Teknologia albisteak

LAB sindikatuak Osasungintzan euskaraz bizi eta lan egitearen aldeko bidea urratzera deitzen du

Erabiltzailearen aurpegia
2014-11-24 : 12:33

"Egun gutxi barru Zumarraga Ospitalean erresonantzien unitate berria irekiko du Osakidetzak, Osatek erakunde publikoaren bidez, eta hor ikusi ahal izango da zertan den une honetan Osakidetzaren borondate maila euskararekiko"

Gezurra dirudi osasungintzako langileok 2014. urtean oraindik aldarrikapen hauek egiten ibili behar izatea. Euskaraz lana egiteko eskubide osoa dugu legez, baino eguneroko praktikan Osakidetzak trabak besterik ez dizkigu jartzen. Adibidez, erresonantziak edota ekografiak eskatzen ditugunean erdara hutsean iristen zaizkigu eta historia klinikoa euskaraz betetzeko trabak besterik ez ditugu izaten. Tresna, baliabide eta programa informatiko ugari oraindik erdara hutsez ditugu.

Guzti honek gure lan jarduna euskaraz burutzea oztopatzen du, gure egunaren zati garrantzitsua betetzen duten orduetan euskaraz ezin bizi eta lan egin izatea. Non eta duela 35 urtetik euskara ofiziala den eremuko osasungintza publikoan. Begibistakoa da egoera honen ondorioz erabiltzaileen hizkuntz eskubideak ere kaltetuak direla, osasun dokumentuak, eta zenbait kasutan arreta bera ere, erdara hutsez jasotzera behartuak bait daude erabiltzaileak. Egoera honek arduradun zein erantzule politikoak ditu. Hori dela eta, langilegoari deia egiten diogu, hizkunza eskubideen jabe izanik, hauen bermatzea eskatu dezagun.

LAB sindikatuak gai honetan euskara gutxienik gazteleraren parean kokatzea exijitzen du. Ezin dugu onartu gaztelera izatea lan-hizkuntz “arrunta” eta euskaraz lana egin ahal izateko eskaera “bereziak” egin behar izatea langileok edota erabiltzaileak.

Gogoratu behar da Osakidetzako 2. Euskara Planean datorren puntuetako batek dioena: “zerbitzu-erakundeek laguntza eskeiniko diete dokumentazioa euskaraz sortzeko prest dauden langileei”. Beste hainbat puntutan gertatzen den moduan, kasu honetan ere Euskara Planean jasotakoak ezeresean geratzen ari dela ikusten ari gara. Laguntzak, formakuntza, bitartekoak, jarraipena, arduradunen erantzunkizuna... ez ditugu inondik ikusten.

Egun gutxi barru Zumarraga Ospitalean erresonantzien unitate berria irekiko du Osakidetzak, Osatek erakunde publikoaren bidez, eta hor ikusi ahal izango da zertan den une honetan Osakidetzaren borondate maila euskararekiko. Unitate berri horrek hasera haseratik osasun dokumentazioa elebitan eskaini beharko luke. Izan ere, langileon eta erabiltzaileon hizkuntz eskubideak urratuko dituzten unitate berriak sortzea ezin dezakegu onartu. Bestalde, egun gutxi barru emango du ezagutzera Osakidetzak Historia Klinikoa euskaraz bete ahal izatearen inguruan bere proposamena. Euskara Planeko hitz politez haratago normaltasunez euskaraz lan egin ahal izateko bideak irekitzea besterik ez dugu espero.

LAB sindikatuak deia luzatzen dio osasungintzako langilegoari euskaraz bizi eta lan egitearen aldeko bidea urratu dezagun. Egunerokoan lana euskaraz egin, horretarako dugun eskubidea errespetatu arazi eta Osakidetzari beharrezkoak diren bitartekoak jartzea eskatu diezaiogun. Proba grafikoak, erresonanziak, historia klinikoak, informatika aplikazioak, lan bitartekoak... euskaraz nahi eta behar ditugu, langileon euskara ezagutza bermatu eta erabilera sustatzeko bitartekoak eta plangintzak behar dira urjentziz Osakidetzan.

Euskaraz bizi nahi dugun langile eta erabiltzaileon eskubideak errespetatzea eskatzen dugu, ez besterik.

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago