Kalean da Haur Txikientzako Liburu-gida
Haur Liburu Mintegiak Haur Txikientzako Liburu-gida aurkeztu du Humanitate eta Hezkuntza Zientzien Fakultatean, Eskoriatzan. Orain arte kaleratu duen hirugarrena da eta aztertzen ditu 1995etik 1999ra euskaraz eta gaztelaniaz kaleratu diren libururik onenak, sei urte arteko haurrentzat.
Haur Txikientzako Liburu-gidak 107 orrialde ditu eta 208 liburu aztertzen ditu, denak sei urte arteko haurrentzat eginak. Gehienak, 141, gaztelaniaz argitaratu ziren eta gainerakoak, 67, euskaraz.
Irakurketa errazte aldera, lau ataletan sailkatu dituzte liburuok gidaren arduradunek:
- Irudi liburuak. Kontakizunak narratzera bultzatzen dituzten liburuak sartu dira hemen.
- Objektu liburuak. Ludikotasuna lantzen duten liburuak, diseinua erabilita.
- Ipuin eta alegia klasikoak. Kontuak, ipuin zaharrak, mitoak, legendak eta alegiak.
- Poemak, kantak eta igarkizunak. Hitza zaintzeko aproposak diren liburuak.
Atal bakoitzean liburu gomendagarriak eta liburu oso gomendagarriak bereizten dituzte egileek. Azken hauek dakarte sinopsi txiki bat, euskaraz eta gaztelaniaz, eta iritzi labur bat. Gida errazago erabiltzeko, gainera, hiru aurkibide dakartza azken orrialdeetan: autoreen aurkibidea, tituluena eta gaien araberakoa. Egileek interesgarria iritzi diote gaien araberako aurkibidea eskaintzea, kontuan hartzen badugu oraintsu arte tabu izan diren hainbat gai hasi direla agertzen azken urteotan. Esaterako, heriotza, gerra, arrazakeria, bakardadea, gurasoen hutsunea, etab..
Hamar gomendio, haur txikiak zaletzeko irakurtzen
Amaiera-amaieran, egileek hamar gomendio ematen dituzte haur txikiak nola zaletu irakurtzen:
- Jarri haurra liburuekin harremanetan, lehen urtetik beretik.
- Zuk zeuk irakurri, errazagoa baita zaletzea liburuetara irakurtzen den familietan.
- Sartu liburu dendetan eta liburutegietan, haurrekin batera.
- Erosi liburuak urte osoan zehar.
- Kontuan hartu ilustrazioak, zenbait liburutan garrantzi handia dute eta.
- Erosi ahalik eta libururik bariatuenak.
- Aukeratu istorioak, hurbil egongo direnak haurraren bizi egoeratik.
- Jakin haurrak zer nahi eta gustu dituen eta kontuan hartu liburuak erosterakoan.
- Goza ezazu zeuk haurrari eskaintzen dizkiozun liburuekin.
- Erosi ezezik, irakurri eta kontatu liburua
Haur Liburu Mintegia
Pello Añorga ipuin kontalari ezagunak aurkeztu zuen Haur Txikientzako Liburu-gida, bera baita, Nerea Alzola irakaslearekin batera, argitalpen horren arduradun nagusia. Bien artean eraman izan dute hasiera-hasieratik Haur Liburu Mintegiaren ardura.
Erantzun
Sartu