Teknologia albisteak
30

Veleiako komun moderno batzuetako hitzak eta ostraka batzuetakoak esku berberak idatziak dira

Erabiltzailearen aurpegia
Sustatu
2010-02-01 : 11:02

Berria egunkariak erreportaia zekarren joan den larunbatean Veleiako idazkunen inguruko azken albisteekin. Alberto Barandarian kazetarik sinatutako artikuluan, zenbait grafologok Veleiako idazkunak zalantzarik gabe faltsutzat jo dituztela azpimarratzen da. 2004ko jardunaldi batzuetarako prestatuko komun publiko moderno batzuetan agertutako marrazki eta graffitiak aztertu dituzte, eta ondorioztatu dute horiek eta 2005-2006 urteetan Veleian ustez agertutako ostrakak esku berak idatzitakoak direla.

Komun modernoan latinezko hitzak ere agertu izan dira, eta zenbait marrazki ere bai. Zabalduenetako bat hau da, soldadu bat eta tribunus garrula lingua hitzak.

Komun horretako irudi eta idazkunak 139 ostrakarekin alderatu dituzte, Arabako Foru Aldundiaren enkarguz, zenbait grafologok. Hauen azken ondorioak aipatzen ditu asteburuko Berriako erreportaiak, eta bertan esaten denez, "zalantzarik gabe" ostraka horietako 78 komunetako idazleak berak idatziak dira. Bereziki, euskarazko idazkunak dituzten ostraka esanguruetsenetako batzuk daude auzitan 78 horien artean.

Faltsutzat jotako idazkun horietako batzuk hauek dira (erreferentzia zenbakia da hasierakoa):


Argazkiak.org | Veleiako ostraka bat © cc-by-sa: sustatu

Azterketaren nondik norakoa honela azaltzen da Berriako erreportaian:

«Zalantzarik gabe esku berak egindako» hitzen kasuan, euskarri bataren marrak modu ia milimetrikoan kalkatzen dira bestearen gainean. Halaber, lerro arteko aldeak ere esanguratsuak dira oso. Irudi luke txantiloi berarekin egindako idazkunak direla. Hainbat kasutan, ostraken eta komun publikoaren idazkunen tamainaren arteko erlazioa batetik hamarrerakoa da, «eta, beraz, lerro arteko konbinazioak berdinak baldin badira, ondorio zuzena da burmuin bakarrak zuzendu dituela tresnaren ibilerak». Txostenaren egileek Gratiniano Nietok 50eko hamarkadaren hasieran Veleian bertan egindako indusketa lanetako hainbat pieza aztertu dituzte, eta baita Pompeiako (Napoli, Italia) aztarnategian aurkitutako idazkun batzuk ere, parekotasunen bila. Ez dute «antzekotasun txikiena ere» topatu.

Asterix komikien grafia

Artikulu honen goiburuan azaldutako letren konparaketa Herrian aldizkarian azaldu da (Arabako Kontzejuen aldizkaria, 6. alea, 2010eko urtarrila), baina moldatu egin dugu Sustaturako. Artikuluko grafiko batek alderatzen ditu ez bakarrik komunetako eta ostraketako letrak, baita Asterix komikietatik hartutako batzuk. Hona irudi orijinala:


Argazkiak.org | Veleia, Asterix eta komunak © cc-by-sa: sustatu

Izatez, Herrian aldizkariko artikuluak ez du faltsutasunaren tesiarekin bat egiten: egiazkoak izan daitekezkeela eta gutxienik gehiago ikertu beharko litzatekeela dio artikulu horrek. Hemen duzue artikulu hori (gaztelaniaz).

Erantzunak

Ostraka
2010-02-01 : 11:47

http://www.elcorreodigital.com/alava/20091121/sociedad/grafologos-apuntan-eliseo-como-20091121.html



El Correok argitaratu zuen azalean duela bi hilabete eta gezurra zen.

Iñaki
2010-02-01 : 11:58

Hau izan da azken kolpea, errematea. Gora filologia!

