Facebook-eko mapa berriak, txukun euskaraz
Facebook-ek berritu egin ditu mapak erakusteko modua, eta oinarri bezala OpenStreetMap (OSM) plataforma librea aukeratu duenez, horren ondorioetako bat izan da OSM-ko euskarazko termino eta toponimoak agertzen direla mapetan txukun, baldin eta Facebook euskaraz erabiltzen baduzu.
Stamen izeneko konpainiak egin du egokitzapen lana, alderdi estetikoak zainduz, eta Facebook-ek web interfazean zein mugikorretan erakusten dituen mapa adibide mordoarentzako soluzioak diseinatuz. Hemen egin dutenazalpena.
Artikulu horretan ez zegoen hizkuntza bertsioen aipamenik, baina Gari Araolaza CodeSyntax-eko ingeniariak susmatu du seguruenik aprobetxatuko zutela OSM-ren eleaniztasuna. Eta bai, hala da, ez bakarrik hizkuntza handien kasuan baizik eta, suposatzen dugunez, Facebook-eko lokalizazio guztietan. Horien artean euskara dagoenez, mapa berriak ere euskaraz.
Eta bai, hala daude, toponimiaz gain, jaitsi herri bateko kale artera eta kaleen izenak ere euskaraz (baldin eta OSM-n hala badaude). Goian adibide bat, Araolazak Eibarko jatetxe bat bilatuta ireki duen maparena. Oinean ageri den hitzetan irakurriko duzue helbide postalean bajo hitza eta Éibar gaztelerazko azentuarekin ageri direla: hori da geokokapena gauza bat delako (eta horretan, ematen du informazio postala gazteleraz darabilela Facebook-ek), eta bestea maparen marrazketa, orain berritu duten kontua.
Lokalizazioa exonimoetara ere hedatzen da. Palentzia edo Tolosa (Okzitaniakoa) euskaraz agertzen dira Facebook-en orain. Euskaratuta badaukazu, noski.
Era berean, Euskal Herriko parte askotan OSM-n agertzen den toponimia eta kale multzoa euskaraz bakarrik egonda, Facebook erdaraz darabiltenek ere euskarazko toponimia topatuko dute geurean.
Bestalde, Stamen-ekoen artikuluan irakurri dugunez, aprobetxamendua ez da bakarrik OSM > Facebook norabidekoa. Facebook-ek darabilen datu multzo handitik, Daylight Map azpiegiturako datuak ere integratu dira OSM-n. Era berean, jakinarazi da Facebook-ek MapWith ekimenean kolaboratzen ari dela: honen helburua da satelite irudietatik munduko eskualde gutxi kartografiatuetan mapa erabilgarriak lortzea, lurraren erabilpenak, bide eta errepideak, eta giza-asentamenduan mapetan jarriz.
Facebook munstro handi bat da, bai, baina tira, hemen probetxuzko kolaborazio batean ari direla dirudi, eta bide batez, euskaraz ere ikusi dugu emaitza.
Erantzun
Sartu