Beste egunkarien iritzia Sustatu.eus

Hedabideen babesik gabe gelditu da oraingoan Espainiako Gobernua. Madrilen argitaratzen direnen artean, El Mundo-k, El Pais-ek eta La Razon-ek kritikatu egin zuten operazioa, eta ABC bakarrik geratu zen. El Mundo-k, editorialean, "erabaki larria" justifikatua ez dagoela adierazi ostean, agintariei "akatsak" zuzentzeko eskatu zien. La Razon-ek zigorrak "delitua egin dutenei" ezartzeko eskatu zuen, eta ez "egunkariari bere osotasunean, iritzi delituari buruz ez garelako ari".

Euskal Herriko egunkari gehienek gogor kritikatu zuten itxiera. "Euskal Herriaren kontrako estrategian" Estatu espainiarra "lotsarik gabe eta konplexurik gabe" ari dela esan, eta "adierazpen askatasunaren eta euskararen defentsan, konplexurik eta lotsarik gabe" ekiteko garaia dela adierazi zuen Gara-k. Diario de Noticias-en iritziz, "demokrazia baloreetan lo hartutako gizarte batek baino" ezin du onartu "oldartu gabe" itxiera. El Periodico de Alava-k, editorialean, "eskubide demokratikoak zapaldu" egin dituztela adierazi zuen. Deia-k editoriala ez baina Administrazio Kontseiluaren agiria atera zuen: "Euskara hutsean argitaratzen den egunkaria izanda, orain hartutako neurriaren larritasuna" azpimarratu zuen. Le Journal-ek langileen el- kartasun oharra kaleratu zuen.

El Diario Vasco-k eta El Correo-k, editorial berean, zalantzak agertu zituzten, atxilotuei egotzitako delituek ez dutelako "halabeharrez" egunkariaren itxiera ekarri behar eta hartutako neurriak "justifikazio berezia" behar lukeelako.. Hala ere, indar handiagoa jarri zuten Eusko Jaurlaritzako alderdien jarrera kritikoa gaitzesten, Auzitegi Nazionalaren erabakia auzitan jartzen baino. Diario de Navarra, editorial hotz batean, erabakia kezkagarria dela esatera mugatu zen.

sustatu

2003-02-22 : 14:18

Egunerok horrelaxe atera du berria: "kataluniako egunkariek oso goror kritikatu dute itxiera eta euskara ahotsik gabe geratu dela nabarmendu. Jarraian nazioarteko komunikabideen hainbat iritzi zabaldu dira:

Kataluniako egunkariek oso gogor kritikatu dute itxiera eta euskara ahotsik gabe geratu dela nabarmendu

Kataluniako egunkarietan oihartzun bereziki handia izan zuen Egunkariaren itxierak. Erresuma Batuko kazeta nagusiek landu zuten gaia. Parisen argitaratuek edo Alemaniakoek, esate baterako, ez zuten gaia aipatu.

AVUI (Katalunia)

"Justifikaziorik gabea"

Avui-k luze eta zabal landu zuen gaia, eta editoriala eskaini zion: "Edozein ikuspuntutik begira, gehiegizko neurria da. Lehenik eta behin, inondik inora ezin daiteke bere lerro editoriala ETA erakunde terroristaren planteamendu ideologikoekin eta estrategia biolentoarekin identifikatu. Bigarrenik, euskaraz argitaratzen den egunkari bakarra delako. Eta, azkenik, orain ahotsik gabe geratu den aukera batetik errealitatea interpretatzen duelako.(Ö) Angel Acebes Barne ministroak esan du operazioa euskal kulturaren eta , bere hizkuntza askatasunez adierazteko defentsan egin dela. Ministroak azaldu beharko du, neurriok jarraitzen badute, nor geratuko den aurki Euskadin euskaraz eta askatasunez espresatu ahal izateko".

EL PERIODICO (Katalunia)

"Kalte konponezina"

El Periodico-k ere gaitzetsi egin zuen Egunkariaren itxiera: "Egunkari bat soilik itxi daiteke, berme osoko epaiketa baten ondoren, erakusten bada delitua egiteko tresna izan dela, baina ez bertan adierazi diren ideiengatik. (...)Hedabide bat badaezpada ixteak kalte konponezinak sortzen ditu, eta ezin dira konpondu azkenean auzitegi batek kondenarako motiborik aurkitzen ez badu".

