"Iparraldea bertan"

Emanaldiak:

• Zuberoako kantak a capella, martxoaren 11n, 20:00etan.

Parte hartuko duten kantariak: Jean Bordaxar, Jean-Pierre Luro, Jean-Noël Pinque eta Robert Larrandaburu.
Txürülaria: Jean-Charles Sanz

Laukote honek atzoko eta gaurko zuberotar kantuak oso ondo ematen ditu. Jean Bordaxar-ek asmatzen ditu hitzak eta musika berriak. Euskal Herritik kanpo ere, hala nola, Katalunian edo Québec-en arrakasta handia bildu duen taldeak.

• Neandertalen ametsak, kantu eta olerki errezitala, martxoaren 18an, 20:00etan.

Idazlea: Itxaro Borda (Euskadi Literatur Saria 2002).
Kantariak eta poema esatariak dira: Maialen Estecahandy, Frantxua Cousteau eta Txomin Héguy.

Isturitzeko eta Otsozelaiko harpeen habian berriro sartu ondoren, Itxaro Bordak eskaintzen digu obra miresgarri bat Neandertalen ametsak: gure ametsak, gure nahikariak, gure beldurrak, betikoak ditugunak…, biziaren etengabeko mugimendua, bizi horren taupadak milaka eta milaka urteetan mundu mineralaren bihotzean… Harpearen bisitak bultzatu du ere Karlos Gimenez Harria eta ura musika obra berria sortzen.

• Zubiak ipuin eta musika emanaldi berri-berria, martxoaren 25ean, 20:00etan.

Kontalari: Koldo Amestoy.
Kitarra jotzaile eta kantari: Pantxix Bidart.

Koldo Amestoy kontalariak Ibarxola deitutako alegiazko auzoan kokatzen ohi ditu bere kontakizunak edo batzuk handik abiarazten. Aldi honetan, Zubiak ikuskizuna Ibarxolaren gogoan oinarritzen da…, bidenabar, hainbat zubi eraikitzen duela.…lehen zubia, ipuina eta musikaren artekoa. Kontakizuna Pantxix Bidartek asmatu musika bereziarekin aurreratzen da. Laguntza soila baino gehiago dira musika eta kantuak; ipuinekin batera osatzen baitute ikuskizuna. Euskal Herriko mitologiako pertsonaiak (Mari Anderea, Laminak, Basajaunak, Jentilak eta beste…) azaltzen ditu ikuskizunak, besteak beste.