Posta zerrendak euskaraz sor daitezke

Taldeak.com da zerbitzuaren izena. Euskalerria.org webposta sistemari lotua dago sistema berria, eta euskalerria.org-eko kontua behar da, nonbait, zerrendetan parte hartzeko.

Plazagunea enpresako Andoni Sagarnak hala azaltzen zuen UNI gehigarrian zerbitzuaren nondik norakoa:

Joan zen astean jaio zen posta-taldeentzako euskarazko lehen gunea. Jakina denez, posta-talde batean, antzeko interesak dituzten pertsonak biltzen dira, komunean dituzten gaiez hitz egiteko. Erabiltzen den komunikazio tresna posta elektronikoa da; baina talde bereko kide direnek, beste kideek igortzen dituzten mezuak jasotzen dituzte, eta aukera dute beste kide guztiei beren iritziak, kezkak, galderak, etab. adierazteko. Interneten milaka posta-talde daude burutik pasa litezkeen gai guztiei buruz, baina, orain arte, ez da izan tresnarik, euskarazko posta-taldeak, libreki eta doan, web bidez sortu eta erabiltzeko.

Jaio berri den hau, web bidezko postaren senidea da. Posta-zerbitzu honetan izena eman dutenek ez dute berriro izena eman beharrik; izan ere, postan erabiltzen dituzten erabiltzaile-izen eta pasahitz berberak erabiliz sar daitezke, eta zerbitzua erabiltzen hasi.

Erabiltzaileak aukera du lehendik sortuta dauden taldeetako kide izateko, eta baita nahi dituen talde berriak sortzeko ere. Lehendik sortuta dauden taldeak zein diren jakiteko, ez dago izena eman beharrik: aski da izena eman talde batean estekan klik egitea, eta, eragiketa hau burutzeko izena eman behar dela dioen mezu bat agertzen den arren, taldeen zerrenda irteten da. Dagoeneko talde mordoxka dago sortuta: bertsolaritza, euskal musika, arkitektura, futbola, arrauna eta beste hainbat gai hizpide hartuta.

Badirudi, harrera ona izan duela ideiak. Jendea erraz animatzen da, nonbait, talde bat sortzera. Izan ere, tresna erakargarría da. Hori bai, berehala ikusiko dugu batzuek sekulako arrakasta dutela; eta beste batzuk, aldiz, hilda jaio direla edo endekatzen direla. Zein da arrakastaren gakoa? Galdera ona eta erantzun zaila. Hala ere, zenbait gomendio, behintzat, eman genitzake.

• Gaia ongi definitu. Kide egiten denak hasieratik jakin dezan zein den gaia. Horrek gaiari buruz benetan interesa dutenak erakarriko ditu, eta interesik ez dutenak, batez ere endreda-makilak, uxatuko.
• Ongi pentsatu zer motatako taldea sortu nahi den. Taldeak izan daitezke irekiak edo itxiak, alde batetik, eta moderatuak edo moderatu gabeak, bestetik, Gauza guztiek dituzte beren alde onak eta txarrak. Taldea irekia eta moderatú gabea baldin bada, askatasuna erabatekoa da; eta hori ederra da, baina mezu desegokiak eta jende gogaikarria taldean izateko arriskua ere handia da. Itxia izateak aukera ematen du, kideak onartu baino lehen, pixka bat, bederen, ezagutzeko. Moderatua izateak aukera ematen du, mezuak argitaratu aurretik, edukia ezagutzeko. Moderatzaile izateak, batetik, lana hartzea esan nahi du; eta, bestetik, mugak salbuespen gisa bakarrik jartzea , zentsorea ez badu izan nahi. Arrakasta izateko onena da, taldea moderatzaile liberala izatea.
• Errespetuzko giroa sortu. Gizalegez jokatzea ezinbestekoa da arrakasta izateko, mundu errealean bezala. Horretarako, joka ezazu bestek zurekin jokatzea nahi zenukeen bezalaxe.
• Posta sarri ireki, eta astia hartu mezuak irakurtzeko eta lehenbailehen erantzuteko.
• Pentsatu taldeko Kide guztiek irakur dezaketela zure mezua; ez dela postako mezu pribatu bat bezalakoa. Estiloak jendaurrerako egokia izan behar du.
• Gonbidatu kide egokiak izan daitezkeenak parte hartzera.
• Idatzi labur, txukun eta purrustadarik gabe.
• Mezu bati erantzuten diozunean, jatorrizkoaren atal adierazgarri bat bakarrik utzi.
• Mezu bakoitzean gai bakarraz hitz egin; ez nahaspilatu gaiak.
• Beste batzuen mezuak ez erabili, egilea aitortu gabe edo edukia aldatuz.
• Mezuetan ez sartu ezer iraingarririk edo gezurrik. Jokatu zuhurtziaz.
• Inori kargu hartu behar zaiola uste izanez gero, adierazi moderatzaileari, eta ez hasi zuzenean ika-mikan.