EL PUNT (Katalunia)

"Lotsa"

El Punt-ek ere erabakia kritikatu zuen editorialean: "Euskaraz argitaratzen den egunkari bakarraren itxiera justifikaezina da, kolpea hain latza baita hedabide hori heriotzera kondenatuta gera daitekeela eta, hortaz, adierazpen eta informazio askatasuna bortxatzen duela.(Ö) Egunkariak beti defenditu ditu portaera demokratikoak eta indarkeria salatu egin du, eta bere profesionalek ongi irabazitako ospea dute. (Ö) Nahiz eta Estatuko gobernuak behin eta berriro ukatzen duen, badirudi operazioa gehiago dela euskal kulturaren eta hizkuntzaren aurka terrorismoaren aurka baino. Angel Acebesek polizi operazioa euskal kulturaren defentsan (Ö) egin dela esateak lotsa ematen du. Ez al zuen ministroak kontrakoa esan nahi?".

ASSOCIATED PRESS (Estatu Batuak)

"Izen berriarekin"

"ETArekiko lotura leporaturik itxiriko egunkari euskalduna izen berriarekin kaleratu da berriz", zioen Associated Press berri agentziak Espainiako hiriburutik bidaliriko artikuluan. Agentziak atxiloketen eta Egunkariaren itxieraren prozesua kontatzen zuen eta 1998. Urtean Egin-ekin gertatutakoa ekartzen zuen gogora: "Egin kazeta, ETA laguntzea leporatu zioten honi ere, ez da inoiz ireki berriz, nahiz eta bertako inor epaitua ez izan".

CNN (Estatu Batuak)

"Paramilitarrak"

CNN agentziak Egunkaria "independentziaren aldeko kazeta" gisa deskribatzen zuen Interneteko gunean. Azken astean beste hamarka lagun preso hartzeko eginiko "operazioarekin" lotzen zituen osteguneko atxiloketak eta ondorengo Egunkariaren itxiera. "Euskaraz mintzo direnen kazetak" ETAko agiriak argitaratzen dituela nabarmentzen zuen. Agentziak zabaldu zuenez, "Ehunka Guardia Zibil paramilitarrek 21 etxe zein bulego arakatu eta agiriak zein ordenagailuak atzeman zituzten".

THE NEW YORK TIMES (Estatu Batuak)

"Espainiak itxi du"

"Espainiak egunkari euskalduna itxi du, separatistei laguntza ematea leporatuta" titulatu zuen Emma Daly The New York Times egunkariak Madrilen duen korrespontsalak. Juan del Olmo epaile espainiarrak atxiloturikoei eta Egunkariari egotzitakoa azaldu ondoren, Xabier Lekuona zuzendariordearen gezurtapena jasotzen zuen. Egunkariaren asmoa ez dela inoiz "ildo politiko bat sostengatzea, baizik eta euskaraz argitaratzea", jarri zuen The New York Times-ek Lekuonaren ahoan.

THE GUARDIAN (Erresuma Batua)

"Sumindura"

The Guardian-en, "Espainiako Poliziak euskal egunkari bat itxi du" titulatu zuen Gilles Tremlettek. Itxieraren eta salaketen berri eman ostean, The Guardian-eko kazetariak azpimarratu zuen itxierak "sumindura" piztu zuela Euskal Herriko beste hedabideetan eta "gobernu semi-autonomoa" sus- tengatzen duten alderdi "nazionalista moderatuetan". Halaber nabarmendu zuen polizia operazioak "begirale asko harritu" zituela, "Egunkaria ez baita Gara elebiduna bezain erradikala".Anjeles Iztueta Eusko Jaurlaritzako Hezkuntza kontseilariak "ideien kriminalizazioaz" egindako adierazpenaren berri ere eman zuen The Guardian-ek.

THE INDEPENDENT (Ingalaterra)

"Sarea zabaltzen"

Elizabeth Nash The Independent-eko Madrilgo korrespontsalak sinatutako artikuluak Guardia Zibil "paramilitarraren" operazioa azaldu zuen. Nash-en arabera, "duela 12 urte lehen aldiz argitaratutako egunkari nazionalista da Egunkaria, eta uste denez, aurretik agintariek begipean hartutako beste egunkari batzuek baino menpekotasun gutxiago du euskal erradikalekiko: horrek iradoki dezake Madril sarea zabaltzen ari dela ETAren jarraitzaileen aurkako kanpainan".

