Ego Ibarra webgunea: Eibarko ondare historiko eta kulturala Interneten

Egoibarra.com

Ego Ibarra Batzordearen helburua Eibarko ondare historiko eta kulturala jaso, gorde, aztertu eta zabaltzea izanik, ekimen honen bitartez bide berri bati heldu nahi izan dio. Gure herriaren ondarearen zabalkundean bide ugari jorratu baditu ere, orain arte liburugintzari, erakusketei eta ikerketei eman izan zaie lehentasuna; hemendik aurrera eta garai berriei egokitzeko asmoz, Ego Ibarra Batzordearen magalean gauzatzen diren lanak, ikerketak eta bertan aztergai diren beste kontu interesgarri batzuk web-gune honetan ikusgai egongo dira.

Hasiera batetik Ego Ibarra Batzordeak argi ikusi zuen berandu baino lehen interneteko erronkari heldu behar zitzaiola, eta zentzu horretan seriotasunez eta gogo handiz ekin zion lan honi. Informazioa jaso eta aztertzeko hainbeste bide desberdin dauden sasoi honetan, ezin utzi aukera hau landu gabe.

Web-gune honek bi atal nagusi ditu: Ego Ibarra eta Eibar. Lehenengoan udal batzordearen jardunaz hitzegiten da: helburuak, antolatutako erakusketak, produktuak.... Bigarrengoan, Eibarko ondare kulturala eta historikoa dira hizpide: Eibarren kokapena eta historiaz azalpenak ematen ditu, Eibarren garrantzi berezia izan duten lau lanbidek ere txoko berezia dute (armak, grabatuak, txirrindulak eta josteko makinak), eta Eibar hobeto ezagutzeko ibilbide batzuk ere aurkezten dira.

Ezin aipatu gabe utzi, atal desberdinetan Eibarko Udal Artxiboak kudeatzen dituen Argazki Fondoetatik (Castrillo-Ortuoste eta Indalecio Ojanguren) ateratako argazkiak aurkituko ditugula, idatzizko informazioaren osagarri.

Ego Ibarraren web-gunea eibartar guztiei eta gure historia eta kulturan interesatua dagoen edonori zuzendua dago. Bertan lantzen diren gaiak, ikusgai/entzungai dauden atalak, beraien antolaketa eta webgunearen itxura kontuan izanda, edonor (nagusi nahiz gazte, aditu zein zaletu) gertura daiteke sail desberdinetan ematen den informazioa aztertu eta erabiltzera eta besterik ez bada ere, eskaintzen den materialarekin gozatzera.

Eibarko Udalaren Ego Ibarra Batzordeak berehala martxan jarriko duen gune hau, erabiltzeko oso erraza da. Egin behar den gauza bakarra, bertara sartzea da eta bakoitzak nahi duen erritmoan gai batetik bestera jotzeko aukera izango du; Republika sasoitik armagintzara, txirrindularitzatik Eibarko baserrietara. Guzti hori "klik" bakar bat eginez. Internet erabiltzen ikasi berri dutenentzat edo oraindik horretara animatu ez direnentzat ere, hainbeste aukera eskaintzen dituen mundu berri horretan nabigatzen hasteko aukera polita izan daiteke.

Web-gune hau Eibarko Udaleko Ego Ibarra Batzordeak egin du, Udal Artxiboaren laguntzarekin. Softwareaz eta diseinuaz Code & Syntax enpresa eibartarra arduratu da.

Gune hau egiteko Zope izeneko sistema guztiz aurrerakoia erabili da eta Euskal Herri osoan Ego Ibarrarena bezalako beste 10 web-gune baino ez ditugu aurkituko. Gune honek duen oinarri informatikoa ez da interneten erabiltzen den sistema tradizionala; Ego Ibarraren web- gunea eraikitzeko erabili den sistema, dinamikoa da, ez da estatikoa. Sistema honi esker, artikulu, irudi eta eduki berrien gehikuntza oso azkar eta erraz egin daiteke, informatika ikastarorik egin beharrik gabe. Beraz, ezin pentsa www.egoibarra.com zerbait itxia denik, betiere edukiak eta informazioa gehitzen joateko aukera egongo da eta.

Hizkuntzaren jestiorako ere tresna aurreratua da, erabiltzailearen hizkuntza personalizatuan azaltzen ditu edukiak, eta artikuku berbera nahi beste hizkuntzatan gehitzeko aukera ematen du.

Ezaugarri tekniko hauei esker, Ego Ibarraren web-gunearen hasieran gaudela esan dezakegu, garapen jarraitua izango duen gunea izango bait da.

Ego Ibarraren web-gunea atalez-atal:

Web-gune honek bi atal nagusi dituela esan dezakegu, Eibar eta Ego Ibarra. Hirugarren atal batean, web-gunearen inguruko informazioari tartetxo bat egiten zaio (web-aren mapa, hizkuntzak, harremanetan jartzeko aukera).