Juan Martin Elexpuru
2010-02-01 : 23:17

Ariketatxo bat Sustatuko irakurle sufrituentzat:

-Begiratu letrinako A letrak eta gero ikusi grafitoetan zenbat horrelako A dagoen(zeharkako marra angeludunak)

-Begiratu letrinetako letretan E letra eta ikusi grafitoetakoak (II, gehienak)

-Begiratu TRIBUNUS-en T (zeharkakoa gorantz) eta ea horrelako zenbat aurkitzen dituzun grafitoetan.

Begiratu letrinetan zenbat "akats" dagoen latinaren aldetik eta zenbat grafitoetan.

Eta horrela...

Lurmenen aldeko notiziaren bat dagoenean (ETSren kereila artxibatzea, kasuko) Sustatu ez da enteratzen. Kontrako zerbait dagoenean,berehala.

Asterixen letrekin konparaketa, Sustatuk ematen dion alderantzizko asmoaz egina zegoen "Herrian" aldizkarian, grafologoen absurdotasuna azpimarratzeko. Artxiboa neuk pasatu nien, gainera, Sustatukoei.

Seriotasun apur bat, mesedez. Epaiketa paralelo mediatikorik ez. Pertsona zuzenak sutara botatzen ari gara. Gure ondarearen zatitxo bat ere bai. Hau ez da jolasa.

Auziaz informazio gehiago: http://goiena.net/blogak/elexpuru

Iñaki
2010-02-02 : 10:03

Bla, bla, bla, bla eta martzianoak etorri ziren eta denek dantzatu genuen tangoa harik eta gasiosia amaitu zitzaigun arte. Benga ya.

iban
2010-02-02 : 19:58

«eta, beraz, lerro arteko konbinazioak berdinak baldin badira, ondorio zuzena da burmuin bakarrak zuzendu dituela tresnaren ibilerak»

Bla, bla, bla, bla eta martzianoak etorri ziren eta denek dantzatu genuen tangoa harik eta gasiosia amaitu zitzaigun arte. Benga ya.

iban
2010-02-02 : 20:02

“...eta letra bakoitzaren aukeraketa eta lerro arteko espazioak hainbeste errepikatzen direnez, horren azalpen bakarra da neurona sare berak sortutako elementu eta tresna grafikoak erabili direla, eta egitura neuromuskular eta koordinazio bisomotore bakarrak eraman dituela euskarrira; hau da, egile bakar baten lana dela”.

Bla, bla, bla, bla eta martzianoak etorri ziren eta denek dantzatu genuen tangoa harik eta gasiosia amaitu zitzaigun arte. Benga ya.

iban
2010-02-02 : 22:02

Patetikoak. Milaka euro xahutu demostratzeko Eliseo Gil eta Uderzo neurona sare bera dutela eta egitura neuromuskular eta koordinazio bisomotore berberekoak direla eta euskal inteligentsiako kazetari batzuk sinetsi! Eta plazaratu, erdal egunkari batek baino bi hilabete beranduago!

asier
2010-02-03 : 11:27

Grafologoen txostena ez da egin, goian esaten den bezala, "epaitegien aginduz", Arabako Aldundiak akusaziorako eskatuta baizik. Epaileek ez dute ezer eskatu. Alde handia, nik uste.

Sustatu
2010-02-03 : 12:09

Arrazoi du Asierrek. Gaizki genuen idatzita, "epaitegien aginduz". Zuzendu dugu. Eskerrik asko.


Ostraka
2010-02-03 : 12:40

Eliseo Gilen gutuna gaurko Berrian.


Grafologia zientifikoaren, Kazetaritza objektiboaren eta Justiziaren alde


Eliseo Gil Zubillaga

Iruña-Veleiako indusketen zuzendari ohia


Irakurleek ulertuko duten bezala, nire egoera nahiko delikatua da dagoeneko, eta ezin diet nire aurkako eraso berriei bidea egiten utzi. Hala ere, bene-benetan sinesten dut izenburuan aipatzen ditudan asmoetan.


