XNView, irudientzako programa euskalduna
Irudiekin jarduteko programa arina, doakoa (freeware) eta majoa da XNView. Eta euskaraz dago.
XNView ez da Photoshop edo The GIMP. Irudiak kudeatzeko eta haiekin ariketa zenbait egiteko programa bat da, ez grafikagintzarako eta irudi-sorkuntzarako suite konplexu bat.
Baina egiten duen hori ondo egiten du, eta aukera mordoxka bat dauzka. Horien artean, nik, egia esanda, bi bakarrik erabiltzen ditut, baina biak oso praktikoak:
- Interneterako argazkiak prestatzeko, formatua eta tamainua egokituz.
- Pantailazoak ateratzeko: pantailan ikusten ari garena irudi moldagarri bihurtzeko beste era bateko dokumentuetan edo web-etan itsasteko gero.
Beste aukera batzuk ere baditu, bai, filmina paseak antolatzeko-eta, adibidez. Norbera esploratzeko libre da.
XNView doan da, freeware, eta Windows, Linux eta Unix makinetan instalatzen ahal da. Eta gainera euskaraz dago. PC batean instalatzen baduzu, normalean lehen bistadizoan ingelesez edo espainolez agertuko zaizu, baina menuetako aukera hauei segitu...
Tresnak > Hobespenak > Hizkuntzak
Eta hor euskara aukeratu ahal izango duzu. Txukun euskaratuta dago, aukera guzti-guztiak agertu ez arren. Kredituetan dio euskaratzea Axier Lopez-ek egin duela. Nik ez dakit nor den, ezta lerro hauek irakurriko ote dituen inoiz, baina hemendik esan nahi diot: zorionak, eta eskerrik asko!
XNView eskuratzeko, hemendik: www.xnview.com
Erantzunak
Esker mila zuoi ere, egindako lanak zeozertarako balio izan duela jakitea pozgarria da oso.
Egia esan, XnView kasualitatez ezagutu nuen orain orain dela urtebete edo, gogoratzen ez dudan webgune frantses baten bitartez(egilea be frantsesa da), non XnView-ren doaiak asko goraipatzen zuten.
Programa jaitsi eta primerako programa bat iduritu zitzaidan argazkiekin gauza arinak eta ohizkoenak egiteko. Beraz, AcdSee bezalako programa komertzialak alde batera laga eta horrekin lanean hasi nintzen.
Pena bakarra da programa erabat librea ez izatea, GNU modukoa. Benetan Pierrek, egileak, egindako lana nahiko txukuna baita.
Itzulpenaren aldetik ba, zer esan? Artean hainbeste hizkuntzatan itzulita zegoela ikusita (40 inguru) halako programa txukun bat euskaraz ez egoteak amorrua eman zidan eta lanean hasi nintzen.
Egindako itzulpena orokorrean ez dakit oso "zuzena" izango ote den baina bai esan dezaket, saiatu egin nintzela ahalik eta ulergarrien egiten nahiz eta agertzen diren termino asko oso teknikoak izan eta esanahi zehatzarekin asmatzeko sarri zalantza asko izan.
Jakina, itzulpena ez dago "itxita" inolaz ere, beraz hobekuntzak ongi etorriak izango dira.
Dena dela, barkatu lehenago halako programa bat euskaratuta zegoela ez zabaltzea. Eskerrik asko Luistxo.
Espero dut laister Sustatun eMule, fitxategiak partekatzeko programa, euskaratuta dagoela idaztea. Orain hortan ari naz eta.
Bestalde, halako programa "txikiak" itzultzea ez da oso lan handia eta bi edo hiru pertsonen artean ti-ta batean itzulo daitezke irizpide amankomun batzuk jarrita.
Nik uste hortik jo behar dugula euskarak aplikazioetan bere lekutxoa izatea nahi badugu.
Gure artean elkartu eta itzultzeko askeak diren programak, kode askekoak edo XnView lako freewareak, euskaratzen hasi, informatikaren enpresa erraldoiek euskara bezalako hizkuntza batean inoiz etekinik ez dutelako ikusiko.
Gainera, oso esperientzi interesgarri bezain aberasgarriak baditugu aurretik, Google eta Mozilla kasu.
Beraz, horra hor nire gonbitea.
Mila esker barriro.
> XNView doan da, freeware, eta Windows, Linux eta Unix makinetan instalatzen ahal da. Eta gainera euskaraz dago.
MacOS 10-erako ere badago. Hemendik lortu dezakezu.
Eskerrik asko lan hau hartu duenari. Mirestekoa.