileak kontratatzeko lan eskaeraren arabera.
Guggiri egin genizkion kritikak milaka. Haietatik gehienak gaur egun bizi-bizirik. BEC handiari para(lelismo) kutsu bat hartzen diot. Baina ez gara leloak.
Guggi eta BEC ez dira egin euskaldunontzat. Guggik, askok uste genuenaren kontra, etekin ekonomiko onak eman ditu (espero zirenekin aderatuz behinik behin). Euskal artearen kontua, beste bat da, sortzaileek ez baitzuten hori beren ardatzean. Snobismo kultural diruzalea eta kitto. Eta hori bete du. Beraz gure helburuak bete ez dituen arren sortzaileenak bai.
Susmo bera hartzen diot BEC berriari. Ez ditu euskal herritar sumeen helburuak beteko (guk ordaindu dugun arren). Ikus dezagun sortzaileen helburuak (dirua eta kitto) beteko ote dituen.
Ez gara inozoak eta beraz, ez ditzagun sutatzaileen eta sustatu zaleen helburuak nahastu. Exigitu dezagun gure helburuak bete daitezela, gure diruarekin.
Nere ustez BEC izena gutxienekoa da, bertako langileak euskaldunak izatea aldiz, OSO GARRANTZI handikoa. Ibarretxek aukera paregabea du lana euskalduntzeko orduan, erraz esan baitezake: "nik hain azkar ikasi dudana zuk zergatik diozu ezin duzula ikasi?"
Barkatu xabi baina zuk diozuna ez da zuzena. Joan zen astean egon nintzen Construlan ferian. Informazioan erdalduna, sarreran erdalduna eta barrura sartzeko atean zeudenak erdaldunak. Guztiei informazioa eskatu nien, inork ez zekien euskaraz.
Ez hori bakarrik, gonbidapena gaztelaniaz eta frantsesez bakarrik zegoen, ez zegoen euskararen aztarnarik. Emandako bisita txartelean ere Srta. hitza ageri zen.
Paisaia linguistikoa orokorrean euskaraz ere ageri zen, baina behin behineko karteletean ez zegoen holakorik.
Seguru nago, ingelesez aritu banitz ederto atendituko nindutela, erdal exhibition centre horretan.
Oraintxe konturatu naiz artikulu honetako errore batez: Bilbao Exhibition Centre idatzi dugula, baina domeinua BilbaoExhibitionCenter.com dela.
Gure akatsa zelakoan... baina, ez!, erakundearen izena CENTRE da, eta ez CENTER. Baina domeinua CENTER-ekin amaitzen da.
Alegia, hain da zaila eta deserosoa eta erdalduna izen hau, ezen eurek ere ez dakitela nola idazten den. Izen ofizialerako bat aukeratu dute, Interneterako, beste bat.
Errore honen atzean Ingelesezko grafia anbiguoa dago. Erresuma Batuan centre idazten dute, eta Ameriketan center.