Errespetu osoa diet bi espezialitateei. Lehena ia guztiz ezezaguna zait; bigarrenak laudorioz bete izan nau batzuetan, laidoztatu beste batzuetan. Azkenaldian, jazarpen publikoa eta iseka besterik ez dut jaso harengandik. Bi diziplinen independentzian sinetsi nahi dut, baina zoritxarrez ematen du «nire kasuaz» okupatzen den zenbait pertsonak interes berezia duela nire izen ona zikintzen.


Orain arte ezezaguna nuen eta orain eguneroko ogi bihurtu zaidan lege terminologiara jo beharrean izaten naiz gaur eguneko nire bizitza zapuztuan. Begira: Arabako Foru Aldundiak, Eusko Trenek eta ETS Euskal Trenbide Sareak nire kontra jarri dituzten kereilen arabera, nire estatusa «inputatuarena» da; besterik ez oraingoz, eta eskatuko nuke hitz horren esanahi zehatzaz gogoeta egitea -oroit dezagun, gainera, ETSrena artxibatu egin duela betiko Lurralde Auzitegiak-.


Errugabetasun presuntzioa denez inputatuak bere alde duen oinarri juridiko nagusia, ezin dut errebelatu baino egin sufritzen ari naizen indefentsioaren aurrean. Komunikabideek erasotzen didate, batez ere, eta oraingo honetan BERRIAk, Alberto Barandiaranek izenpetuta argitaratu duen artikulu luze baten bidez : Grafologoek ere ondorioztatu dute Veleiako euskarazko idazkunak modernoak direla; ERRIA 2010-01-30. Hedabide honen ibilbidea ezagututa, aitortu behar dut gertakari honek ezusteko izu-hotzikara bat sortu didala.


Ahaztu dezagun notizia batere kontrastatu gabe argitaratu izana, kazetaria ez baita harremanetan jarri albistearen protagonista nagusiarekin, baina nire errugabetasun presuntzioa ezin dut inolaz ere ahaztu, eta Legeak babesten dituen nire eskubideak ere ez. Kontua da kazetariak ontzat eman duela bere iturriek -Arabako Foru Aldundiak kontrataturiko Grafologia enpresa, edo Arabako Foru Aldundia, bistan da- eskaini dioten informazioa. Kazetariari ez zaio nonbait burutik pasatu «informazio pribilegiatu» hori prozesu legal baten mugen barruan dagoela, eta parte bati egiten diola mesede (igarriko duzue zeini).


Kazetari horrek, ezinbesteko kolaboratzailearen paperean, iritzi publikoa baldintzatzen eta nire aurka jartzen du bere artikuluaren bidez -iritzi publiko horren sektore oso jakin bat, azaldu beharra al dago zein?-, berriz ere parteetako bati mesede eginez.


Nori ardura zaio behean izenpetzen duenak eta bere abokatuek oraindik eskuetan ez izatea egunkari horrek hain modu eraginkorrean astintzen dituen txosten grafologikoak? Nori inporta zaio nire perituek sarbiderik ez izatea grafitoetara, AFAk ukatzen dielako, eta ostera erakunde foralak bere komenentzia eta nahierara erabiltzea, bere grafologoei erakutsiz, Barandiaranen artikuluan jasotzen den bezala? Nori ardura zaio ni errugabea izatea? Jakin ezazue, norbaiti hitz hauek aingerukeria iruditu arren, hau munstrokeria bat dela. Nik ez dudala Iruña-Veleiako indusketetan agertu zen grafito bakar bat ere egin, eta berdin zaidala nire aurkako mila txosten grafologiko aurkezten badituzte eta Augusto berberaren testamentua leporatzen badidate ere. Torturatzen banaute ere -tortura psikologikoaz luze hitz egingo nuke-, ez dut onartuko egia ez dena, ezta sutara eramaten banaute ere...


xuriken
2010-02-04 : 02:30

Ez dut baloratuko Iruña-Veleiaren inguruan gertatzen ari dena. Aspaldi ahitu baitzuen nire harritzeko ahalmena gai honek, eta jada ez nau ia ezerk asaldatzen.



