Oñatin Herri Antzerkia martxoaren 1ean

Antzezlana:

Oñatiko herriaren historian, Gebaratar kondeen dinastiaren eragina nabarmena izan da. Mende luzeetan jaurerria eta konderria izan zen, berezko lege eta arauekin, Euskal Herrian barneratuta egon arren bizitzako arlo guztietan.

Oñati Gipuzkoan:

Tituluarekin antzeztu genuen lehenengoz antzerki hau, eta konderria izatetik Gipuzkoan sartzeko bidean egin zen bilera famatu hura ekarri genuen gogora.

Agerraldien ordena:

Sarrerako bertsoak, Irakurketa, Eskribaua eta Alkatea, Komisiokoa, Bertsoak, Araoztarrak, Kale baserrikoa, Garagaltzarrak, Zaldunak, Olabartarra, Zubillagakoak, Bertsoak, Gomendiotarrak, Lekunbarrikoa, Mendiko kalekoak, Kale Barrikoa, Bertsoak, Alkatea eta dantzaria,Amaierako bertsoak.

Agertokia:

Antzezlan guztia udaletxeko Areto Nagusia izan nahi duen taulagainean antzeztuko da.

Taula gainean alkatea, zinegotziak eta eskribaua denbora guztian daude, jezarrita eta noizbehinka zutituz. Beste guztiak ikuslegoaren aurreneko bi ilaretan egonik, euren papera antzestera eskenatokira igoko dira, bukatu ahala jaisteko. Artazkoztarrak soilik daude leku nabarmenean, enparantzako eskuineko jauregia beraiena baita.

Hizkuntza:

Oñatiko euskaran antzestuta dago, ahalik eta joskera eta berba herrikoienekin, hizkerako hainbat berezitasun aberasgarri eta hitz propioak aintzat hartuta. Oñatiko berbetaren lekukotzaren atal bat gehiago gera dadin belaunaldi berrientzako.

Antzezlaneko elkarrizketetan tonalitate edo maila desberdinak erabili ditugu: alkateak eta jauntxoak euskara "dotore" edo batu-joerakoa darabilte, kaletar eta baserritarrak herritar xumeena gaur egun Oñatin ahoskatzen den eran, araoztarrek bere ezaugarri batzuk mantendu dituzte, etab.