Irakeko gerra, arabierren begietan
Lehen Golkoko Gerran arabiar gehienek CNN telebistaren irudiak ikusi beste erremediorik ez zuten izan. Oraingo honetan, berriz, hiru telebista arabiar ikusten ari dira guztien gainetik. Eta erasotzaileak, pozik ez.
Irailaren 11ren ondorengo egunek Al-Jazeera telebista ezagutarazi zuten mundu guztian. Telebista kate hark eman zituen esklusiban, Osama Ben Ladenen lehen adierazpenak irudietan. Baita talibanek nola suntsitu zituzten Bamiyango Budak. Eta irudi haiek mundu guztiko telebistetan zabaldu ziren. Harrezkero, Qatarko telebista hau ezinbesteko erreferentzia bihurtu zen arabiarren artean. Azkenean, bazuten beraien CNN.
Baina oraingo gerra honetan, beste bi telebista gehiago nabarmendu dira eta audientzia handiak ari dira lortzen arabiarren artean: Abu Dhabi TV eta Al-Arabiya.
Abu Dhabi TV emititzen ari da satelite bidez 1996a ezkero eta bere arduradunek diotenez, aukera bakarra omen da herrialde horietan, ez dagoena enpresa edo interes geopolitikoen menpe. ADTV kateko arduradunek diote 120 harpidedun dituztela munduko telebisten artean, tartean Reuters agentzia, CNN, AFP, etab. Arrazoi nagusia horrelako arrakasta izateko omen da bulegoak dituztela Bagdaden erdialdean bertan, beste inork baino egokiago, eta estudio eta guzti.
Al-Arabiya, telebista, berriz, hil honetan hasi da emititzen Dubaitik. Finantziazioa Saudi Arabia, Kuwait, Libano eta Emirerri Arabiar Batuetako inbertsore independenteek jartzen dute. Middle East News produktorari lotuta dago, zeinen jabea den Fahd erregearen koinatu bat. Askoren ustez, Al-Jazeerari lehia egiteko sortu omen da, eta haren lehendakariak Jordaniako ministro ohi batek dio muturreko jarrera guztien aurka daudela. 70 kazetarik egiten dute lan telebista honetan eta datozen bost urteotarako 300 milioi dolarreko aurrekontua izango dute.
Telebista arabiarren eragina
Arabiarrak ez dira gerra hau jarraitzen ari CNN telebista amerikarraren bidez, aurrekoan egin zuten bezala, baizik eta zuzenean, satelite bidez eta arabieraz, goian aipatu ditugun telebistetan. Eta, jakina, telebista hauek ez dute eskaintzen nola inbasoreen tankeek zeharkatzen duten basamortua bat ere eragozpenik gabe, edo haien prentsaurrekoak Washingtonen edo Londresen. Batez ere kontatzen dute zer gertatzen den Bagdaden, Basoran eta beste hiri batzuetan, zer dioten agintari irakiarrek eta herritarrek nola sufritzen dituzten bonbardaketak.
Al-Jazeerak 40 milioi ikusle omen ditu Marokon hasi eta Bahrein bitartean. Berak eman zituen, beste inork baino lehenago, herenegun amerikarren bonbek eragin zituzten biktimen irudiak Bagdadeko merkatuan. Egun batzuk lehenago berak erakutsi zituen, primizian, lehen irudiak soldadu amerikar hildakoenak edo preso hartutakoenak. Amerikarrek, mendekuz, spam-ez bete dute Al-Jazeeraren webgunea, hemen irakur dezakezuen bezala, eta, ondorioz, ez dago modurik webgunean sartzeko. Horren ondorioz ere, Al-Jazeerak atzeratu egingo du ingelesezko webgunea apirilaren erdialdera arte.
Irudi hauek erakusteak sekulako eragina du arabiarren artean. Biktimen irudiek sendotu egiten dute gerraren kontrako sentimendua. Preso amerikarrenak, berriz, egiaztatu egiten die erresistentzia gero eta handiagoa dela eta inbasoreek larrutik ordainduko dutela ausardia.
Amerikarren lagun diren zenbait herritan Jordanian, Egipton, Marokon eta Saudi Arabian, besteak beste ez dakite zer egin beraien herritarrak lasaitzeko, hauek egunero irteten ari dira kalera protesta egitera, telebistan ikusitako irudiek bultzatuta.
Amerikarren telebista arabieraz
Hau guztiau ikusita, badirudi AEB Amerikako Estatu Batuek beste telebista bat ezarriko dutela Dubain edo Abu Dhabin, arabieraz emitituko duena.
Telebista honek izango du helburu hobetzea AEBen irudi kaskarra arabiarren artean eta lehia egitea Al-Jazeera telebistari, zeinak maiz haserretu dituen Etxe Zuriko arduradunak nahiz inguruko agintariak.
Esaten dutenez, Hosni Mubarak Egiptoko lehendakariak esan omen zuen Al-Jazeera telebista ikustatu ondoren: nola liteke hain toki txiki batek hainbeste buruhauste eragitea?.
Erantzunak
Astelehenetik egon naiz english.aljazeera.net helbidera konektatu nahian, baina alferrik.
Gaur lortu dut, baina ingelesezko edukirik ez dago hor. Arabierazko bertsioa ageri da hor. Klikatuz-eta irudiak aurkitzen asmatu daiteke, baina testu-informazioa arabieraz dakitenek bakarrik aterako dute.
Hainbat albiste dabiltza azken aldian gaiaren inguruan eta ez dago argi Al Jazeeraren aurkako erasoa mail bombinga edo DDoS (Denial of Service) eraso bat izan den. Izatekotan, pentsatzekoa da bigarren hau izatea, posta bonbaketa batek ez baitu zertan eragin zuzena izan behar webgunean, batez ere gauza biak (e-posta eta web zerbitzaria) makinatxo berean ez daudenean. Bada erasoa zalantzan jartzen duenik ere, eurek deskonektatu dutela iradokitzen duenik.
Hemen gakoa uste dut nahiko argi dagoela zein den. Al Jazeerak sekulako mina egiten dio AEBk mundu mailako telebista kate guztietan ezarri nahi duten gertaeren bertsio bakarrari. Telebistaren Ardi beltzak oso "CNN estiloan" ematen ditu albisteak, itxura erakargarri eta profesionaleko estudio eta aurkezleekin, giza baliabide eta baliabide tekniko onekin... Horrek surtu egin ditu amerikarrak, azken finean informazioaren gerra ere baita hau. Azken kolpea Al Jazeerak astelehenean bere webgunean ingelesezko zerbitzua abian jartzea izan da. Arabiarrek ezezik mendebaldarrek eta beste guztiek euren bertsioa ulertu ahal izatea izan da azkeneko kolpea. Azkenik hosting-a AEBetan bertan hartua zuen telebista erasotu dute. Hemen berriki gertatu den bezala, mezularia hiltzen saiatu dira.
Irakurri dut AEBetan inork ez diela ostatu eman nahi, baina eurek hartua ei zuten jada hosting-a Europara aldatzeko erabakia. Uste dut domeinuaren kontrola oraindik euren esku dagoela, beraz, baliteke berriro sarean agertzea.
Plentzian ere bai
A, eta nik ere ikusten dut Al Jazeera orain. Ez daukat satelite bidezko telebistarik, baina Plentzia Telebistak (PTB) bere programazioa ematen ez duenean Al Jazeera uzten du eta Gorlizen ere ikusten dugu. Benetan merezi du Al Jazeera ikusteak beste kateetan agertzen ez diren irudiak, berri emale piloa...