Baina Eliseo Gilek "Berria"n idatzitako gutuna irakurri dut, eta kezkatuta utzi nau bertan irakurri dudan parrafo batek.



Dio Eliseok:



"Kazetari horrek, ezinbesteko kolaboratzailearen paperean, iritzi publikoa baldintzatzen eta nire aurka jartzen du bere artikuluaren bidez -iritzi publiko horren sektore oso jakin bat, azaldu beharra al dago zein?-, berriz ere parteetako bati mesede eginez."



Berriz idatziko dut, bada ezpada ere.



"...iritzi publiko horren sektore oso jakin bat, azaldu beharra al dago zein?".



Zer esan nahi ote du? Nik dakidala, "Berria" euskaraz irakurtzen dugunon sektoreari bideratuta dagoen produktu bat da. Zer bestela?



Argituko al digu? Ez baitut gaizki pentsatu nahi baina... badakizue zer dioen gaztelaniazko esaerak: "Piensa mal y acertarás".



Eskertuko nuke, beraz, ni bezalako irakurle inozo batentzat azal dezala zein sektore "oso jakin"ari buruz ari den "Berria"ko irakurleoi buruz hitz egiten duenean.



Niri bakarra bururatzen zait: Prentsa euskaraz (ere) irakurtzen duten pertsonak.



Azalpenaren zain gearatuko naiz.

Juan Martin Elexpuru
2010-02-04 : 09:46

Zuzen zabiltza, Xuriken. Hitz egin dut Eliseorekin eta horixe esan nahi omen zuen. Euskararen sektoretik omen du oposizio handiena Diputazioaren jokaerak eta, bere ustez, hori neutralizatzeko egin du filtrazioa prentsa euskaldunaren bidez.

Pruden Gartzia
2010-02-04 : 18:42

Juan Martin aurreko mezu batean (3.ean) seriotasuna eskatzen zenuen, eta hauxe gaineratu:



"Seriotasun apur bat, mesedez. Epaiketa paralelo mediatikorik ez. Pertsona zuzenak sutara botatzen ari gara. Gure ondarearen zatitxo bat ere bai. Hau ez da jolasa"



Eta zer da zu orain egiten ari zarena? Kazetari bat (Alberto Barandiaran) sutara bota, besterik ez.



Ez naiz nekatuko esaten ez dudala ulertzen gai honetan pertsona batzuk, zuk zeuk, adibidez, hartu duzuen jarrera. Ez al da nahikoa Eliseo Gilen azken gutun histrioniko hori irakurtzea (BERRIAn argitaratua, bide batez) pertsona horren ibilbide eta azalpenei buruz susmo galantak hartzeko?



Bera presio handi baten azpian dago, ados, baina, bide batez, norbaitek (lagunen batek, adibidez) esplikatu beharko lioke "euskararen sektorea"-ri buruz horrela hitz egiteak batzuei ez digula grazia puñeterorik egiten, ezta ere batzuk kontu hau euskararen kontrako eraso gisa aurkezteko darabilzuen setarekin. Neuri behintzat ez dit egiten.



Juan Martin Elexpuru
2010-02-05 : 09:35

Pruden:

-Ni Alberto Barandiaran sutara botatzen ari naizela? Nire blog xumean Berriak gaiaz duen ildo editoriala kritikatzen dut, kazetariaren izena aipatu ere egin gabe. Ezin da?

-Eliseoren azken gutuna, histrionikoa? Nola erreakzionatuko zenuke zuk bizitza pertsonala eta profesionala guztiz izorratuko balizute, egin ez duzun delitu larri bat leporatuta? Ez dizu gogora ekartzen adibide oso hurbilen bat?

-Eliseok aditzera ematen du grafologoen filtrazioa Berriaren bidez egin zela sektore euskalzaleari zuzendua zegoelako. Zerk ez dizu "grazia puñeterorik" egiten? Eliseok (eta beste batzuek) hori uste izateak?

Pruden Gartzia
2010-02-05 : 19:56

Aurreko mezuan esaten nuen "Ez naiz nekatuko esaten...".



