24 ume gipuzkoar, oraindik ere harrera-familia bila

Kanpaina hori martxoan jarri zuten abian, baina Gizartekintzako arduradunek familia egokien bila jarraitzen dute.

Kanpaina horren helburua da harrera familiak bilatzea Gipuzkoan babesik gabe dauden haurrentzat, haurtzaroa berreskuratzen eta etorkizun bat ematen laguntzeko, arduradunen esanetan.

Gaur egun, 24 adin txikiko daude, Gipuzkoan, harrera-familia baten zain. Hainbat arazo direla-eta, ezin dute euren familia biologikoarekin bizi, eta egoitzatan bizi dira. Kanpaina honen bidez, aukera eman nahi zaie haur horiei bere familiak dituen arazoak konpondu bitartean, beste familia batean bizitzeko, eta, hala, beste haur guztiak bezala garatzeko, alderdi guztiak -fisikoa, kognitiboa, afektiboa eta soziala- kontuan izanda, dio Gizartekintza sailak.

Ez da adopzioa

Programan parte hartzen duten sendiek argi eta garbi izan behar dute harrera aldi baterako neurria dela. Ez da adopzioa, eta ez da adoptatu aurreko pausotzat hartu behar, diote arduradunek. Programaren xedea da haurra bere familiarekin lehen bailehen itzuli ahal izatea.

Harreran dagoen bitartean, haurrak ez ditu bere gurasoekiko harremanak eteten, eta gurasoei aukera ematen zaie seme-alabak ikusteko, bakoitzaren egoera kontuan izanda.

Harrera familia izateko baldintzak

Honako baldintzak ipintzen dizkio Diputazioak ume bat hartu nahi duen familia bati:

• Lan egoera eta egoera ekonomiko egonkorra.
• Bikoteek zein bakarrik bizi direnek har ditzakete umeok. Adin tarte egokiena da 35etik 50era.
• Pertsona maitakorrak eta konprometituak izan daitezela.
• Ulertu behar dute umeek gurasoekin harremana jarraitu behar dutela.

Hainbat harrera mota daude: posible da, adibidez, haurra bi urterako hartzea, gehienez ere. Beste harrera mota batzuetan, ordea, egonaldia bi urtetik gorakoa izaten da, haurraren familiak ez dituenean epe laburrean haurra berreskuratzeko baldintzak betetzen.

Interesa duten familiek 900 43 43 43 telefonora dei egin dezakete.