EL PAIS (Espainia)

"Muturreko neurria"

"Egunkariaren itxierak oinarrizko eskubideei eragiten" diela idatzi zuen Espainiako El Pais kazetak editorialean. Hala ere, neurriak oinarrizko eskubideei eragitea "litekeena dela" esanez bukatzen du. Bi adierazpen zalantzakorren artean, Egunkariaren itxiera eta Egin kazetarena bereizten ditu Madrilgo kazetak: "1998an, Egin-eko orrialdeetatik komandoei agindu zifratuak eta informazioa helarazten zitzaiela aipatzen zen". Osteguneko atxilotuen "ustezko legehausteek ez dute zerikusirik antzeko ezerekin", dio El Pais-ek. Egunkariaren kontrako erasoaren inguruan Espainiako Auzitegi Nazionaleko fiskalak eta Barne Ministerioak "harrigarriro hitzartutako prentsa ohar bitxia" nabarmentzen du. "Egin-en aferak erakusten duenez, itxiera konponbide zaila duen neurria da, hura ez baitzen berriz agertu urtebeteren buruan behin-behineko itxialdia kendu ondoren. Hori dela eta, berehala jakin beharko genituzke, epaileak halako muturreko neurria ezartzera eraman dituen zantzuak", bukatzen du El Pais-ek.

sustatu

2003-02-22 : 14:22

Gaurko 2. zenbakian irakurri ahal izan dugun moduan, Itxieraren eta atxiloketen salaketez gain, elkartasun mezuak dira nagusi

Komunikabideek erreakzionatu egin dute Euskaldunon Egunkariaren itxieraren aurrean, eta beren elkartasuna adierazi diete atxilotuei, senideei eta langileei.

Euskal Telebista: "Euskal kulturgintzan eta euskal komunikazioan erreferente garrantzitsu diren pertsona horiek guztiak berehala askatzeko eskatzen dugu, gizaki orori dagokion adierazpen askatasunaren izenean. Prezintua berehala kentzeko exijitzen dugu. Kasu honetan gure ahotsa are ozenago altxatu nahi dugu, Euskaldunon Egunkaria baita Euskal Herrian euskaldunek euren hizkuntzan irakur dezaketen egunkari bakarra. Komunikabideetatik eramandako dokumentazio profesionala berehala jabeei itzultzeko eskatzen dugu, gure lanbidearen oinarrizko arau eta eskubideak urratzen baititu neurri horrek, eta kazetarien iturriak arriskuan jartzen. Gure esku dagoen guztia egiteko prest gaude eta gaurko manifestazioarekin bat egiten dugu eta adierazpen askatasunaren alde zaudeten guztioi ere bat egin dezazuen dei egiten dizuegu".

Bagera, gaztetxulo, irutxulo: "Gogor salatu nahi dugu euskararen, euskal prentsaren eta adierazpen askatasunaren kontrako eraso larri hau. Euskal prentsaren aldeko apustua irmo defendatzen jarraituko dugu eta Euskal Herriak euskarazko egunkaria izan dezan laguntzeko konpromisoa hartzen dugu. Euskaldunon Egunkaria kalean nahi dugu".

Mikel Bujanda (Euskalerria Irratiko zuzendaria): "Gertatzen ari dena gurea sentitzen dugu. Egoera zailenetan ere bihotza bero baina burua hotz mantendu behar da, eta elementu guztiak analizatu behar dira. Esaterako, inork ez du esan kazetarien lana sekretu profesionalaren pean dagoela, eta kazetarien agendak, dosierrak eta dokumentazioak bahitu egin dituzte. Eskandalu bat da eta demokrazia zenbaterainokoa den erakusten du. Euskaldunon komunitateari euskarazko komunikabide bat izateko eskubidea ukatu digute. Badirudi Nafarroan esperimentatzen diren ereduak gero Euskal Herri osora orokortzen direla. Horrez gain, aintzat hartu behar da PPren egungo egoera, eta edozerk balio duela erakutsi nahi dute".

Gure Irratia: "Euskararen kontra eta adierazpen askatasunaren kontra egina den gisa hortako jazarpenik ezin dugu onartu".

