Ikasketa birtualak hobeto ezagutzen
UEUk antolatutako ikasketa birtualen mintegia, joan den ostiralean, oso interesgarria iruditu zitzaidan. Teleformakuntza, Internet bidezko heziketa, e-learning esaten den hori zen gaia.
Mintegia Donostiako Miramar jauregian izan zen. Gai horretan ba omen dago erreferentzia distiratsu bat unibertsoan: Universitat Oberta de Catalunya-ren erreferentzia (UOC). UOC-en ordezkari nagusietako bat etorri zen Donostiara, jarduera akademikoetarako errektoreordea. Hark esanak interesgarriak izan ziren, baina gauza gehiago ere bai.
Apunte batzuetan hartu nituenak.
- Kakoa, metodo sendo bat da. Proiektu pedagogiko bat, borondatea, eta metodoa (irakaskuntza metodoaren zentzuan, eta antolakuntza sendo edo metodikoaren zentzuan).
- Azpiegituran, behar den oinarri informatikoa nahiko definitua dago.
Bigarren puntua nahiko ondo deskribatu zuen Iñaki Goirizelaiak EHUko Kanpus Birtualeko eredu teknologikoa azaldu zuenean, nere ustez (nere gustorako, bideoari gehiegizko garrantzia emanez). Baina hala ere, lehen puntua, metodoa, da giltza dudarik gabe. Alde horretatik, Josep Coll UOCekoak teknologiaren ñabarduretan sartu barik azaldutako UOC-en eredua oso ona iruditu zitzaidan.
Erakusketa bat ere bazegoen, eta han Euskal Herrian martxan dauden zenbait produktu ikusi genituen.
- HABEren irakaslearen guneak UOC-en teknologia erabiltzen omen du, baina, egiazki, berez, Word dokumentuak trukatzeko mezularitza batetik harantzago ez nion bestelakorik ikusi (hala ere, horren antzeko zerbaiten gainean eraiki badute UOC, lehen nioenagatik izango da, metodo eta borondate argi bategatik).
- Eusko Ikaskuntzak, haren Asmoz fundazioaren bidez, ematen dituen e-ikaskuntzako masterren inguruan, ezer asko esan. Sistemak azpian izan zezakeen funtsa non zegoen ikusterik ez nuen izan, edo ez zidaten azaldu.
- Santurtziko Udal Euskaltegiaren Gela Irekiak gorago esan dudana adierazten du ederto: posta-elektronikoa eta HTML orri arruntak baino apenas gehiagorekin, proiektu interesgarri bat osatu dute, ia teknologiarik gabe, baina borondate metodiko argi batekin dihardute.
- Mondragon Unibertsitateko HUHEZI fakultateko online ikastaroez, berriz, funtsa eta teknologia, benetan uztartuta dituztela esango nuke. Plataforma sendo eta ondo pentsatua daukatela ikusten da, fakultateak berak Ihardun enpresarekin egina.
Eta UEU bera zertan dabil honetan? Ba itxura batean UOC-ekin aliantza estrategikoren bat jorratu nahian, tartean Eusko Jaurlaritzaren inplikazioa lotzeko eginahalak direlarik... Eta ez dut honekin sekreturik hausten, Josep Coll UOC-ekoak berak halaxe esan zuelako Egunkarian larunbatean argitaratu zioten elkarrizketan.
Erantzunak
Coll-en hitzaldiko beste gauza bat aipatuko nuke nik, UOC-ko ikasleriaren perfila: tituluduna, eta 27-40 urtetan bitarteakoa. Baita ere ikasketa mota hau egiteko motibazioa: ez titulua ateratzea (ohiko unibertsitateko ikasleak bezala), baizik eta jakintza areagotzea.
Euskal Herrian gertatzen den aldaketa demografikoa ikusirik, eta baita ikastoletako ikasleak ere ikasleri mota berri hori handitzen ari direlarik, uste dut UEUk, Bartzelonako UOC bezala, UEUnet martxan jarriko duenean kontutan hartu beharko luke jende multzo hori, eta euskarazko e-ikasketara erakarri.
Zure mezua irakurri ondoren bi puntu zehaztu nahiko nituzke HABEren esperientziari buruz. Batetik jarri duzu "UOC-en teknologia erabiltzen omen duela", eta bigarrenik "Word dokumentuak trukatzeko mezularitza dela". Bi puntu horiek zehaztu nahiko nituzke.
1. Irakaslearen guneak UOC-en teknologia erabiltzen du. HABE-k UOC-ek duen plataforma bera erosi zion Solutions-Ideari, UOC-en sareko enpresari).
UOC-en teknologia erabiltzeaz gain UOC-en eredu pedagogiko bera erabiltzen du. Horretarako hainbat ikastaro antolatu izan dira HABEko teknikariak prestatzeko eta edukiak ere UOC-ek diseinatutako eredu eta metodologiari jarraiki diseinatu dira.
Antolatutako ikastaroen artean adibidez, bi hauek aipatuko nituzke:
- Curso de diseño y creación de Materiales Didácticos Multimedia
- Curso de Formadores on-line.
2. Edukiei dagokienez, HABEk martxan duen Ikas-materialen diseinua on-line izeneko ikastaroari buruz bakarrik esan Word dokumentuak ez direla. HTML formatuan sortutako ikas-materialak dira. Multimedia fitxategiak ( mp3 eta mpg ) CDetan banatzen dira.
Ikas-material hauek UOC-en eredu pedagogikoaren arabera sortu dira, UOC-ek berak HABErentzat bereziki prestatutako maketa edo ereduari jarraiki eta UOC-en teknikariak ikuskatzaile zirela.
Plataformak duen mezularitzan edozein dokumentu trukatu daiteke (Word, PDF).
Bukatzeko, bakarrik esan, guk UOC-en eredua ezagutzen dugun aldetik, gure iritziz eredu UOC-en arrakasta eredu pedagogikoaren baitan dagoela eta ez horrenbeste teknologian. Teknologia pedagogiaren zerbitzuan dago eta ez alderantziz, informatikaren munduan askotan gertatzen den bezala.
Autoerantzun bat...
Josep Coll UOC-ekoaren mahai berean tokatu zitzaidan Mintegiko bazkarian, eta pasadizo majo bat kontatu zigun mahaian. Deitu zioten behin, guraso elkarte batetik, ea hitzaldi bat emango ote zuen. Eta gaia jarrita eman zioten, izenburu honekin zehazki: "Teknologia berrien arriskua familiaren etxean". Horrela jarrita, hitzaldiaren intentzioa norabide nahiko markatuarekin geratzen zen, baina erronkari eutsi zion Collek.
Joan zen bada, eta hasi zen: "Tira, arriskuez berbetan hasi baino lehenago, galdera bat egingo dizuet: zuetarik zenbatek afaltzen du seme-alabekin batera etxean?". Bakanen batzuek altxatu zuen eskua. "Bueno, ahal izaten dudanean", esan zuen norbaitek.
Eta horixe da koxka, beraz. Gurasoek ez badugu etxean "programa propioa" ezartzen, edo "programa erakargarria" jartzen seme-alaben aurrean, Play Stationak, telebistak, edo ordenagailuak jarriko dute geurea baino programa interesgarriagoa, eta umeak haietxetan ibiliko dira.
Gurasoak omen gara arriskua...