Warner etxeak ez du bikoiztu nahi “Harry Potter” filma katalanera eta horrek eztabaida piztu du Katalunian

Katalunian Harry Potter sailaren 200.000 liburu baino gehiago saldu omen dira katalanez. Hala ere, AOL-Time-Warner multinazionalak ez du bikoiztu nahi izan lehen filma katalanera. Kataluniako gobernua prest zegoen bikoizketa gastuak ordaintzeko eta horretan saiatu da zortzi hilabetean zehar. Erantzuna, baina, oraintxe jaso du: enpresa amerikarrak orain arteko politikari eutsiko dio, alegia, ez ditu bere filmak bikoiztuko “zabalkunde txikiko hizkuntzetara”, salbu eta Quebec-en. Izan ere, “Harry Potter eta Sorgin-harria” frantsesera bikoiztuko da, eta gastuak Warner-ek berak ordainduko ditu.
Erabaki horrek sutan jarri du jende asko Katalunian, larunbateko “El País” egunkariak argitaratu zuen. UGT sindikatuak, adibidez, leporatu zion Warner etxeari “Kataluniaren herria eta kultura mespretxatzea”. Convergencia i Unió-ren Gazteria Abertzaleak, berriz, dei bat egin zuen filmari boikot egiteko. Kataluniako Udalen Elkarteak ere eskatu die elkarteak biltzen dituen 750 udalei onar ditzatela protesta mozioak Warner etxearen jokaera gaitzesteko. Eta Vilaweb atariak eskatu die erabiltzaileei protesta mezu elektronikoak bidaltzeko AOL-Time-Warner etxera.
Eta zer gerta liteke Euskal Herrian? Hemen 10.000 ale saldu omen dira euskaraz, lehenengo liburuarenak. Beraz, atera kontuak.
Hori ikusita —multinazionalen jarrera, bikoizketaren kostuak eta ikusleen erantzun kaskarra askotan—, beharbada Suediaren eta Finlandiaren bidea aukeratu beharko genuke. Han kanpoko filmak jatorrizko hizkuntzan ematen dira, azpitituluekin.