Ez da egia. Nekatu naiz.



Hurrengo batean trikitx egiten badugu, Juan Martin, hitz egin dezagun futbolaz, rock and rollaren etorkizunaz edo Hipatia Alexandriakoaren orrazkeraz.



Baina ez egidazu aitatu, mesedez, Eliseo Gilen konturik, errazagoa baita gamelu bat jostarratzaren begitik pasatzea jaun horren histrioikeriak aintzat hartzea baino.



Zeren Veleiako idazkunak benetakoak balira ere (oso-oso-oso, baina benetan oso zaila begitantzen zaidana), horrek ez luke zurituko gai horren inguruan berak egin zuen txapuza itzela eta zeuk darabilzun "ildo editoriala".



Shalom. Bakea.



Juan Martin Elexpuru
2010-02-07 : 23:19

Hona hemen Eliseo Gilen argitalpen batzuk eta Idoia Filloyren beste batzuk.


Eliseo Gilek Iruña-Veleian burututako metodo eta lan arkeologikoaz, berriz, hona hemen arkeologo entzutetsuen diktamenetatik jasotako iritzi batzuk:


•Edward Cecil Harris Doktorea; arkeologoa, Bermuda Maritime Museum-eko Zuzendaria. (Harrisen arkeologia-metodoa da arkeologia modernoaren eredu arkeologiko onartuena). Zera dio, besteak beste bere txostenean
“Excavation Method: From the photographs of excavations, it seems clear that the archeological excavations was carried out to the highest standards.”


•Carmen Fernandez Ochoa Doktorea, Arkeologiako Irakasle Katedratikoa eta Angel Morillo Cerdán Doktorea, arkeologoa eta Arkeologiako Irakasle titularra. Zera diote, besteak beste, beren txostenean.
“La citada intervención arqueológica se ha realizado con absoluta competencia científica, tanto en los planteamientos metodológicos como en la exhaustiva recopilación de datos cronoestratigráficos”


•Emilio Illarregi, arkeologoa eta Arkeologia Irakaslea unibertsitatean. Zera dio besteak beste bere txostenean
“Las intervenciones arqueológicas han sido desarrolladas con plena competencia científica, tanto en lo que se refiere a los procedimientos y estrategias de excavación como de documentación”


Txapuza itzela?


Iñaki
2010-02-08 : 12:40

Eta non daude zure argitalpenak hizkuntzalaritza historikoaz eta euskararen historiaz, Elexpuru? TXAPUZA ITZELA

b.
2010-02-08 : 14:17

Non daude ustezko txostena idatzi duten ustezko grafologoen curriculumak? Hau garrantzitsuagoa izan daiteke: zein da grafitoei aplikaturiko grafologian duten esperientzia? Publikaziorik ba al dute horren inguruan nazioarteko congresu edota aldizkariren batean?



Perito kaligrafoek egiten dituzten zenbait hankasartze hemen: http://perits.org/uploads/repositorio_imagenes/2009/articulo_del_mes130.pdf



"Antes de proceder a la confrontación

o cotejo de muestras, indubitadas y

dubitadas, se deberán examinar y

valorar de forma minuciosa las

características del soporte, señalando

las premisas, reservas y limitaciones

que provoque el mismo"

...

"Cualquier omisión en estos extremos

podrá ocasionar la invalidez de

nuestro informe por constituir errores

“graves” que afectan de pleno al

fondo de nuestra investigación."



Gustora jakingo nuke perito kaligrafoek zer idatzi duten txostenean horri buruz (guztiok dakigu DINA4 batean pilot urdin batekin idaztea eta harrikozkor batean iltze batekin edo auskalo zerekin marrak egitea ez dela berdin, baina zer eragin du horrek ondorio kaligrafikoak emateko garaian? Berriako kazetariak ez dio ezer honi buruz).

