Teknologia albisteak

Kolore bila zure negoziorako?

Dick Turpin

2002-11-08 : 12:11

Badago kolore egokirik negozio jakin batentzat? Gero eta enpresa gehiagok koloreak erabiltzen dituzte, eta hauei darien zirrarak, bereizteko antzeko zerbitzuak eskaintzen dituzten enpresetatik.

Orain zenbait urte Benetton enpresak kanpaina bat abiatu zuen, non azpimarratzen baitzuen abantaila bat bere lehiakideen aurrean: tindatzen zituen bere arropak, prestatu eta gero. Xehetasun tekniko hartatik sortu zen esaldi bat, United Colors of Benetton, laburbiltzen duena enpresaren filosofia kolore askokoa.

Orain ehun urte baino gehiago Finantial Times egunkariko sortzaileek aukeratu zuten sepia kolorea bere paperarentzat, zuria garestiegia ateratzen zitzaielako. Diruak eragindako erabaki hura bihurtu da, denborarekin, FTren eta egunkari ekonomiko gehienen marka irudia, ia guztiak kolore horretan argitaratzen dira eta.

Hona hemen bi adibide, erakusten dutenak koloreak zer garrantzi duen marka lantzeko orduan. Enpresa bateko bezeroek hizkuntza eta ohitura oso desberdinak dituzten honetan, koloreak bihurtu dira esperanto komertzialak. Ez da elementu bakarra, baina kolorea ezinbesteko elementu bihurtu da marka baten nortasunean eta publizitatean. Ez da txiripa: haurtzaindegietan umeek ikasten dute koloreak uztartzen, horrek erraztu egiten baitu oroimena.

Koloreak inguruko enpresetan

Lortzen baduzu jendeak lotzea zure enpresaren izena kolore bakar batekin, aurreratuko duzu diru mordoa publizitatean eta emango duzu azalpen askoz gutxiago, zeren koloreak sentsazioak pizten baititu eta, azken batean, horrek mugitzen baitu jendea.

Begira nola jokatzen duten telefono enpresa hauek: Telefonicak kolore urdina aukeratu du, egonkortasuna eta heldutasuna adierazteko. Vodafonek, aldiz, gorria nahiago, gaztetu nahi du-eta bere irudia. Euskaltelek, berriz, laranja egin du bere, kolore distiratsu, atsegin eta beroa, adituen iritziz. Harrigarria bada ere, orain arte laranja zen produktu merkeen kolorea; gaur, ordea, boladan dago, bereziki Euskal Herrian.

Heineken garagardoak gogor egin du berdearen alde, kristalezko botila askoren kolorea. Eta zein horiagoa Espainiako Correos y Telégrafos enpresa baino? Ez du zerikusirik, hala ere, Freixenet konpainiaren urre korporatiboarekin. Azken honek luxua adierazi nahi du kolore horren bitartez.

Baina bada, ortzadarrak bezala, denetik apur bat duenik ere. Konparazione, Google bilatzailea. Eta ez da itsusia, alajaina!

Kolorearen zirrarak

Poetak aspaldi esan zuen: esadazu kolore bat eta berehala esango dizut triste ala pozik zauden. Izan ere, askotan izendatu ditugu sendimenduak koloreen bitartez. Gaur egungo marketinean ere, halako identifikazio bat egiten da. Hona hemen zenbait adibide.

GORRIA: grina, gaztetasuna, kikitzapena, arriskua, sexua.
URDINA: konfiantza, lasaitasuna, formaltasuna, armonia.
HORIA: alaitasuna, argitasuna, adeitasuna, prezio ona.
LARANJA: distira, bizitasuna, adimenaren jarduera, bateragarritasuna.
BERDEA: izadia, oparotasuna, baretasuna, hausnarketa.
MOREA: duintasuna, espiritualtasuna, erregetasuna.
LARROSA: leuntasuna, segurtasuna, gozotasuna.
ZURIA: garbitasuna, bakea.
BELTZA: sofistikazioa, dotoretasuna, limurtzea, misterioa.
URREA eta ZILARRA: ospea, luxua, hoztasuna.

Erantzunak

Peru Basarte

2002-11-08 : 13:43

Koloreak ez dira ulertu beti eta leku guztietan berdin. Orain zenbait urte, 1992an, Patziku Perurena idazleak liburu zoragarri bat idatzi zuen, Koloreak Euskal Usarioan, Erein argitaletxean, eta han ikuspegi oso bestelakoa ematen du koloreen gainean. Balio lezake, kontrapuntu moduan.

Beltza. Kolore beltzak sinbologia unibertsalean, umotze, usteltze, desegite eta desagertze egoerak adierazten ditu. Gurean ere beste horrenbestetsu. Baina, badu beste berezitasunik ere. Guretzako ezinaren eta ezaren kolorea ere beltza izan da; gorriaz gainera, jakina. Bati baino gehiagori aditua nago ni neroni: egun guztian lanean, eta jateko aina ezin atera: beltza da gero hau, beltza denez! eta antzeko esaldiak. (22. or.)

Berdea. Euskaldunentzako, ordea, berdea kolore aski arrotza izan delakoan nago, eta bestela, ordezkotzat Sabino Aranak asmatu behar izan zuen orlegi bitxi hura lekuko. Aranak, euskal testu zaharretan berdeak usario nabarmena bazuenik ez zekielako sortua ez ote zuen izanen orlegia. (60. or.)

Gorria. Euskarak aidean pintatu zuen koadro ttiki bezain oparoan ere, gorria dela esanen nuke nik, sinbolismorik ugariena duena. Guretzat gorria beharraren, nekearen eta ezinaren kolorea da batik bat. Horregatik erabiltzen ditugu behar gorria, premia gorria, egun gorria daukagu bihar, neke gorritan ibili, istilu gorriak ikusi, gorrialdi latzak pasa eta antzeko esamoldeak. (88. or.)

Horia. Koloreei buruzko euskal tradizio zaharrean, horia ez da inon ageri, ez leku izenetan ez bestetan. Mendebaleko zazpi koloreen mailaketan azaltzen den horiak, gurean ez du azterrenik utzi. (128). or.)

Urdina. Zalantzarik gabe, urdina kolore nahasia izan da euskal usarioan. Izan ere, mendebaleko tradizioko urdin hutsa, purua eta birjina adierazteko erabiltzen ditugun zeru kolorea, azula, blua eta antzeko hitz modernoak oso berandu sartuak baitira gure usario zaharreko urdinaren aldean. (157. or.)

Jon

2002-11-08 : 16:30

Dick Turpinek hurbilago begiratu beharko zukeen gure enpresen koloreak aipatzerakoan. Eta ikusiko zukeen askotan ez dela nahikoa kolore bat erabiltzea helburu bat edo sentsazio bat lortzeko. Kolorea inportantea da, baina badira beste elementu batzuk laguntzen dutenak, tipografia kasu. Akaso inork ikusten du grina, gaztetasuna, kikitzapena, arriskua edo sexua MCC korporazioaren gorrian?

Badira gure artean, bestalde, ikurriñaren koloreak kolore korporatibo bihurtu dituztenak, esate baterako BBK Nire gusturako, kolore larregitxo elkarri burruka egiten.

Eta bada, azkenik, gure artean ere urrea eta beltza ederto asko erabiltzen duenik bere koloreetan, hala nola Code & Syntax enpresa eibartarra. Eibarko estiloa esan beharko, estilo dotorea.