Teknologia albisteak

Osatuz: Osasunaren Esparruko Langileak Euskalduntzeko Ikasmaterialen Bilduma

Erabiltzailearen aurpegia
Begoña Martinez Monasterio - HABE
2004-10-25 : 11:10

HABE, Osakidetza eta IVAP-HAEE erakundeek argitaratu dute, lankidetzan. Osakidetzako euskararen erabilera-plana garatzen laguntzeko asmoz sortu dira ikasmaterial horiek, hartara, bertako mediku, erizain nahiz laguntzaileek gaixo eta hiritarrekiko harremanetan euskara erabil dezaten.

Helburua

Helburua

Profesionalen eta bezeroen arteko elkarrizketak, informazio-orriak, idatzizko agiriak, etab. euskaraz egiten gaitzea eta ohitzea da.

Asmo horrekin, osasun-arloko profesionalak euskara erabiltzen trebatzeko, alegia, Osatuz Orokorra eta Osatuz Pediatria langai didaktikoak sortu dira. Unitateak ez dira euskalduntzearen hasieran erabiltzekoak, 2. Hizkuntza Eskakizuna prestatzeko langaiak baizik, zehatzago esanez.

Bildumaren ikastunitateetan lantzen diren gai guztiak osasun-eremukoak dira

Mass-medietako zientzia-testuak hartu dira abiapuntutzat, esaterako, Zientzia.net web gunetik edo Elhuyar zientzia-aldizkaritik hartutako artikuluak, Euskadi Irratiko saioetan sendagileei egindako zientzia-elkarrizketak, etab. Landutako gaiak, besteak beste, honako hauek dira: anbulatorioak, hipokondriakoak, nekea lanean, sendagilearen eta gaixoaren arteko komunikazioa, antibiotikoak, kolesterola, anorexia eta bulimia, gaixo terminalak, gripea, gibeleko hantura, alergiak, zorriak, bat-bateko heriotza, txertoak, eztarriko mina, asma…

Osatuz bildumaren barruan bi azpisail egin dira:

  • Osatuz Pediatria: osasun-arloan umeekin lan egiten duten pediatra eta erizainei zuzendutakoa.
  • Osatuz orokorra: osasun-arloan lan egiten duen edozein profesionali zuzendutakoa.

Bilduma bederatzi liburuk osatzen dute: horietako zazpitan ikastunitateak daude jasota, eta beste bietan glosategiak eta transkripzioak. Baditu, baita ere, bideo-zintak eta CDak, zeinetan jaso baitira telebistatik eta irratitik hartutako grabazioak.

Irakaslearen unitateak HABEren web gunean daude jarrita; eta, eskuratzeko, pasahitza behar da.

Proiektu hau lan-talde baten emaitza da, eta posiblea izan da jende askoren lanari esker. Batetik, Debabe Udal Euskaltegiko irakasleak, AEK-ko hainbat didaktikarik eta bereziki Hernaniko Udal Euskaltegiko irakasleek lan egin dute unitateen sortze-prozesuan.

UZEIren partaidetza

Aipatzekoak dira, bestalde, UZEI erakundearen partaidetza, proiektuaren hasiera-hasieratik, Jabier Agirreren lankidetzaren bidez (testuak orraztuz, aholkularitza arlo terminologikoan eskainiz, glosategiak sortuz…) eta HABE erakundea, egitasmo horren gidaritza, koordinazio eta errealizazio didaktikoa eta jarraipena bideratu dituena.

Erantzun

Twitter ikonoa  Facebook ikonoa  Sartu