Iñaki
2010-02-08 : 14:52

Eta nork esan dizu zuri konparatu dena DINA4 batean dagoena eta zermakietan dagoena izan dela? Kurrikulumen kontuarekin jarraituz: konparatuko ditugu euskararen historiaren inguruan Joseba Lakarrak eta Elexpuruk dauzkatenak? Bakoitzaren argudioak konparatuko ditugu?

b.
2010-02-08 : 15:52

Barandiaranek jakingo du zehazki zer konparatu duten baina ez zen hori adierazi nahi nuena. Esan nahi nuena da, peritaje gehienak paperean idatzitako testuekin egiten direla baina kasu honetan idazkunen oinarria ez dela papera, mota ezberdinetako harriak, zeramikak... baizik.



Nire zalantza hurrengoa zen: paperean idatzitako testuak aztertzeko teknikek berdin balio al dute harrian idatzitako testuentzat? Zein mailataraino mugatzen ditu harriak (eta harrian idazteko teknikak) peritu kaligrafoak? Bukatzeko, esaten nuen, gustatuko litzaidakeela jakitea harrizko oinarriari buruz perituek zer idatzi duten. Izan ere, informazio hori garrantzitsua da goian aipatu dudan artikuluaren arabera, analisiaren fidagarritasuna neurtzeko.



Argiago: demagun, paperean idazten dugunean, gizaseme bakoitzaren letra zalantzarik gabe identifikatzeko gai direla perituak. Berdin pasatzen al da harrian marrak egiten ditugunean? Zer diote perituek horri buruz beren txostenean?



Curriculumak gauza asko esaten ditu bakoitzaren lanari buruz. Zorionez, epaile batek ez du grafologoaren curriculuma soilik kontuan izaten txosten bateko ondorio/argudio kaligrafikoak ontzat hartu edota baliogabetzeko (nahiz eta epaileak ez dakien ezer grafologiaz). Orduan guk zergatik erreparatzen diogu curriculumari BAKARRIK? Oharra: grafologo jartzen duen tokian jarri "polizia", "sikologo", "ingeniari", "abokatu", "hizkuntzalari", ...

Iñaki
2010-02-08 : 16:00

Noski, ez da gauza bera boligrafoz idaztea edo harri baten gainean ezer zizelatzea. Baina hiru lekutan agertutako marken artean... distantzia bera egongo balitz edozein erreferentzia-puntu kontuan hartuta? Eta bat-etortze hori baten baino, 40 alditan suertatuko balitz?

b.
2010-02-08 : 16:26

Ez dut oso ondo ulertu, baina distantzia kontua al da? Ez dirudi oso datu fidagarria denik txosten batean "zalantzarik gabe" bezalako terminoak idazten ibiltzeko, izan ere, harrian behintzat, distantziak kopiatzea, gauza erraza da eta edonork egin lezake. Paperean beste kontu bat litzateke, azkar eta jarraian idazten dugulako eta zaila delako erregela batekin kalkuluak egiten ibiltzea... Sustaturi grafologoen txostena filtratu al diote?

Iñaki
2010-02-08 : 16:47

Beste era batera azalduta, gizona: demagun bi marra ditugula X lekuan eta beste bi Y lekuan. Ongi. Har ditzagun marra horiek eta neurtu: goitik behera, zabalera, beren artean dagoen distantzia eta inklinazioa. Bai? Ongi. Demagun orain bi marra horietaz jaso ditugun datu guztiak berdinak direla X eta Y lekuetan. Bai? Eta orain demagun X eta Y lekuetan ez eze, N, P, O, T lekuetan ere berdin ageri direla. Ondorioa? Erreza dela distantziak kopiatzea? Saiatu, ea, zure izena harri gainean idazten. Eta gero egin froga beste harri baten gainean. Eta gero neurtu erregelaz eta graduatzailez idatzitakoa, idatzitakoaren arteko distantzia...

b.
2010-02-08 : 16:59

Ondorioa argi dago, baina ez nekien Veleian ostraken fotokopiak ere egiten zituztenik...

