Eusko Jaurlaritzak hitzartu du multinazional batekin euskarazko software bat garatzeko
Ez software librea, ez eta euskal enpresa. Eusko Jaurlaritzak Belgikako multinazional batengana jo du programa eta teknologia berri bat euskaratzeko. Teknologia horrek gizakion ahotsa ezagutu eta testu bilakatzen du. Aukeratutako enpresak ScanSoft du izena eta 700.000 euroko aurrekontua izango du lan hori egiteko.
Produktua bera
Ordenagailu bitarteko ahots ezagueran eta hitzetik idatzira bihurgailuetan aditua den Belgikako Scansoft enpresarekin itxi du hitzarmena. Horren bitartez, enpresa horrek euskara ulertu, diktaketak jaso eta ahotsetik idatzira eta idatzitik ahotsera bilakatzeko gai izango den softwarea garatu eta hau erabilgarri beharko du.
Produktuaren kostua
Eusko Jaurlaritzaren Kultura Sailak 706.000 euro ordainduko ditu, hiru epetan (300.000 euro aurten, 250.000 datorren urtean eta 156.000 euro 2005. urtean). Enpresak bide horretatik sortutako softwarea bere paketetan txertatuko du eta erabiltzaileei eskainiko die.
Euskarazko software-ak
Gaur egun, hainbat euskarazko software eskuratu daitezke. Eusko Jaurlaritzak orain arte Microsoften hainbat produktu garatu ditu euskaraz: Word 6, Windows 95, Windows 98 eta Office 2000, Internet Explorer 4 eta 5 eta aurten bertan Linux sistema eragile askea eta gehien erabiltzen den software libreko produktuak.
Aurtengo 300.000 euro Scansoft-i ordaintzeko Bizkaiak ipiniko ditu.
EHAA-k horrela dio:
Diru-sarreren egoera orrian aurreikusi gabeko diru-sarrera gehigarriak, 300.000 eurokoak, lortu dira Bizkaiko Foru Aldunditik. Izan ere, Eusko Jaurlaritzako Kultura Sailak eta Bizkaiko Foru Aldundiak lankidetza-hitzarmen bat sinatu zuten, teknologia berrietan euskara ezartzeko eta garatzeko neurriak sustatzeko.
Euskarazko ahots-teknologiak garatzeko proiektua finantzatzeko erabiliko dira gaitutako funtsak. Euskarazko hizkuntza-baliabideak lortu nahi dira, gero infolinguistika-ingeniaritzan erabiltzeko, zehazki, ezagutza eta sintesi motoreak garatzeko proiektuetan.
Horregatik, kreditu horiek gaituko dira dekretu honen bidez, Euskadiko Aurrekontu Araubideari buruz indarrean dauden lege xedapenen testu bategina onartzen duen irailaren 27ko 1/1994 Legegintza Dekretuko 82., 83. eta 131. artikuluetan ezarritakoari jarraituz.
Lotura ipintzen asmatzen badut, hemen dago BOPV-EHAA-ko dekretua