Xorroxin Irratia: "Indar armatuek atxilotuta eraman dituztenei gure elkartasuna helarazi nahi diegu. Hamar urte luzez euskara hutsez plazaratutako egunkaria egun bakarreko lan ilunez errekara botatzea ez dugu inolaz ere onartzen ahal. Euskal kutsua duen ororen kontra gaurkotutako sorgin ehiza bat antolatu dutela dirudi. Sorgin eta gaizkile izatea parekatu eta inkisizio prozesuari parez pare ateak irekiz ari dira, hasi berri den XXI. mende honetan".

Goiena: "Benetan larria iruditzen zaigu aspaldian euskalgintzako erakundeak jasaten ari diren eraso bolada amaigabea. Inolako epairik gabe komunikabide bat ixtea adierazpen askatasunaren aurkako ekintza justifikaezina iruditzen zaigu, eta euskarako komunikabideak defendatzeko eta garatzeko ahaleginean elkarlanean jarduteko gure prestutasuna azaldu nahi dugu".

Zabalik: "Harridura eta kezka adierazi nahi dugu operazio poliziala dela-eta. Komunikabide bat ixtea adierazpen askatasunaren aurkako eraso zuzena da eta kolokan jartzen ditu demokraziaren oinarriak. Are gehiago, itxi dutena euskarazko egunkari bakarra dugunean. Hamaika kolpe jasan ditu euskalgintzak azken garaiotan, eta horien guztien aurrean gure elkartasuna adierazi nahi diegu lan horretan diharduten guztiei".

El Mundo del Pais Vasco: "Hartutako neurriaren desproportzioa eskandalugarria da. Euskal Herriko gizarteko sektore baten bozgorailua isiltzeko saioa da".

Localia Gipuzkoa: "Edozein komunikabide ixtea edo prezintatzea adierazpen eta informazio askatasunaren kontrako eraso gogor bat da. Ezin da nahastu euskal mundua eta euskararen zein euskal kulturaren aldeko lana, ekintza deliktiboekin".

Radio San Sebastian: "Edozein komunikabideren itxierak modu larrian erasotzen ditu adierazpen eta informazio askatasuna. Edozein zuzenbide estatutan errugabetasun printzipioak nagusitu behar du, epaiketaren edo sententziaren bidez kontrakoa erakusten ez den bitartean. Ez dira nahastu behar euskararen eta euskal kulturaren aldeko lana ekintza deliktiboekin".

Kazetarien Nazioarteko Federazioa: "Prentsa askatasunari kolpe gogorra eman diote. Euskaldunen prentsa askatasuna ilundu egin da. Korronte guztietako kazetariak kezkatuta daude operazio horrek prentsa askatasunean izan ditzakeen ondorioengatik. Kezkatuta gaude, era berean, Egunkariaren itxiera euskararen kontrako erasoa izan daitekeelako".

Euskal Herriko Prentsa Elkartea: "Komunikabide bat erasotu dute berriro. Beste behin terrorismoaren kontrako borrokaren izenean hedabideen kontrako neurriak hartu dituzte Espainian. Neurri hau ez da lehenengoa, duela gutxi Egin egunkaria itxi baitzuten. Badira bost urte ordutik eta ez da egin inolako prozesurik. Euskal Herriko Prentsa Elkarteak bere salaketa agertu nahi du Egunkariaren aurkako erasoengatik: askatasunaren eta hedabideen existentziaren kontrako atentatua izan da. Gure ahotsa altxa nahi dugu gure lankideak langabeziara eraman ditzaketen neurrien aurrean".

Sustatu

2003-02-23 : 12:26

Donostian inoiz egin den manifestaziorik handiena seguruenik, baina Euskal Herritik kanpo apenas ispilatu den hori. Espainiako telebistetan erabat atzenduta eta nahasita eman zuten albistea. Hala ere, prentsa idatzian nabarmena da oraindik itxieraren oihartzuna.

