Oarso Telebista berriz ere gure etxeetan
Aspaldi sortu arren, 1996an, emisio ordurik ez du izan. Orain berriz, eta euskal medioak itxi ere egiten direnean emisio orduei eutsi eta etxe guztietara sartuko da OTB. Talde berria eta programazio berria ikus-entzulearen eskura.
Oarso Telebista Oarsoaldeko edo Oiartzualdeko (Oiartzun, Lezo, Errenteria eta Pasaia) euskarazko telebista da. 1996ko udaberrian sortu zen eskualdeko euskara elkarteen ekimenez. Geroztik, zailtasun eta oztopo ugariren gainetik bailarako euskaldunak informatzeko eta entretenitzeko lanean jardun zuen 2002ko apirilaren amaiera arte.
Bideragarritasun ezak programazioa etetera eraman zuen telebista. Ordutik hona seinaleari eusteko jarraipeneko irudi eta soinua emititzen aritu da. Oiartzualdeko euskarazko hedabideak plan estrategiko batean murgilduta daude azkenaldian.
Hala, lantaldea berritu eta berriz ere programak produzitu eta emititzeari ekingo dio OTBk.
Programazioa
Programazio berriari apirilaren 10ean ekingo dio. Astelehenetik ostiralerako programazioa ondoko atal hauek osatuko dute besteak beste: lau herrietako berriak, eguraldia, musika, sukaldaritza, udaletako berriak, zerbitzuak, elkarrizketak...
Egunero iluntzeko 20:00etan, gaueko 22:00etan eta eguerdiko 14:30ean (aurreko eguneko errepikapena).
Aurkezpena
OTBren aurkezpen prentsaurrekoa hilaren 8an egingo da Oiartzungo Manuel Lekuona bibliotekan eguerdiko 12:00etan.
Erantzunak
Aurreko mezua galderaz betea utzi dut eta, prisaren eraginez,Oarso Telebistari buruz gauzatxo bat ala beste esatea ahaztu zait.
Lehena, eta garrantzitsua, oso pozgarria dela OTB indarberritu bat edukitzea. Telebistagintza lokalaren kolonizazio garaietan oso freskagarraia da oarsoaldekoena bezalako berria. Zorionak eta ondo ibili ekinaldi berri honetan.
Bigarrena, eta oso azalekoa, ez zait asko gustatzen gauean emititu den programa bat berriro hurrengo egunean aideratzeari "errepikapena" deitzea. Nik gauez ikusi ez badut zergatik esan behar dit telebista kanalak errepikatua dela. Imaginatzen duzue Tele 5k iragartzea: "Bihar, Cine Cinco Estrellasen barruan: Robocop (errrepikatua ) ikusi ahal izango dugu". Gaur egun programa berdina behin baino gehiagotan emititzeari multidifusioa deitzen zaio. Gainera, telebista lokalendako, txikiak direnean eta euskaraz aritzen direnen kasuan gehiago, multidifusioa errekurtso on bat izateaz gain, eskaintzaren artikulazio tresna oso potentea izan daiteke.
Azkenengo puntutxo bat, pentsatzen ari gara Udako Euskal Unibertsitatearen barruan, telebistagintza lokalari buruzko mintegi bat antolatzea. Egungo panorama nola dagoen (zenbat telebista eta non, zelakoak eta zein antolaketa, aurrekontu, marku legala...) eta etorkizunaz apur bat eztabaidatzeko izango litzateke. Egun bateko kontua litzateke. Interesgarria iruditzen zaizue?
Horrezaz gain, zuetariko batzuk jakingo duzue, UPVk Donostian antolatzen dituen udako ikastaroetan ere gai honi buruzko ikastaro bat antolatu dela...Baina, UEUren barruan pentsatzen ari garena ez da horrenbeste entzuteko baizik eta hitzegiteko eta eztabaidatxo bat edukitze, proposamenak egiteko, erronkei aurre egiteko asmoaz...
Luzatu naiz gura baino gehiago. Agur esan aurretik, zorionak, berriro ere Oarsoaldeko Telebistako lagunei.
Ez dator zuzen-zuzen lotua aurreko mezuarekin, baina telebista lokala denez Oarso Telebista...
Telebistagintza lokalak "digitalizazioaren erronka gainditu behar" omen du. Baina, ba al daki inork telebistagintzaren digitalizazioa aipatzen dugunean zertaz ari garen?
Nik zalantzak besterik ez ditut: zer digitalizatu behar da produkzioa ala bakarrik emisioa eta errezepzioa?
Garestia omen da telebista lokal bat digitalizatzea, baina zenbat?
Gai honi buruz ziur naiz batenbat badagoela asko dakiena eta gutxi izanda ere asko eskertuko nuke. Ni behintzat galduta nabil-eta.