Mostoles
2010-02-09 : 19:20

AUTORITATE ERREKURTSOAZ



Iñakik Geozentrismo sasoian jaioa behar du derrigor, biologikoki ezinezkoa den arren. Konpara ditzagun kurrikulumak, zertarako? Buda ala San Martin, nor da botertsuago? antzeko zeozer esaten zabiltza, edozein arrazionalista eta enpiristarentzat irakurtze hutsak auzolotsa ematen duen zioa. Real Madrilek irabazi behar lituzke ligako partida denak, logika horri jarraiki, baina ez da horrela. Eta guri axola zaiguna partida hau da, ez besteak, nahiz eta argi dagoen hau galdu ezkero besteeak berrikusi beharko direla. Hara e-mail hauetan Pruden Gartziari eta Iñakiri usaintzen zaion tentsio tonua. Posizioetan atzera doaz orain hilabete bi erabat lasai zeudenak. Ilargiari begiratu jaun andreok, eta az atzamarraren jabearen kurrikulumari. Euskararen historian zeozer badago argi, zera baita, ez daukagula materialik indoeuropearrarekin lortu diren antzinamendu eta ondorioetara heltzeko. Batzuek, Europan euren sexua ere ez jakiterainoko pisugabeak direnak, horretara jolastu arren. Galdera xume bat, ez al da logikoa komunean grafitoen idazkera imitatzen saiatzea, marketing ikusoegitik?Grafologorik ba al dago Alcoyko idazkune iberiar bat egin duen pertsona ezagutzeko gai dena castellonen bertan? Eta hala bada, zergatik orain arte inor ez da atrebitu halakorik egiten? Kaleko pintadekin ere peritoek ia ezinezkoa dela esaten dute eta....

Pruden Gartzia
2010-02-09 : 22:09

Ea ba, pozik uzten ditudan Juan Martin eta Mostoles.



Hau da egoera: Eliseo Gilek egundoko aurkikuntza arkeologiako garrantzitsuak egiten ditu, gai direnak laupabost iraultza zientifiko simultaneo sortzeko (euskararen historian, latinaren historian, egiptologian, kristautasunaren historian, etab.). Filtrazio batzuen ondoren, iritzi publikora ailegatzen dira (2006ko uda, oker ez banago, baina ez daukat astirik datak egiaztatzen ibiltzeko). Euforia "askatzen" da. Eliseok den-dena du alde: komunikabide guztiak salbuespenik gabe entusiastikoki jasotzen eta iruzkintzen dute berria (ik. orduko EL CORREO, DIARIO DE ALAVA, GARA, BERRIA...), Aldundia (PPren esku) guztiz pozik dago, Jaurlaritza ere (Euskotren)... prentsaurrekoak, filtrazioak, exklusibak...



Handik urte pare batera komunikabe guztiak erabat kontra daude (BERRIA da Eliseori sinesgarritasuna ematen dion bakarra), Aldundiak eta Euskotrenek epaitegietara daramate auzia, EHU erabat lotsatuta eta eskandalizatuta faltsukeriagatik, Espainiako unibertsitateetan denak barre batean sartu diguten ziriagatik, mundu mundialean ez dirudi inor (absolutuki inor) emozionatzen denik Eliseoren "iraultza zientifiko" anitzekin (horren aztarrenik txikiena balego ehundaka ikerle atzerritar genituzke hemen ate joka aspalditik...).



Eta, testuinguru horretan, oraindik ere Elexpuru bezalako batek Eliseoren defentsa itsuari ekiten diote. Dena da konspirazio baten ondorioa, besterik ez ("Angeles y demonios" filmean bezala, gutxi gorabehera). Ez omen du zentzurik esatea Eliseok txapuza itzela egin duela, baita aurkikundeok egiazkoak balira ere (egia esan, egiazkoak balira, Eliseoren txapuza hiperritzela litzateke, megaitzela, ultraitzela... onargarria litzateke halako aurkikunde batzuk horrela kakaztea?).



Eta Mostelesek anotazen du "tentsioa" nabaritzen duela nire eta Iñakiren erantzunetan!



Aizu, zeuk benetan uste duzu txapuza itzel horrek ez diola fakturarik pasatuko euskarari Araban?



Bai, oso handia gainera. Urteekin nabarituko da, gero eta gehiago.



