Kostas Lapavitsas: Grezia eurotik irtetea da aukera bakarra

Uztailaren 16an hitzaldia eman zuen ingelesez Atenasen, ikasle eta irakasleentzat,  "Ezagutu dugun munduaren amaieran" jardunaldien barruan. Bere tesia: Greziarentzat, eurotik irtetea da aukera bakarra. Aldi bereko itzulpena egin diot (bideoa erabiliz, ez nintzen bertan izan), eta euskaraz entzun dezakezu beheko estekan. Ordu erdi irauten du. Gero galdera erantzunak egon ziren, eta oso debate sutsu eta bizia. Ingelesez The Real News Networkek zabaldu du eta hemen dago osorik.

Hitzaldian Lapavitsasek lehendabizi azaltzen du zertan den Greziak sinatu berri duen erreskate akordioa, eta zergatik den txarra; gero digresio bat egiten du diruaren historia eta izaerari buruz, azaltzeko euroa benetan zer den, eta hortik abiatuta, zergatik den ezinezkoa aldaketa soziala Eurogunearen barruan eta zergatik izan den, eta den, okerra ezkerraren estrategia; hurren, azaltzen du zein zen bere ustez Sirizako gobernuak eduki zezakeen jokaera koherente bakarra eta zergatik; azkenik, bere proposamena azaltzen du: eurotik irtetea, eta zein den horretarako plana, puntuz puntu.

Oharra: hitzaldia biziki interesgarria da, baina, horretaz gain, ni bezala oratoriaren forofoak bazarete, uste dut estimu handian izango duzuela.

• Lapavitsasek oso ondo egituratutako hitzaldia egiten du, eta oso hizkera argia eta ulergarria darabil (ezinbestekoak diren teknizismoak gorabehera);
• hitzaldiaren atal bakoitza oso ondo bereizten du ("signposting"-a erabiliz, hau da, esplizituki identifikatuz zertaz hitz egingo duen atal bakoitzean, eta zer egingo duen: dagoeneko aipatutako ideia bat garatu, ideia berri bat plazaratu, digresio bat egin...;
• ideia bakoitza azpi-ideien bidez garatzen du, eta datuez eta xehetasunez ilustratu;
• amaieran bere tesia gogoratu eta azpimarratzen du aipamen "poetiko" batekin;
• hori guztia, ahoskera argiaz, pausak egoki erabiliz, eta ahotsaren bolumena eta doinua ondo doituz enfasi egokirako;
• hori guztia, denbora zainduz (ordu erdia baino gutxixeago da) eta
• hori guztia, irakurri gabe, zeinarekin doinua ezinbestean naturala den, ulergarritasunaren eta interesgarritasunaren mesedetan (ez du audientzia lotara bidaltzen!).

Baina gainera, eta hau da harrigarriena, dirudienez (halaxe dio jatorrizko bideo luzean, bere hitzaldia hasi aurretixe), hitzaldi INPROBISATUA da!! ("this was unplanned, it is a cameo appearance").

Oh là la! Halako hizlaririk!!

Barkamena eskatzen dizuet aldez aurretik nire interpretazioak halako jardun zoragarriari kenduko dion distiragatik.