Euskal Herriko Ikastolen Konfederazioaren lan berriak

Hiru lan jarri ditugu denda birtualean:

• “Araba, Bizkaia eta Gipuzkoako Ondare arkitektonikoa II: Industria eta azpiegiturak”. (CD-ROMa)
• “Ahozko Euskal Literatura”. (2 CD-ROM)
• “Euskal Herriko 101 gaztelu”. (CD-ROMa)

“Araba, Bizkaia eta Gipuzkoako Ondare arkitektonikoa II: Industria eta azpiegiturak”. (CD-ROMa)

Ondare Arkitektonikoari buruzko bilduma hau 3 CD-ROMez osatzen da:

• Ondare erlijiosoa
• Industriaren eta azpiegituren ondarea
• Ondare zibila

Ondare erlijiosoa iaz kaleratu genuen eta orain, bildumaren bigarren CD-ROM honetan, Arabako, Bizkaiko eta Gipuzkoako Industriaren eta Azpiegituren ondarea landuko da, zabal, zehatz eta era didaktikoan. Horretarako 3 atal dira:

• Datu Basea, hau da, trenbide, errota, burdinola eta abarren kontsulta iturria.
• Mapa, bisiten ibilaldia antolatzen lagunduko duena.
• Irudiz eta animazioz hornitutako estrategi edo abentura jokoa, gidoi erakargarri batean oinarrituz elementu arkitektoniko garrantzitsu batzuen ezaugarriak modu ludikoan ikasteko.

“Ahozko Euskal Literatura”. (2 CD-ROM)

Lan hau, Ikastolen Elkarteak orain bi urte sortutako “EUSKAL LITERATURA IDATZIA” CD-ROMa osatzera dator.

Bi CD-ROMetan banatu dugun lan honek lau atal ditu: sarrera, lirika, narratiba eta dramatika. Lehenengo hirurak “AHOZKO EUSKAL LITERATURA I” izeneko CD-ROMean daude, eta azkenekoa “AHOZKO EUSKAL LITERATURA II” izenekoan. Ahozko literaturaren nondik norakoak kontatzen dira hemen: ahozko literaturaren ezaugarriak, biltzaile eta bilduma nagusien izenak, tradizioz datorren literaturaren eta ez datorrenaren arteko diferentziak, eta Europan ahozko literaturak izan duen eboluzioa, besteak beste.

Lirika, narratiba eta dramatika sailkatzerako garaian, adituek maiz erabiltzen duten banaketa hartu dugu aintzat geuk ere: batetik, tradizioz datorren ahozko literatura, eta bestetik tradizioz ez datorrena.

“Euskal Herriko 101 gaztelu”. (CD-ROMa)

Gaztelua beti izan da gizartearen beharren eta historiaren isla, edo gizarte horren zati baten ispilu. Gaztelua Erdi Aroko eraikina da, Euskal Herrian Goiz Erdi Aroaz gero ageri dena, garaiko hiri edo hirigunetik ondo bereizita. Dena dela, oso gutxi dakigu Goiz Erdi Aroko gazteluen sorreraz, eta, beraz, erronka handia izan da Euskal Herrian Erdi Aroan izan ziren gazteluen berri ematea. Lana burutzerakoan hainbat mugarekin egin dugu topo: gazteluez dagoen kontzeptua, lurraldetasuna eta gaztelu askoren egungo egoera negargarria (hondakin, arrasto eta aztarna soil dira batzuk).

Lurraldetasunari dagokionez, aukeratu ditugun gazteluak egungo Euskal Herriaren mugen barruan daude. Informazioa biltzerakoan bi bidez baliatu gara: dokumentala, hau da, gaiaren gainean dagoen bibliografia, artikuluak eta Erdi Aroko agirien transkripzioak biltzen dira, eta leku azterketa, hots, lekuan lekuko aztarnak ikusi, miatu, aztertu eta neurtu ondoren argazkien bidez erakusten dira.

EUSKAL HERRIKO IKASTOLEN KONFEDERAZIOA: www.ikastola.net/denda 94-6300569 / 605715115