Euskararen terminologia pressing iraunkorrean

Duela egun batzuk. Gaur Egun ikusten ari naiz. Hala, Martxelo Otamendi agertu da Euskal Telebistaren kameren aurrean. Jasandako torturen denuntzia egin ondoren, polizien regenerazio baten beharrean gaudela aipatu du. Berri emaileak, off-eko ahotsak, Martxelok polizien era berritzea eskatu duela segurtatzen du. Hurrengo egunean, Eguneron, Martxelok polizien onbideratzea exigitu duela irakurri dut.

Eta horrela, hiztegietara jo dut (Sarasola, Elhuyar, Hiztegia 3000, Hiztegi Batua) eta konprobatu, komunikabideetako zuzentzaileak ez zeudela oker eta Martxelok ez dakiela behar bezalako euskara, regenerazio, hiztegi hauen arabera, ez baita euskal hitza.

Eta diot, euskaldun guztiek Martxelok bezain gaizki egingo bagenu euskaraz, 600.000 besterik ez izanagatik ere, munduko hizkuntz komunitaterik kultuena izateaz gain, ez genuela euskararen etorkizunagatik inolako kezkarik izango. Ostera badirudi Martxeloren euskara maila ez dela nahikoa, inork hutsik gabe hitz egin ezin dezakeen hizkuntza diseinatu omen duten hizkuntz autoritateekiko, behinik behin. Apalki, esan behar dut, ez dakidala zer zentzu duen euskaldunengan horrelako pressing-a mantentzeak; edonork baitaki zein zail egiten zaion euskaldunari, alfabetatua izanagatik ere, euskara normalki erabiltzea, batipat, irakurtzea eta idaztea. EGUNKARIaren irakurle kopurua lekuko. Ez dakit zergatik ez dagoen regenerazio edo erregenerazio edo errejenerazio hiztegietan. Are gehiago, euskaldun guztiek ulertzen duten hitza delarik, hain zuzen ere, era berritze eta ongibideratze* baino hobeto. Izan ere, hauen esan nahia, automatikoki jabetu baino, hausnarketa-dedukzio baten ondorioz soilik somatzen edo, gehienez, imajinatzen dute. Are gehiago 1571ko liburu ezagun batean honako hau irakurri dugularik:

• Eta Iesusec erran ciecén, Eguiaz diotsuet, ecen çuec niri iarreiqui çaizquidatenóc, REGENERATIONEAN iarriren denean guiçonaren Semea bere maiestatearen thronoan, iarriren çaretela çuec-ere hamabi thronoén gainean, iugeatzen dituçuela Israeleco hamabi leinnuac.

Eta orain, 433 urte eta gero, hau!

Gaur. Martxelo berriz. Berriz Madrilen Barne Arazoetarako Ministerioak jarritako kereila dela eta. Bere tortura denuntziak Del Olmoren kaxoi batean gordeta daudela jakinarazten digu. Beste huts bat. Bi esaldi, bi huts. denuntzia erabili beharrean salaketa erabili behar zuen hiztegien arabera. Pressing. Ez dakit zer arraio esan duen Off-eko ahotsak. Egunero irakurtzeko irrikan nago.