Molac legea, hizkuntza txikien aldekoa, onartu du Frantziako Asanbleak

Asanbleak onartu arren, eztabaidan entzun den egungo gobernuaren ahotsak, Jean-Michel Blanquer Hezkuntza ministroarenak, gogor egin du proposamenaren aurka, eta murgiltze eredua eta umeen bazterketa eta isolamendua lotu ditu eztabaidan.

Legeak aurrera egiten badu (helegiteak espero baitira) murgiltze eredua Frantziako Hezkuntza Kodean sartuko da, eta hala, eskola publikoetan euskarazko eskaintza segurtatu beharko da. Irakaskuntzaren esparruan, beste puntu hauek ere baditu legeak:

• Hizkuntza gutxituen irakaskuntzaren eskaintza orokortzea ekarriko du.
• Hizkuntza gutxituetan irakasten duten eskola pribatuen diruztatzea ere indartuko du: eskola elebakarrak dituzten herrietako haurrak ondoko herri bateko ikastetxera joan behar badira sail elebidunean ikasteko, ikastetxe horiek diruztatu beharko dituzte herriko etxeek.

Legearen beste ondorio administratibo batzuk dira seinaleztapen elebidunaren guztizko legeztapena (ez derrigortasuna, baina bai erakundeen esku egotea halakoak ezartzea trabarik gabe), eta izen-deiturak idazteko orduan, zeinu diakritikoak dituzten izenen onarpen ofiziala: Ñ hizkia bretoieraz eta euskaraz agertzen delarik, arazoak izan ditu familia batek semeari Fañch deitzeko.

Euskal Konfederazioaren hitzetan, «badira urteak murgiltze eredua plantan ezarria dela eskola publikoan. Irakaskuntza molde hau Ipar Euskal Herrian da bereziki arrakastatsua, 20 eskola publikotan garatua baita, esperimentazioaren baitan. Hemendik goiti, murgiltze eredua garatzen segitzen ahalko da baina pisua den esperimentazio dispositibotik pasa gabe. Esperimentaziotik irakaskuntza arruntera pasatzen gara».

Legearen nondik norakoez informazio gehiago hemen.