Egunkarien editorialak, igandean

Grupo Correo

Deia

Diario de Noticias

Gara

Iritzi artikuluak, igandean

Mikel Agirregabiria

César Alonso de los Ríos

Antonio Álvarez-Solís

Xabier Amuriza

Iñaki Anasagasti

Jon Arano

Mikel Atxaga

Juan José Baños

Martín Barriuso

Antonio Martín Beaumont

Juan Bengoetxea

Alfonso de la Vega

José Mari Esparza

Jose Ramon Etxebarria

Sabin Intxaurraga

Edu Iriondo

Xabier Isasi

Iñaki Lekuona

Anjel Lertxundi

Gontzal Marco

Alberto Martínez Silva

Gontzal Mendibil

Laura Mintegi

Fito Rodríguez

Koldo Sagasti

Maite Soroa

Josep María Ureta

Iñaki Uriarte

Alfonso Ussía

José Antonio Zarzalejos

Sustatu

2003-02-24 : 11:25

Gaur, astelehena, ez da editorialik agertu Egunkariaren inguruan. Iritzi artikuluak, ordea, bai, eta ugari. Beharbada hauts gehien harrotu duena da euskal idazle talde batek (Iban Zaldua, Patxi Zubizarreta, Ana Arregi, Bernardo Atxaga, Jorge Giménez, Joxemari Iturralde, Anjel Lertxundi, Inazio Mujika eta Joxean Sagastizabal) argitaratu duena El País egunkarian. Hemen ere irakur dezakezue, Iban Zalduari dagokion artikuluan.

Antonio Álvarez Solís

Pedro Pablo Arrinda

Juan José Baños

Joseba Butron

Iñaki Ezkerra

Ander Izagirre

Gontzal Marco de Juana

Gontzal Mendibil

Andres Osa Sakona

Xabier Pérez Herrero

Miguel Ángel Rodríguez

Javier Sádaba

Justino Sinova

Jon Urrujulegi

Jesús Valencia

Iban Zaldua

Ramón Zallo

Gotzon Zarraga

José Luis Zubizarreta

Sustatu

2003-02-24 : 12:00

Larunbatean, The Idaho Statesman egunkariak artikulu bat zekarren, nola itxi zuten Egunkaria.

Tartean David Bieter Idahoko kongresukide demokrataren iritziak agertzen dira. Bieter-ek kontatzen du nola Martxelo Otamendi bizi izan zen beraren etxean Idahoko Kongresuak eztabaidatu zuen bitartean mozio bat Euskal Herriko autodeterminazioaren alde. Horretaz gain, Hillary Clintonen lehen kanpaina jarraitu zuen kazetari gisa. Ez dizute hori egiteko baimenik ematen, aurretik zure historiala ondo aztertu gabe, esan zuen Bieter-ek.

Bestalde, Idahoko Indymediak ere egin du albiste honen jarraipena.

Manex

2003-02-24 : 13:26

Le Journal du Pays Basque-Euskal Herriko kazetak ere luze zabal aipatu zuen ortziral eta ibiakoitzen, eta bizki ontsa gainera. Ikusiz frantsesez idazten duten heldabideek zoin kasu guti egin duten aferari, uste dut azpimarratzekoa dela egin duten lana. Larunbatekoan Erramun Bachoc euskal kulture erakundeko lehendakaria, Didier Rouger zuzenbide irakaslea, Sabin Intxaurraga politikaria eta Bixente Vrignon kaxetalariaren aburuak ere bildu zituzten.

Sustatu

2003-02-25 : 11:50

Juan del Olmo epailearen jarrera Egunkariako atxilotuekin kritika zorrotzak jaso ditu bi egunkariren editorialetan:

Deia

Gara

Eta gaur ere, iritzi artikulu ugari bildu ditugu han eta hemen, Egunkariaren inguruan. Hona hemen horietako zenbait:

Santiago Alba Rico

Iñigo Aranbarri

Bernardo Atxaga

Joxe Azurmendi

J. Oscar Beorlegui

Josep Cuní

Josep María Espinàs

Julen Gabiria

Martin Garitano

Ritxar Irazusta

Joxe Iriarte Bikila

Roldán Jimeno Aranguren

Koldo Martínez

Jon Odriozola

Xabier Odriozola

Mikel Razkin

Consuelo Sánchez-Vicente

Lander Santamaría

Maite Soroa

Txillardegi

José Luis Uriarte

Bixente Vrignon

Sustatu

2003-02-25 : 14:01

Iñigo Aranbarri

Mikel Carramiñana

Sustatu

2003-02-26 : 08:36

Epaileak atzo jakinarazi zuen autoa eta erabaki zeintzuk joango ziren espetxera eta nortzuk geratuko ziren libre. Eta nork segitu beharko zuen inkomunikaturik. Hori dela eta, zenbait egunkarik editorialak idatzi dituzte gai horren inguruan.