Ego Ibarra atalean, honako gaiak aurkituko ditugu:

• Ego Ibarra. Ego Ibarra Batzordearen berri ematen da (noiz sortu zen, helburuak zeintzuk diren, e.a)
• Argitalpenak. Herriko ondare historiko eta kulturala zabaltzeko asmoz, Eibarko Udalak arreta berezia eskaini die argitalpenei (liburuak, katalogoak, erakusketak, bideoak...). Aipatzekoa da, besteak beste, Euskara Sailak, Kultura Sailak eta Ego Ibarra Batzordeak egindako lana. Guztira 50 izenburutik gora dira udal honek orain arte kaleratutakoak. Atal honetan orain arteko argitalpen guztien berri ematen da, eta batzuk irakurtzeko aukera ere badago on- line atalean.
• Erakusketak. 1995tik antolatu diren erakusketen inguruko informazioa ematen da eta erakusketa bakoitzaren bideoa ere ikusgai egongo da.
• Fondoak. Beste eginkizun batzuen artean, Ego Ibarra Batzordea agiriekin eta bestelako elementuekin osatutako Fondoak jasotzen eta berreskuratzen ere ahalegindu da. Gehienak partikularrek egindako dohaintzak dira (Eibartar ezagunek eta herriko erakundeek herriari utzitako fondoak), eta Udal Artxiboak kudeatzen ditu. Besteak beste: Toribio Etxebarria Fondoa; Castrillo-Ortuoste Argazki Fondoa; Ahozko Bilduma; e.a.
• Ikerketak. Ego Ibarra Batzordea sortu zenetik (1989) gauzatu diren ikerketak eta lanak aipatzen dira. Arreta berezia eskaintzen zaie gaur egun martxan dauden ikerketei (Castrillo-Ortuoste eta Eibartarren Ahotan).
• 2002ko egitaraua. Urte honetarako zehaztuta dagoen ekitaldi programaren berri ematen zaio jendeari (hitzaldiak, liburuak, aurkezpenak, erakusketak eta bestelako ekitaldiak non, noiz, e.a. izango diren).

Eibar atalean, berriz, beste gai hauetan murgiltzeko aukera eskaintzen zaigu:

• Eibar. Herriaren kokapena, izena eta izana.
• Historia. Sail honetan, Erdi Aroa, Aro Modernoa eta Aro Garaikidea aztertzen dira. Horretaz gain, zenbait argazki galeria ere ikus daitezke: Antzinako Eibar; Errepublikaren sasoia; Gerrako irudiak; 1501eko Ordenantza; Eibarko Erdi Aroko Planoak.
• Ibilbideak. Eibarko Kultura eta Natura ondarea erakustea nahi da sail honetan. Eibarrekiko jakinmina asetzeko ibilbide batzuk, eta beraietan barrena, interes bereziko hainbat eraikuntza, elementu historiko, eta naturgune. Guztia, argazkiz hornitua.
• Baserriak eta auzoak. Atal honetan Aginaga, Arrate, Gorosta, Mandiola eta Otaola-Kiñarraga auzoen berri ematen da eta baserrien argazkiak ere ikusgai daude.
• Armagintza. Sail honetan armagintzari buruzko informazioa. Horretaz gainera: Armagintza hiztegia; Armen Bilduma; Armagintzako erreminten bilduma.
• Arte aplikatuak. Damaskinatua, grabatu teknikak eta grabatuen galeriak ikusgai.
• Josteko makinak. Hauen bilakaera lantegi baten izenarekin dago lotuta, Alfarekin; eta Alfarena, Eibarko herriaren historia gertukoenarekin. Atal honetan Alfa koperatibaren historiaren berri ematen zaigu eta josteko makina desberdinak ikusteko aukera ere egongo da, argazki galeria bati esker.
• Txirrindularitza. 3 alor nagusi lantzen dira: Kirola; Aisialdia eta Industria. Sail honetan jorratzen diren gaiak: Bizikletagintza Eibarren; Txirrindularitzaren hastapenak eta loraldia; Txirrindularitzaren beherakada eta gorakada. Horretaz gainera, bizikleten galeria eta karreristen argazkiak ikusgai.
• Idazleak, 1829-1975. Eibarri buruz idatzi den bibliografiaren eta idazle eibartarren datu-basea.

Datu azpimarragarriak:

• 250 web orri baino gehiago biltzen dituen web-gunea.
• Erakusketa desberdinen bideoak ere ikusgai
• 7 bideo, bakoitza 2 minutu ingurukoa.
• Eibartarren Ahotan proiektuari dagokionez, soinu korte batzuk entzungai. Momentuz 21 grabazio zati, bakoitza 2-3 minutu ingurukoa.
• Ego Ibarra-k kaleratutako 4 liburu daude momentuz on-line, saretik jaisteko moduan edo sarean bertan irakurtzeko, dena doan. Liburuak on- line erosteko aukera ere badago, dagoeneko 50 titulu inguru.

Datu-baseak:

• Eibarri eta eibartar idazleei buruz argitaraturiko liburu eta artikuluen datu-basea, 1829-1975 urteak jasotzen dituena. 800 sarrera inguru ditu.
• Armagintzaren inguruko datu-basea. Eibarko "Armeria Eskolako Arma Museo"ko arma bildumaren katalogazioa hartu da oinarritzat. Bilduma horren kudeaketa, gaur egun, Eibarko Udalari dagokio.
• Armagintzako erreminten datu-basea. Eibarko arma-fabrika edo tailerretan 1950. urtea baino lehen erabiltzen ziren erreminta guztien inbentarioa edo datu-basea da bilduma honen oinarria.
• Argazkiak ( 600 gutxi gora-behera)

Harremanetan jartzeko:

Ego Ibarra Batzordea
Eibarko Udala.
Ego Ibarra Batzordea
Portalea. Bista Eder, 10. Eibar

Telf: 943. 20.68.45 (200 luzapena)

Posta elektronikoa: egoibarra.ei@eibar.net eta archivo.ei@eibar.net