Gaizkile baten ibilerak

Donostiako udal liburutegietan disko bilduma txukunak dauzkate. Liburuak bezala, karnetarekin maileguan hartu eta etxera eroateko moduan.

Sasoi batean, jendeak diskoak entzuteko eramango zituen etxera. Baina gaur egunean, irudikatzen dut, erabiltzaile gehienek neuk bezala egiten dutela: etxera eroan eta diskoa kopiatu, edo abesti jakin batzuk destripatu...

Orain, tamalez, ezin izango dut jokabide oker horrekin jarraitu. Karneta kendu didate.

Hartu nuen, bada, auzoko liburutegian disko bat etxerako. Eta abesti batzuk kopiatu ere bai. Baina itzultzeko garaian, hara, diskoa falta. Karatulak, tapak, eduki baneuzkan, baina CDa bera non sartu ote dudan ez dakit. Galdu egin nuen. Zerbait egin behar hortaz... Kasualitatez, hiriko beste kulturetxe bateko liburutegian disko bera zeukatela ikusi nuen.

Beraz, han ere maileguan hartu, etxera ekarri, eta kopia oso bat egin CD birjina batean. Eta kopia karatula zuzenean sartu, rotulkiarekin zer zen idatzi, eta eraman nuen liburutegira, entregatzeko. Borondate on guztiarekin joan nintzen, lasai asko, esplikatzera diskoa galdu nuela, baina ez kezkatzeko, ze berreskuratu nien beste bat.

Baina ez zidaten ametitu. Liburutegikoak esan zidan ezin zutela material piratarik onartu. Pirateria ezin dutela onartu. Disko berria erosi behar nuen, berdina edo ekibalentea. Neraman baino ekibalenteagorik nekez, erantzun nion, musika berdin berdina zen! Baina ez zegoen ulertzerik. Gehitu nion Udalak hainbeste disko uzten baditu liburutegietan, ea zertarako diren pentsatzen duten, jendeak kopiatzeko ez bada! Udalak kopiatzen uzten digu guri, baina guk ezin diogu mesedea itzuli, geure disko bat Udalari kopiatu, nahigabeko hutsune bat estaltzeko!

Diskoa hartu ere ez zidan egin nahi, eta ohartarazi zidan liburutegikoak, karnetaren baimenak galduko nituela. Bixigu berriketak inora ez zeramanez, eta disko berria erosteko gogorik ez dudanez, hor konpon esan, diskoa han utzi, eta joan nintzen. Harrezkero, proskrito bat naiz.

Auzoko liburutegian ez daukat jada baimenik mailegurako. Donostiako Liburutegi zentralean ere ez. Baina beste auzo batzuetako udal liburutegiak ez omen daude zerbitzu zentralekin konektatuta, eta akaso han mailegatzen eta kopiatzen segitu ahal izango dut, ez dakit...

Diskorik (musikaz pre-kargaturik, bederen) erosten ez naiz hasiko, behintzat, 21. mendean gaude, mesedez...