Teknologia albisteak

Orioko Udala UEMAn sartu da

Jabier Zabaleta - Orioko Udala. Euskara Zerbitzua

2002-03-12 : 11:03

Orioko Udalbatzarrak, otsailaren 26an egindako bilkuran, Orio UEMAn, Udalerri Euskaldunen Mankomunitatean, sartzea erabaki du. EAJ, EA eta Batasuneko zinegotzi guztiek UEMAn sartzearen alde bozkatu zuten eta PSE-EE-PSOEko ordezkaria, abstenitu egin zen informazio faltagatik.

Gaur egun Hegoaldeko 44 herri euskaldunek osatzen dute Mankomunitatea udal honekin . UEMAn sartzeko herriko euskaldunek %70etik gora izan behar dute. Orion, 1996ko datuen arabera, %82 da euskalduna, eta beste %10 ia euskalduna.

UEMAk 3 helburu nagusi ditu: herri euskaldunetan herritarrek egiten duten bizitza sozial guztia, publikoa zein pribatua, euskaraz izan dadin bideak urratzea; udalerri euskaldun guztiek bat eginik, euskara nagusi izango den lurgunea osatzea; eta udalerri euskaldunen garapen sozioekonomikoa eta soziokulturala bultzatzea.

Mari Jose Garate (EAJ), Itziar Olariaga (EH) eta Eugenio Cotado (EA) zinegotziak izendatu ditu Udalak Orioren ordezkari UEMAren Batzar Nagusirako. Kultura eta Euskara batzordeko buru Mari Jose Garatek UEMAn sartzea onerako izango dela uste du: Euskaraz bizitzea dugu helburu eta UEMAk ere bai. Beraz, ondo etorriko zaigu asmo bera duten herriekin batzea, helburura iristeko indar gehiago izateko; beti ere, erdaldunen eskubideak errespetatuz.

Erantzunak

arantza ugarte

2002-03-12 : 13:10

Aupa Orio. Zorionak hartu duzuen erabakiagatik. Orain ekin gogor. Oriyon egunez eta gabaz, beti euskaraz!

Gotzon Arrasatetik

2002-03-13 : 01:57

Eta? zein eragin praktiko izango du horrek? hau da, entzuna daukat kultura ekitaldietan-eta parte hartzeko zirkuitoak eta abar eginda daudela UEMAko herrien artean.

Praktikoa den aparteko beste laguntzarik badu? Zergaitk eman zorionak Oriori? (galdera hau ez da koña, informazio eskea baizik). Norbaitek esan dezake gehiago UEMAn egotea zergatik den garrantzitsua?

Jabier Zabaleta

2002-03-13 : 09:41

> Eta? zein eragin praktiko izango du horrek?

Hara hor batzuk, bote lasterrean:

1.- Udalak euskararen erabilera plana diseinatu eta jarriko du abian UEMAko Euskara Zerbitzuaren laguntzarekin. Horrela, orain arte 'ataskatuta' eduki dugun gaia bideratuko dugu.

2.- UEMAko herri euskaldunek urtetako eskarmentua daukate dagoeneko udal espedienteak euskaraz tramitatzen eta eskarmentu hori oso baliagarria izango zaigu orain guri (eredu asko sortuta dauzkatelako, arazo asko konponduta...)

3.- Gure herrietan planteatzen diren hizkuntz arazoei era bateratuan erantzun ahal izango diegu, elkarlanean. Adibide bat: Oriok ez dauka eragiteko indar askorik Osakidetzak herrira mediku erdalduna bidaltzen badu; baina UEMAk bai, ehun mila inguru euskaldunen ordezkaritza dauka-eta.

4.- UEMAn sartuta eta horrek dakartzan konpromisoak beteta, Udala hizkuntz normalizazioaren erreferente bihurtuko da herritarrentzat eta herriko taldeentzat, eta horrek eragin biderkatzailea dauka.

5.- UEMAk, bere web orriaren bidez, hainbat zerbitzu eskaintzen dizkio Udalari: profesional euskaldunen datu basea, agiri ereduak, hizkuntza baliabideak...

6.- Normalizazio kanpaina bateratuak egiteko aukera ematen du: merkataritza alorrean, posta zerbitzuenean, elkarteekin...

7.- Zuk aipatutako kultur zirkuitua: Kultur Elejira.

(...)

Garrantzizkoena, hala ere, orokorragoa da, nire ustez: euskaldunen arteko elkarlanaren eredua bultzatzen du UEMAk; eta elkar hartuta, trinkotuta, hizkuntzaren normalizazioan aurrera egin dezakegula erakusten digu.

Gutxi iruditzen?