Informatika berrikuntza plan zabala EHUn
Euskal Herriko Unibertsitateak informatika azpiegiturak berritzeko prozesu zabala jarri du martxan. Hasteko, unibertsitatean matrikulatutako ikasle guztiei 20 mb-eko postontzi elektronikoa jarri diete.
Lehenengo pausua: ikasle bakoitzarentzako posta elektronikoa
- Helbide elektroniko horrek ikasleen eta Unibertsitatearen prestakuntza lana eta gestioak erraztuko ditu.
- Helbide elektronikoaren erabilpen pertsonala ere egin dezakete ikasleek.
- EHUko Fakultate edo Eskola bakoitzak banaketa orokorrerako helbide elektronikoen zerrenda bat izango du.
- Irakasleek ere izango dituzte beren ikasgaietako ikasleen helbideak eta ikasle guztien helbide elektronikoak batuko dituen bilatzailea. Horrek erakundearen eta ikasleen arteko erlazioa erraztuko du.
- Ikasleek 4.000 ordenagailu dituzte EHUn; 2.000 Bizkaian, 700 Araban eta 1.200 Gipuzkoan. Posta-kontuak ordenagailu horietatik edo etxetik ere kontsultatu ahal izango dituzte.
Ekipamenduaren berrikuntza
Martxan dagoen beste proiektu bat da informatika ekipamenduaren berrikuntza. Lehenengo, administraziorako eta unibertsitateko kudeaketa lanetarako erabiltzen diren 600 ordenagailu berrituko dituzte. Datorren urteko otsailerako berrituko dituzte horiek guztiak.
Ekipamendu guztia estandarizatuko dute; sistema operatiboa, bulegotikako erremintak, posta elektronikoa eta gainontzeko softwarea. Bestalde, sistemaren estandarizazio prozesua unibertsitateko gainontzeko ordenagailuetan ere egingo dute; urtarrilerako 1.500 ekipo estandarizatuko dituzte. Horrekin batera, ekipamendua mantendu eta egunerapenak egiteko gune zentral bat jarriko dute otsailerako. Orain arte, ordenagailuz ordenagailu joan behar izaten zen lan horiek guztiak egiteko.
Eskainiko den posta zerbitzua korporatiboa izango da. Zerbitzu horrek aukera emango du:
- Gorberaren posta beste baten esku uzteko.
- Gainerako erabiltzaileek duten agenda kontsultatzeko (bileraren bat deitzeko, adibidez).
- Beste erabiltzaile batzuekin lan egiteko.
- Karpeta publikoak sortzeko, informazio hori beste erabiltzaile batzuek kontsulta dezaten.
- ...
Bestalde, EHUn kalitatezko sarea jartzeko asmoz, 14 ikastegitan telekomunikazio kableatua berrituko dute. Otsailerako amaitutako egongo da berrikuntza hori ere.
Switch motako komunikazio ekipoak instalatzen ari dira ikerkuntza sareko erabiltzaileentzako. Hub motakoak daude orain.
EHUren webgunea
Lehiaketa publiko bat ere deitu dute EHU egokitu dezaten Datuen Babeserako Lege Organikoaren araudira. EHUren webgunea berritzeko ikerketa bat ere hasi dute.
Berrikuntza hauek guztiak egiteko, 3,4 milioi euroko inbertsioa egingo dute; Europar Batasuneko ERDF (European Regional Development Fund ) fondoetatik 1,2 milioi euroko diru-laguntza jasoko du EHUk.
Cybereuskadin izan dugu EHUko plan honen berri.
Erantzunak
>EHUren webgunea berritzeko ikerketa bat ere hasi dute.
Aleluia!! Eskerrak!! Biba!! BAZEN GARAIA. Benetan. Inoiz EHUren webgunean barrena ibili den edonork jakingo du Euskal Herriko webgune kutre eta labirintikoenetariko bat dela hori:
- diseinu aldetik, ezin kaskarragoa: itsusia izateaz gain, orrialdeen artean ez dago diseinu koherentziarik
- klik bakoitzarekin leiho berri bat irekitzen zaizu
- toki batzuetan sartzeko, ezinbestekoa da Explorer baliatzea (notak ikusteko eremuan, esate baterako: "Oraingoz, aplikazio hau ezin da erabili Netscape nabigatzailearen 6.1.x eta 6.2.x bertsioekin. Barkatu eragozpenak").
- oro har, erabilerraztasuna: 0.
Hau kritika gogorregia dela uste duenak, egin dezala proba: orrialde nagusitik abiatuta (ehu.es), bila dezala, esate baterako, Aleman Filologiako irakasgaien programa. Negargarria, ez duzue uste?
1500 lanposturen estandarizazioa zer den jakin nahiko nuke nik. UPVren politika ezagutuz, Microsoften lizentziatan oinarritutako lanpustuak erabiltzeari estandarizazioa deitzen ari ote diren susmoa daukat. Alegia, guztion dirua inolako kontrolik gabe eta beharrik gabe gastatzera doazela susmatzen dut. Norberarena ez den dirua zein erraz gastatzen duen zenbaitek!
Lehen ere "estandarizazio" saioak egon dira UPVn eta horren aurrean informatika fakultateko hainbat kidek, eta ez gutxik!, protesta ere egin izan dute. Ea behingoz gure gidariek errekurtsoen erabilera egokiari garrantzia ematen dioten. Badakit gure euskal herri maitea aberatsa dela, baina horrek ez du esan nahi dirua bota beharra dagoenik, eta gutxiago kanpokora. Sikiera hemen inguruko enpresek jasoko balute lizentziatan gastatutako dirua... diru hori berriz hemen inbertituko litzateke, baina microsoftek ez du hemen inbertitzen. Zuzenean beste herrialde batzuetara doan dirua da, hemengo zergetatik zuzenean kanpora doan dirua.