Horra nire tentsioaren arrazoia.

Iñigo
2010-02-09 : 22:32

Mostoles: nik dakidala kurrikulumak edo beste era batera esanda, aurretik eginiko lanak, aipatzen lehenengoa Juan Martin Elexpuru izan da, begiratu 16. erantzuna artikulu honetan bertan. Teoria polita balizko imitazioena, komunetako irudiak 2008an edo gaur agertu izan balira, tira, baina komunetako idatziak 2004koak dira, hau da, balizko idazkune iraultzaileen berri publikoki izan baino bi urte lehenago. Egia esan, ez dakit Eliseorik errurik izango duen, batzuetan pena eta dama ematen dit, baina nahiko argi daukat idatziak faltsuak direla. Bide batez, bi kontu: bakoitzak darabiltzan argudioen kalitatea aztertzea ez legoke txarto. Bestalde, nik neuk nahiago dut ebakuntza bat zirujauren batek egin diezadala, eta ez erizain batek. Baina, noski, Euskal Herri honetan mundu guztia da zirujau. Edo arkitekto. Edo hegazkin-pilotu. Ordu eta egoeren arabera.

Juan Martin Elexpuru
2010-02-09 : 23:21

LORENA LZ de LACALLEren AGERRALDIAREN AUDIOA
Gaia jarraitzen dutenek dakiten bezala, Lorena Lz de Lacalle Kultura Diputatua Arabako Batzar Nagusien Euskara, Kultura eta Kiroletako Batzordearen aurrean agertu zen otsailaren 3an, Arabako Foru Aldundiaren eta EHUren arteko Konbenioa azaltzeko. Baina hori beharrean, haren ondorengo litzatekeen Plan Zuzendaria azaldu zuten berak eta Julio Nuñez EHUko irakasleak.
Batzarreko audioa eskegita dago Interneten. Oso mamitsua da. Nahiz eta hurrengo eguneko prentsak isildu, oso kritika gogorra egin zioten PSEk eta Aralarrek.


Grabazioak 2 ordu eta 3 minutu irauten ditu. Lehendabizi: Lorena Lz de Lacalle/ 14 m: J. Nuñez/ 39 m: Iñaki Aldekoa (labur)/ 51: Nuñezek amaitzen du/ 52: ANV (Aitor Bezares)/ 54: Aralar (Iñaki Aldekoa)/ 1:01: PSE (Virgilio Bermejo)/ 1:10: PP (Carmen Asiaín)/ 1:19:Lorenaren erantzunak/ 1:25: eztabaida gori-gori/ 1:37: Walt Disney eta Avila.


Egun berean, Javier Vegas kazetari gasteiztarrak iruzkin zorrotz hau idatzi zuen bere blogean. Otsailaren 6ean, berriz, Iñaki Aldekoaren iritzi-artikulu hau argitaratu zen Diario de Noticias de Alava egunkarian.


b.
2010-02-10 : 15:24

Txapuza itzelak, besteak beste, emakume honek erantzuteko garaian egiten dituenak. Adituren batek txosten sikoteknikoa aurkeztuko al du diputatu anderearen kontra?

Juan Martin Elexpuru
2010-02-11 : 21:29

AZKEN ORDUA: HESI HANDI BAT ERAIKI DUTE AZTARNATEGIAREN BARRUAN! Jakin berri dugunez (Ostraka mundua eta Angulo Oscuro blogak, eta lekukotza zuzenak), hesi handi bat egin dute aztarnategiaren barruan, di-da! batean. Inolako kontrol arkeologikorik gabe, itxura guztien arabera. Zutabeak ipintzeko zulo handiak egin dituzte makinaria astuna erabiliz.
Planoan ikusten denez, hesia jarri duten zonaldean pieza baliotsuak agertu ziren. Ingurua oso aberatsa da bai materialetan eta baita estratigrafiari dagokionean ere, arkeologoen esanetan.


Iruñeko Gaztelu Plazako mamua sumatzen da Iruñako zelai elurrez zurituetan.


Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago