Teknologia albisteak

Amurrion Bai Euskarari Ziurtagiriarekin elkarlanean

Erabiltzailearen aurpegia
Komunikazio saila - Kontseilua
2006-11-21 : 10:11

Gaur Amurriok beste urrats bat eman du euskararen aldeko prozesuan. Azken 3 urteetan Bai Euskarari Akordioa egitasmoan parte hartu ostean, lankidetza hitzarmena sinatu dute Amurrioko udalak eta Euskararen Gizarte Erakundeen Kontseiluak.

Hitzarmen honekin Amurrioko Udalak euskararen normalizazioa sustatzeko egindako ahaleginei bultzada eman nahi izan die. “Udalaren eginkizuna da euskaraz bizitzeko aukera izateko neurriak hartu eta bultzatzea”, adierazi du Amurrioko alkateak, Pablo R. Isasi Agirrek. “Euskaraz bizitzeko ametsa errealitatea bihurtzeko guztion inplikazioa eta adostasuna beharrezkoa da”, gaineratu du Agirrek. Bestetik, Kontseiluko idazkari nagusiak zoriondu ditu: “Eredugarria da Amurrion guztiok batera proiektu berri hau martxan nola jarri duzuen” Kontseilukoakekitaldi honetaz baliatu da instituzioei euskalgintzarekin elkarlanean aritzeko deia luzatzeko.

Kontseiluak hitzarmen honen bidez, Bai Euskarari Akordioan egiten ari diren lana indartuko dela aipatu du. “Enpresek, saltokiek eta era guztietako entitateek beren erakundeetan hizkuntzaren normalizazioa erdiesteko neurri eraginkorrak hartu eta betetzen ari direla adierazten du”, azaldu du Xabier Mendigurenek. Izan ere, Bai Euskarari Ziurtagiria entitate hauek egiten duten ahaleginaren aitortza dela azpimarratu du eta Amurriok 40 Bai Euskarari Ziurtagiri eskuratu ditu aurten. “Bai Euskarari Ziurtagiriaren bidez egiten duten esfortzua kreditatuko du Kontseiluak, herritarrek jakin dezaten entitate horiek betetzen duten erantzukizun soziala”, aditzera eman du idazkari nagusiak.

Amurrion euskararen alde lan egiteko egitasmo ugari jarri dira martxan. Lan honen adibide garbia da aurtengo herriko jaietan aurkeztutako “Amurrion Euskaraz Barraz barra!” kanpaina. Proiektu honen bidez, Amurrioko tabernari, txosna eta jai koadrilek euskararen erabilera sustatzeko dinamika burutu zuten jaietan zehar. Egitasmo berri hau aurkezteko prentsaurrekoa eskaini eta gero, kanpainaren leloa zuten 65.000 edalontzi eta 200 kamiseta banatu zituzten doan herritarren artean.
Gaurdaino 1350 entitatek baino gehiagok eskuratu dute Bai Euskarari Ziurtagiria Euskal Herri osoan. “Aurreko astean Gasteizen izan ginen hitzarmena sinatzen eta hurrengoan, Leitzan eta Azkoitian izango gara”, gogorarazi du Mendigurenek. Bukatzeko, “aurrerantzean ere izan dezazuela lan polit honetan jarduteko gogoa eta kemena”, aipatu du. Izan ere, hitzarmen honekin proiektua hasi besterik ez da egin.

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago